Cari

Subscribe:

Ads 468x60px

Pasang Iklan Anda Disini


Sunday, February 24, 2013

MATEE ADALAH PERINGATAN

Pengarang : Akhbar Al-Mutawassila

Deungon Bismillah, Lon mula haba
Keu Allah Ta'ala, meuwoe pujian
Seulaweut saleum, akan Baginda
Ateuh keluarga, sahbat sekalian

Assalamu'alaikum, Tuha - muda
Jamak lon sapa, inong ngon agam
Ulon neuk rika, nyoe bacut haba
Keu wareh lingka, teuntang keumatian

Kafa bil mauti, wa'idha
Nabi bersabda, wahee Ee rakan
Cukuplah matee, peu ingat gata
Nyang geusabda, meunan artian

Meunyoe matee, hana jirasa
Oleh hamba, keu- peuringatan
Hanpu lee nasehat, keu nyan manusia
Lam dunia, wahee Ee taulan

Meuka matee, sidroe-droe hamba
Gadoeh teuga, nibak masa nyan
Walau carong, biasa meuhaba
Hana dawa, tan perdebatan

Adak na jaroe, hanjeut meuraba
Dua mata, tan penglihatan
Juga kulet, hanjeut meurasa
Hana guna, jai pengawalan

Adak caroeng, ahli fisika
Massa benda, jeut geu uraikan
Adalah matee, teutap geurasa
Tanggoh hana, wajeb rasakan

Sungguh matee, jipisah gata
Laju sigra, ngoen kecintaan
Hanjeut geutulong, lee ayah bunda
Walau kaya, teutap perpisahan

Nyang tagaseh, mandum tan taba
Di dunia, tanyoe tinggaikan
Tanyoe tajak, nanggroe glap gulita
Sinan mula, ta-eu janji Tuhan

Nakeuh matee, nyan akan jiba
Sidroe hamba, ngon kenyataan
Janji Allah, masa di donya
Sinan mula, akan terungkapkan

Na nyang sinan, jikap lee kala
Uleu raya, jigruep disinan
Na chiet geutoet, lam apui meunyala
Lubang nuraka, geurasa sinan

Teuma nyang ta'at, keu Allah ta'ala
Taman syurga, gobnyan rasakan
Luah kubu, konlee sa kali dua
Siteuntang mata, geubri lee Tuhan

Adalah kubu, pintoe hai syahra
Akhe lam donya, tanyoe tinggaikan
U akhirat, pintoe tamula
Akan tarasa, balasan Tuhan

Soe nyang inseuf, matee akan teuka
Ubah sigra, akan kelakuan
Bek lee haroek, buet nyang meudausa
Kubah syahra, bek lee kerjakan

Jalan Takengon, meuputa-puta
Bek that teuga, ba moto sinan
Sep keuh oh-noe, Nadham lon rika
Akhbar Mutawassila, meurunoe mengarang

Lon lakee meu'ah, pat-pat na cupa
Salah haba, dan kekurangan
Mudah-mudahan, haba lam rika
Jeut MUSTIKA, dalam kehidupan

Lhokseumawe, 27 Desember 2012

3 DROE MANUSIA SUPER

Pengarang : Akhbar Al-Mutawassila

Assalamu'alaikum, warahmatullah
Saleum ukhuwah, keu wareh lingka
Lon pujoe Tuhan, Alhamdulillah
Keu Rasulallah, Rahmat Sijahtra

Bungoeng jeumpa, bee cukop ceudah
Adak si-ulah, mangat lagoina
Ulon useuha, karang mau'idhah
Nazam lon surah, baet meubanja

3 boeh amalan, syedara meutuah
Meusoe teem ihklah, na nyang keurija
Akan geusayang, seurta geubalah
Seubab bak Allah, keubit utama

Peureutama phoen, ureung seudeukah
Bak watee susah, kureung beulanja
Geumeu derma, keu Hamba Allah
Nyang leubeh susah, ateuh rhueng donya

Meunyang keu 2, syedara meutuah
Jujor 'amaliyah, 'oh beungeh teuka
Nyang geupubuet, lagee gareh Allah
Hana meusihah, seumena-mena

Nyang teurakher, meusoe peumeu'ah
Nyang pubuet salah, deungon nyan hamba
Seudang saat nyan, jeut geuhukom sah
Ureung nyang bak Alah, juga utama

Didalam kulak, geuboh boh panah
Asai santan pah, mangat nyum rasa
Tameudo'a tanyoe, wahee Ee sahbah
3 nyang lon surah, Ek ta-keurija

Iskandar Muda, dilee that meugah
Lagi gagah, cantek rupa
Nazam lon rika, beujeut mau'idhah
Dalam group Panah, jeut tatueng guna

Lhokseumawe, 20-12-2012

"ASOE NASEHAT"

Pengarang : Agam Sidroe

‎Assalamu'alaikom, bandum keurabat,,
Bandum sahabat, lam donya maya,,
Loen ujoe cuba, rika loen intat,,
Seubagoe nasehat, peuingat syedara,,

Diri loen jua, leubeh lom meuhat,,
Seubagoe ubat, hudep lam donya,,
Goh abeh masa, keureuda goeb intat,,
Goh liang lahat, ta eh seulama,,

Takaloen nyata, fakta yang kuat,,
Malam ta taubat, uroe lam dosa,,
Ta roe ie mata, malam jumeu'at,,
Uroe aleuhat, maksiet seureuta,,

Meuho keuh makna, babah meu ucap,,
Diloen ka taubat, e ya Rabbana,,
Jeut keuh peunawa, nye meunan ubat,,
Goh puleh kurap, laen ka teuka,,

3 boeh cara, beuna ta ingat,,
Baroe nyan taubat, amponan dosa,,
Seun-seun sibanja, cuba peu sapat,,
Bak jeut keu alat, benteng lam dada,,

Peurtama phoen, wahe e sahbat,,
Beuna ta ingat, maksiet nyan dosa,,
Balah Rabbana, siksa saket that ,,
Bak nyan teumpat, hanle loen cuba,,

Teuma keu dua, siksa akhirat,,
Azeub leumpah that, ta teumeung rasa,,
Yang takeureuja, dosa meusapat,,
Hana soe intat, jak tuloeng gata,,

Yang akhe keu lhee, bacut tan mangat,,
Bacut tan ladzat, nikmat lam donya,,
Beu that ka jaya, sidroe peujabat,,
Tinggai bak teumpat, tamse istana,,

Meunyeo ta bandeng, uroe akhirat,,
Si teutep nikmat, bak sang seulama,,
Bayang syuruga, ta tem peurasat,,
Bek sang lam teumpat, tanyoe meudoda,,

Budiadari, tari ngoen sehat,,
Keunan meusapat, cantek jeulita,,
Bosan pih hana, beu that siat-at,,
Nyan sidum mangat, laen lom rasa,,

Ta galak donya, tamse na mangat,,
Meulumpoe teumpat, yg galak gata,,
'Oeh ban jaga, ka gadeoh ladzat,,
Hana hai sahbat, meu bacut sisa,,

Tamse lam donya, tapajoeh mangat,,
Hana meukeumat, meu bacut rasa,,
Bacut tan nyata, diteuka ladzat,,
Cuma toek teumpat, syethan peu doda,,

Salah ngeon dosa, hamba keuh teumpat,,
Cuma sidroe Dzat, yang Maha Sempurna,,
Tacoek peunawa, nye jeut keu ubat,,
Laju ta ralat, meunyeo tan beuna,,

Agam_sidroe at Kuta Raja

” Seuramoe Meukah”

Pengarang : Tgk Diyueb Bruek

Seuramoe meukah, goyang buet gempa
Deuri ngoen bara, meujungkat –jungkat
Nibak watee nyoe, seuramoe raya
Deuri ngoen bara, kajeut tareuhap

Tagantoe deuri, ka deungoen bara
Tampoeng yang hana, kajeut tapeudap
Nibak kalinyoe, Aceh Mulia
Kajuet saudara, tameuduek pakat

Kutika katroeh, kalhueh Pilkada
Kajuet saudara, tanyoe meusapat
Langkah beusahoe, beusapue haba
Aceh mulia, hoe taneuk intat

Seuramoe meukah, meuhoe taneuk ba
Tanoeh pusaka, indatu meuhat
Meunyoe kalinyoe, tanyoe saudara
Han sapue haba, ngoen sapue pakat

Aceh sang reule, Hancoe ban sira
Jadeh binasa, hanpue ta ingat
Nyan rumoh Aceh, sang tingai rungka
Abas ngoen Ala, Meunyoe jikarat

Yoh masa komplik, Aceh mulia
Abas ngoen Ala, hana tatupat
Lahe MoU Hilsinki, ngoen UUPA
Abas ngon Ala, Ma blien koh pusat

Aceh lhe sagoe, yue bagi tiga
Meunyoe Merdeka, lapan juet meuhat
Meutoh tapileh, antara dua
Wahe saudara, cuba ta ingat

Jinoe bersatu, dum anuek bangsa
Beusaban haba, beusapue pakat
Aceh lhe sagoe, meuhoe tanuek ba
Meuhoe hoe saudara, takeunuek intat

Teuma awak Gam, pih bekle haba
Ngoen ale neuba, cue tumuet meuhat
Dile yang bantu, Rakyat jeulata
Beuna takira, jasa raya that
Jinoe lam gayam, tapimpin bangsa
Tamat kuasa, beu ade that that
Meukon na rakyat, yang bantu gata
Ka ta eut puta, habeh rimueng kab

Oleh seubabnyan, wasiet bak gata
Rakyat jeulata, jasa ta ingat
Meubek peu mboeng droe, tajak peh dada
Peugah Panglima, ulon hebat that

Keu aneuk yatim, ngoen inoeng janda
Jasa Syuhada, beuna ta ingat
Bek langue darah, tajak peugah kha
Seujarah bangsa, mantoeng payang that

Meumada ohnoe, haba lon rika
Peu ingat bangsa, bek gadoh ingat
Meunyoe na narit, kadang roeh gasa
Peumeuah sigra, kadang juet ubat

(Tgk Diyueb Bruek/23/02/2013)

PEUSAN KEU DARA ATJEH

Pengarang : Agam Sidroe

Assalamu'alaikom, warahmatullah,,
Ummi deungoen yah, ATJEH mulia,,
Dusoen ngoen kuta, rata wilayah,,
Bandum daerah, sigeo loen sapa,,

Takaloen fakta, meumacam ulah,,
Ureung meu peugah, nibak media,,
Payah toep muka, ngoen situek teuplah,,
Seuramoe makkah, kana soe noda,,

Gata e dara, mahkota ceudah,,
Jaga meutuah, marwah bangsa,,
Beuna ta kira, jasa ma ngeon yah,,
Meu susah payah, gata geu jaga,,

Bek tajak noda, seuramoe makkah,,
Nanggroe yang meugah, bek ta peuhina,,
Bek tajak tuka, saboeh bu kulah,,
Deungoen bu tamah, yang tan meuharga,,

Bek lam paya, gata meu ilah,,
Bekle meuramah, dalam buet zina,,
Bek si umu masa, atra di jarah,,
Koen barang mudah, tuka beulanja,,

Kiban keu bala, dua ribee dua blah,,
Manteong seujarah, muat berita,,
Pakoen ta pinta, meunan lom ulah,,
Peu golom puah, bala yang kana,,

Na yang hana ma, sidroe lam ie bah,,
Na yang mate yah, buet ie raya ba,,
Saboeh keuluarga, manyet tan leumah,,
Manteong meutuah, meunan ta pinta,,

Iman ho taba, adoe meutuah,,
Kiban ngeon Allah, malee di gata,,
Pakoen lam dosa, aurat tapeuhah,,
Tajak tueng upah, peubloen mahkota,,

Pakoen tan harga, mahkota cuedah,,
Pakoen meutuah, tatem peu sewa,,
Siribe rupia, ta tuka tamah,,
Saboeh ie mirah, bebah goeb raba,,

Gisa meutuah, tawoe beu bagah,,
Yeoh manteong teuhah, golom troeh masa,,
Nyawoeng manteong na, amponan Allah,,
Dalam ibadah, taubat nasuha

Saturday, February 23, 2013

“ HUKOM AWAI RAYA PRUET DODOE MEUNIKAH “

Pengarang : Tgk Diyueb Bruek

Assalamu 'alaikom, Rakan meutuah
Saleum sipatah, lon bri keu gata
Hajat lon Rawi, na saboeh kisah
Dodoe meunikah, Awai pruet raya

Untuk peu ingat, poma ngoen Ayah
Beugoet neupapah, akan anuekda
Meuleupah rugoe, meuroeh buet salah
Dosa ngoen Allah. Akhirat Donya

Miseu umpama, lon tuan kisah
Dodoe meunikah, awai pruet raya
Neudeungoe Hukom, Supayah jeulah
Mangat bek salah, bek roeh keurija

Na sidroe inoeng, tungku meutuah
Sinyak Barensyah, geurasi nama
Na salah bacut, cut buluen peut blah
Sinyak Barensyah, ka jimeuzina

Hingga Raya pruet, cut buluen peut blah
Po ma ngoen Ayah, laju pareksa
Soe ngoen hai pocut, tapubuet salah
Jawueb Barensyah, ngoen abang baka

Ayah ngoen poma, laju coek langkah
Kanto syariah, Anuek ka geuba
Ohban sare troek, kanto syariah
Kawaket bagah, laju pareksa

Neuduek neupiyoeh, hai tungku Ayah
Ohna neulangkah, hai tungku Apa
Teuma neujawueb, laju le bagah
Lon jak peunikah, nyoepat Sidara

Sidara ulon, jipubuet salah
Sinyak Barensyah, ngoen sinyak Baka
Neutoep male lon, tungku meutuah
Tuloeng peunikah, nyoepat Sidara

Nyoehnyan di tungku, laju peunikah
Geusoem yang salah, peugah yang beuna
Meunyoe meunan buet, khuen Rasulullah
Juet tapeusalah, Alem ulama

Si Inoeng bunting, geutem peunikah
Bak donya salah, Akhirat dosa
Ulon boh mise, ngat timang surah
Dudoe ceumeucah, Awai seumula

Kajuet keukhuen goeb, rata daerah
Dudoe meunikah, awai pruet raya
Oh lahe anuek, Tungku meutuah
Kon anuek ayah, Geubangsa Ma

Meunyoe roeh inoeng, anuek tan nikah
Hanjuet wakilah, oleh Ayahnya
Hanjuet doeng Abi, keu wali nikah
Seubab ka salah, yoeh awai mula

Meunyoe roeh Agam, Anuek tan nikah
Saban sit surah, ngoen anuek dara
Bak akhe dudoe, oh mate Ayah
Dijih hana sah, jitueng pusaka

Meunan muphoem lon, tungku meutuah
Anuek tan nikah, sayang leupah na
Meumada ohnoe, hukom lon peugah
Meunyoe na salah, peubeutoi sigra

( Tgk Diyueb Bruek/Sulaiman.A.Gani)24/02/2013

Wednesday, February 20, 2013

KEUJADIAN WATEE NEUPEUTROEN SURAT AL-IKHLAS

Pengarang : Tgk Diyueb Bruek

Tacoek meukeusud , saboeh seujarah
Surat ikeulas ,mula neupeutroen
Bak wate nabi, teungoeh hijrah
Nanggroe madinah, keudeh hai kawoem

Sikafe kureh,lam kota makkah
Jimeusyawarah, mupakat langsoeng
Bak saboeh teumpat,darulnaduah
Sinan neupeugah, saboeh bale roem

Na abu jahai,silaknattellah
Yang buka babah, mula awai phoen
Meusoe yang ek poeh, nyan rasulullah
Kubri ngoen upah, meujuta liyun

Sireutoeh unta, yang bule mirah
Sireutoeh tamah, guda yang teuboen
Sireutoeh lamit,yang ceudah ceudah
Peut ploeh nam gagah, ,rakyat nanggroe roem

Jiseuot sidroe, nama sarakah
Jaroe dua blah, ji angkat langsoeng
Jikheun ek jipoeh, nyan rasulullah
Seudia upah, jinoe keu uloen

Ji ek coeng guda,pahlawan pantah
Pideung meu asah, jisak lam saroeng
Jiseutoet laju, nabi hijrah
Roet padang luah , laju ji aroeng

Wate karab troek, toe rasulullah
Pireuman allah, malaikat peutroen
Neutroen jibrail, laju le bagah
Kaneujak peugah, kalam ilahon

Wahe Muhammad, gata musibah
Bak bumoe allah, talake tuloeng
Nabi neukaloen, katroek sarakah
Nibak potollah, neulake tuloeng

Nabi meulake, kanibak Allah
Ka uet sarakah, wahe bumoe loen
Oh teuot guda, ji uet le bagah
Yoehnyan sarakah, jilake tuloeng
Nabi meulake, nibak potallah
Guda pih kaglah, hanle teupasoeng
Nabi beurangkat, laju hijrah
Yoehnyan sarakah, jilet le langsoeng

Wate karab troek, bak Rasulullah
Nabi peurintah, lage bunoe phoen
Oh pusat guda, ji uet le bagah
Yoehnyan sarakah, jiklik meu oeng oeng

Hanle loen bunuh, ya Rasulullah
Yang gata seumah, tapeugah bak loen
Meupue dari meuh, yang gata seumah
Tacuba peugah, beu beutoi beutoi

Jitroen coeng guda, laju sarakah
Bak Rasulullah, laju dijoeng joeng
Laju neubaca, di Rasulullah
Surat al iklas, neubaca langsoeng

Takheun le gata, Waya Muhammad
Tuhan hadharat, sit sidroe saja
Hana meu aneuk, tuhan hadharat
Gobnyan pih meuhat, bukoen aneukda

Allah taa`la, teumpat meuhadap
Puepue yang hajat,geutanyoe pinta
Hana ngoen bandeng, tuhan hadharat
Deungoen zat gobnyan, hana ngoen peusa

Meunan keuh neukheun, le Rasulullah
Yoehnyan sarakah, hate karihoen
Agama islam, jitamoeng bagah
Iteukeut beusah, geutanyoe bandum

Hadis saidina, meunan geupeugah
Dalam seujarah, loen coek hai kawoem
Nyan keujadian, yangka loen peugah
Surat al iklas, bek salah muphoem

( Tgk Diyueb Bruek/Sulaiman.A.Gani )
Tanggal 20/02/2013

~Beuna Seumbahyang~

Pengarang : Banta Indra

Assalamu'alaikum, Syedara meutuwah
Umi ngon Ayah, adoe deungon aA
Seu-ot saleum lon, laju beubagah
Ngon hate iklah, paksaan bekna

Dikrueng tumboe, ureung keumawe
Dikrueng tangse, ureung teumuba
Sira lon duek, cuba tuleh ca'e
Aleh keuh hase, hantoem biasa

Hudep lam donya, ingat e rakan
Perintah tuhan, bek sagai tuwoe
Beuna sabe, uroe ngon malam
Walau keadaan, saket that asoe

Oh katroh wate, tapeugleh badan
Laju sembahyang, Allah tapujoe
Beu that sibok,b ngon pekerjaan
Tapiyoh rijang, bekle laloe droe

Hana alasan,bak ureung agam
Keubah seumbhyang, pubut beu-oe
Asai katroh baleq ,warah pikiran
Hana gilaan, mabok ngon pungoe

Keupu guna,umu teuh panyang
Uroe ngon malam,ibadah hana
Gadoh meulaloe, syeitan peu-ayang
Maksit keu tuhan,tiep sabe masa

Watee mate,cuba tabayang kan
Malaikat datang,laju geu peutoe
Pulom yoh hudep,tuwoe seumbhyg
Kiban jawaban,tanyoe peusampoe

Wahe rakan, beudoh tataubat
Tapioh legat, bak but meupaloe
Yoh mantoeng umu, goh meukarat
Tapujoe hadharat, laju beusigra

Boh mamplam, cukop that masam
Boh mancang, meu reumbeut asoe
Meumama ohnoe, lon cie keumarang
Ateuh kesilapan, pemeu'ah keulon nyoe

“UREUNG YG GEU PEUREULUI DIMIYUB NAUNGAN ALLAH TA’ALA ‘OH UROE KIAMAT ”

Pengarang : Tgk Diyueb Bruek

Riwayat annas , sahbat janjongan
Neubri naungan, na lhe boh kawoem
Lam uroe tarek, reului tan sapat
Uroe kiamat , sangat that tutoeng

Malingkat yang na, sit naungan alllah
Dimiyueb arasy , wahe rakan lon
Tuhan peureului , lhe boh kawoem nyan
Yub arasy rahman , tuhan peupayoeng

Peureuta maphoen , ureueng hubungi
Deungon famili, saudara kawoem
Sabee geuhuboeng, silaturahmi
Hate keu mukmin , tuloeng meunuloeng

Deungoen saudara , hantom na pakee
Meujroeh jroeh sabe , meuntoeng untoeng
Ngoen kawoem lingka , jiran kerabat
Meu sikrak nariet , han toem meusinggoeng

Han toem na beungeh, saudara lingka
Pue loem saudara , yang saboeh kandoeng
Adak na bacut, meulanjut haba
Deungoen seugeura, geulakee ampoen

Meunyan keuh ureueng , geubri naungan
Ueub arasy rahman, tuhan peupayoeng
Sinoe di donya , tuhan bri payang
Umu ureueng nyan,tuhan neusamboeng

Umu geuh yang eit , tuhan neutamah
Raseuki mudah, limpah ilahon
Donya Akhirat, tuhan neubalah
Rahamt neutamah, tuhan peulindoeng

Meunyang keu dua , kawoem yang binoe
Yang mate lakoe wahee Rakan lon
Yang na geukeubah, aneuk yang yatim
hanasoe pimpin, hanasoe tuloeng

Hingga geudidik, ngon geupelara
Si yatim teuma, le poma kandoeng
Ngoen susah payah, bak geupeulara
Teutap lam saba, Khendak ilahon

Seureuta geuyue, bak keubajikan
Bak larang tuhan, han geubri langsoeng
Geuyue jak tuntut , eleumee tuhan
Haleu ngoen hareum , supaya mphoem

Geutheun meularat, geutanggoeng susah
Geu jak tueng upah , bak ureueng gampoeng
Untuk beulanja, keu aneuk lidah
Untuk nafakah, keu aneuk kandoeng

Uroe akhirat, tuhan neu balah
Di miyub arasy , tuhan peupayoeng
Yang keu lhee (3, peugoet makanan
Geumeuhoe yoeh nyan, wareh ngoen kawoem

Keu aneuk yatim, seureuta fakir
Makanan geubri, peujame langsoeng
Meunyan keuh ureueng , geubri naungan
Yueb arasy tuhan, ka geupeupayoeng
(Tgk diyueb bruek ) 16 Pebuari 2013

‎"Sireugam meulisan/manisan"

Pengarang : Agam Sidroe

Assalamu'alaikom, wahee e rakan,,
Kiban khabaran, nibak uroe nyoe,,
Kiban keuh nanggroe, manteong iseulam,,
Atau meu uram, ho laen bagoe,,

Rakyat lam nanggroe, meubagoe macam,,
Pajoeh meulisan, seunang that asoe,,
Aduen ngoen adoe, ka saboeh reugam,,
Seunang hana ban, ngoen pruet pih ka troe,,

Pike keu meuntroe, ade hana ban,,
Bagi meulisan, ka rata sagoe,,
Kadang meukeudroe, geu rasa pih han,,
Meunan pikiran, rakyat lam sagoe,,

Padahai bagoe, ka laen macam,,
Angen khabarkan, koen meunan asoe,,
Tuan meuntroe, keunoeng bagian,,
Geu tunggeng manisan, tinggai lam sagoe,,

Ka dari Raja, geujoek meulisan,,
Lam t'em geu paban, peunoe ngoen asoe,,
Aduen ngoen adoe, tuka pikeran,,
Pakoen sireugam, tareumpoek tanyoe,,

Masa meugantoe, uroe ngoen malam,,
Hana mangat peurasaan, rakyat lam nanggroe,,
Nibak si uroe, dijak treuk keunan,,
Bak persinggahan, Raja lam nanggroe,,

Rupajih meunoe, sampoe penelitian,,
Saboh t'em meulisan, ka beda jaroe,,
Meugantoe uroe, meubagoe macam,,
Saboeh t'em meulisan, sireugam sampoe,,

Ka dari raja, peunoeh hana ban,,
Troeh bak bawahan, lam ploek dipasoe,,
Tinggai lam sagoe, meuntroe pikeran,,
Keu hiasan, tugah si uroe,,

Meunan keuh bagoe, asoe laksanakan,,
Koen keuwajiban, rakyat geu pakoe,,
Yatim lam sagoe, sapeu jih pih tan,,
Sendok meulisan, han toem jirasa,,

Agam_sidroe at kuta raja.

"SIFEUT-SIFEUT TEUCELA (HINA)"

Pengarang : Agam Sidroe

Deungoen beureukat, Asma Allah,,
Keu Rasulullah, Rahmat seujahtra,,
Mandum keuluarga, seureuta sahabah,,
Peunyamboeng dakwah, 'alim Ulama,,

Loen ilah kata, bak jeut mauidhah,,
Bak jeut faedah, meusoe yang baca,,
Seun-seun sibanja, loen cuba peugah,,
Sifeut yang reundah, leupah that hina,,

☑ Hasud yang keu phoen, keu goeb ta ilah,,
Keu goeb ta peugah, yang hana-hana,,
Tamse ta tipek, nyan ek bak babah,,
Tapi han leumah, dikeu manusia

☑ Iri hate keu dua, wahe e sahbah,,
Hina meuleumpah, peunyaket rasa,,
Bacut goeb kaya, nikmat meulimpah,,
Tanyoe ka sosah, mirah ngoen mata

☑ Dengki keu lhee, hate hana pah,,
Ho yang ta langkah, baten teuseksa,,
Hana peukara, peuget masalah,,
Yang goeb beu sosah, hudep lam donya,,

☑ Sombong yang keu peut, ta bleut han leumah,,
Bak sang goeb reundah, ka dikeu mata,,
Bak sang goeb hina, tanyoe yang meugah,,
Sia ibadah, asoe nuraka,,

☑ Mengadu domba yang limoeng, tapoeh beurakah,,
Useuha ta ilah, prang saudara,,
Yang koen fakta, bukeuti tapeugah,,
Goeb meuroe darah, ta ilah cara,,

☑ Merampok keu nam, cukoep that parah,,
Habeh dijarah, bubena harta,,
Haq syedara, milek dipeugah,,
Mandum di olah, asai rupia,,

☑ pungoe pangkat keu tujoeh, awoeh lam ie bah,,
Buhuek meureupah, meugah bak hamba,,
Rumoeh yang raya, inoeng yang ceudah,,
Umu ka leupah, bak sang hi muda,,

☑ Teuma keulapan, simban lam laoet luah,,
Hana le leumah, meu ujoeng mata,,
Cinta keu donya, tuwoe keu Allah,,
Dalam ibadah, yang leumah harta,,

☑ Tamak sikureung, han puah-puah,,
Hanloet le nafah, manteong meuraba,,
Katroeh u punca, tapi han leumah,,
Manteong dikisah, sapeu loem tanna,,

☑ Jeumoeh keu siploeh, lagee bue reupah,,
Gabuek meuleumpah, bak olah cara,,
Meuheut u punca, teungoeh han leupah,,
Sabe bak rendah, meugisa-gisa,,

Etnoe meumada, haba loen kisah,,
Dipat na salah, meu'ah loen pinta,,
Bandum na dosa, hamba meusalah,,
Toek sidroe Allah, yang Maha beuna,,

Agam_sidroe at kuta raja

”TASYIDIT DALAM FATIHAH”

PENGARANG : Tgk Diyueb Bruek

ALHAMDULILLAH , LOEN PUJOE ALLAH
YANG MAHA MURAH, LAGI KUASA
TUJOEH BOH AYAT, SURAT FATIHAH
TASYIDIT JIH 14, WAHE SAUDARA

PEUREUTA MAPHOEN, NIBAK ”ALLAHI”
NIBAK ”ARRAHMANI” ,MEUNYANG KEUDUA
TEUMA YANG KEU LHEE, NIBAK ”ARRAHIMI”
BAK NAMA RABBI , AYAT PERTAMA

TEUMA YANG KEU PEUT, NIBAK ” LILLAHI”
DAN NIBAK ”RABBI”, L IMOENG BOEH KANA
TEUMA YANG KEUNAM , BAK ” ARRAHMANI”
NIBAK ”ARRAHIMI”, TUJOH BOH KANA

TEUMA KEU LAPAN, NIBAK ”YAUMIDDIN”
SIKUREUENG NYAKIN , . NIBAK ”IYYAKA”
”WA IYYAKA NASTA’IN ”MEUYANG KEU SIPLOEH
SIBLAH TUNGKU BOEH, NI BAK ”NASSIRATA”

TEUMA OH LHEUH NYAN, ”SIRATALLAZI”
JUMLAH JADI , DUA BLAH KANA
NIBAK ”WALAZZALIN”, WAHE TUNGKU BOEH
SINAN MEUGAMPOEH, TASYIDIT DUA

NYOE PAT DUA BOEH, BUNOE DUA BLAH
OH TAJEUMEULAH , MEUPEUT BLAH BOEH KANA
YANG HAN MASOEK, DALAM FATIIHAH
TJUOEH BOEH (7) HARAH , WAHE SAUDARA

JEUT HANA MASOEK, DALAM FATIHAH
TUJOEH BOH HARAH, NAMA NURAKA
YANG PHOEN HARAH” THA”DUA HARAH”SHIN”
KEU LHEE TANYAKIN, GEUKHEUN HARAH ”KHA”

KEUPEUT HARAH” ZAY”, LIMOENG HARAH ”THAW”
YANG KEUNAN LAZIEM, GEUKHEUN HARAH ”JIM
TUJOEH HARAH”FA” , TUNGKU MEUTUAH
HABEH LON PEUGAH, KA SEUMPURNA

RAHSIA Surah Al-Fatihah
HIKMAH AL-FATIHAH
Al-fatihah (pembukaan)

Surah Ke 1 : 7 ayat
1. Dengan menyebut nama Allah Yang Maha Pemurah lagi Maha Penyayang.
2. Segala puji bagi Allah, Tuhan semesta alam.
3. Maha Pemurah lagi Maha Penyayang.
4. Yang menguasai hari pembalasan.
5. Hanya kepada Engkaulah kami menyembah dan hanya kepada Engkaulah kami mohon pertolongan.
6. Tunjuklah kami jalan yang lurus.
7. (iaitu) jalan orang-orang yang telah Engkau anugerahkan nikmat kepada mereka; bukan (jalan) mereka yang dimurkai (Yahudi) dan bukan pula jalan mereka yang sesat.
KEHEBATAN AL-FATIHAH
• RUKUN BAGI IBADAT SOLAT
Sabda Rasul: “tidak ada solat bagi orang yang tidak membacakan Al-Fatihah di dalamnya (solatnya)”. – dari Anas bin Malik r.a
• PENYEMBUH PENYAKIT
Adbullah bin abas r.a. telah berkata, : Pada suatu hari, Husain bin Ali iaitu cucunda Rasulullah telah mengalami satu kesakitan yang menyebabkan nabi berdukacita. Lalu nabi mengambil satu bejana yang berisi air dan terus membaca surah Al-Fatihah sebanyak 40 kali”.
• SURAH TERISTIMEWA UNTUK NABI MUHAMMAD S.A.W.
“Sesungguhnya Allah s.w.t. telah menurunkan kepadaku sebuah surah (Al-Fatihah) yang tidak diturunkanNya kepada sesiapa pun daripada nabi-nabi dan rasul-rasul sebelumku”. – riwayat Ibnu Abbas
• SETARAF DENGAN DUA PERTIGA AL-QURAN
• SURAH TERAGUNG DI ANTARA SURAH-SURAH AL-QURAN
• SURAH YANG SECARA LANGSUNG MEMBENTUK KOMUNIKASI AGUNG ANTARA MAKHLUK DAN PENCIPTA ALAM.
• TIADA PERSAMAAN DALAM KITAB TAURAT, INJIL, ZABUR DAN AL-QURAN.

KOD METAMATIKA AL-FATIHAH
AYAT JUMLAH HURUF JUMLAH NILAI HURUF
1 19 1 786 21 3
2 18 9 582 15 6
3 12 3 618 15 6
4 11 2 241 7 7
5 19 1 836 17 8
6 19 1 1073 11 2
7 44 8 6010 7 7
142 7 10146 12 3
YANG TERSURAT & TERSIRAT…
1. Al-Fatihah terdiri dari 7 ayat. Diturunkan di Mekah, sebelum Rasul berhijrah. Surah yang PERTAMA turun dengan kandungannya yang melengkapi satu surah.
2. Al-Fatihah terdiri dari 142 huruf (1+4+2=7). Dan Al-Fatihah terbina dari 21 (3X7) huruf-huruf yang berbeza-beza. Ada 7 huruf yang tiada dalam surah ini iaitu:fa , jim, shin, tha, thaw, kha dan zay.
3. Ayat ke 4 adalah ayat yang ditengah-tengah pada surah ini, jumlah nilai huruf pada ayat ini adalah 241 @ 2+4+1=7.
4. Ayat akhir iaitu ayat 7 memiliki jumlah nilai huruf 6010 @ 6+0+1+0=7.
5. Huruf Zay yang memiliki nilai huruf 7 tidak muncul dalam surah ini.
6. Huruf Dzal yang memiliki nilai huruf 700 muncul sebagai huruf ke 7 dalam ayat yang ke 7.
7. Huruf Aliff adalah huruf yang paling banyak muncul dalam surah ini iaitu 25 (2+5=7) kali.
8. Surah ini dimulai dengan huruf BA (nilai huruf 2) pada ayat 1dan diakhiri dengan huruf NUN (nilai huruf 50) pada ayat 7. Maka 2+50=52 @ 7.
9. Al-Fatihah merupakan Surah Pertama di dalam Al-Quran (Pembuka Kitab). ‘Bismillahirrahmanirrahim’ merupakan ayat 1 dan terbina dengan susunan 19 huruf (1+9=10 = 1 @ ayat pertama).
10. Jumlah keseluruhan huruf ada 142 manakala jumlah nilainya adalah 10146, jika dihitung kesemuanya 1+4+2+1+0+1+4+6=19 @ 1 -Surah Pertama.
11. Selain ayat 1, pada ayat 5 & 6 bilangan huruf pada ayat-ayat tersebut juga adalah 19 huruf.
12. Jumlah nilai huruf keseluruhan surah BOLEH dibahagi dengan 19 iaitu 10146÷19=534 @ 5+3+4=12 = 3.
13. Ayat 1 dalam surah ini memiliki jumlah nilai huruf 786 @ 7+8+6=21= 3.
14. Jumlah nilai huruf keseluruhan surah adalah 10146 @ 1+0+1+4+6=12=3.
15. Ayat yang ke 3 terdiri daripada 12 huruf @ 1+2=3.
16. Huruf JIM yang memiliki nilai huruf 3 dan huruf SYIIN yang memiliki nilai huruf 300 tidak muncul dalam surah ini.
17. Huruf LAM yang memiliki nilai huruf 30 muncul 22 kali dalam surah ini. Maka 30 X 22 = 660 @ 6+6+0=12 = 3.
18. Nama “Al-Fatihah” terdiri dari huruf Aliff, Lam, Fa, Aliff, Ta, Haa dan HA memiliki nilai huruf 1+30+80+1+400+8+5=525 @ 5+2+5=12 = 3.
19. Terdapat 3 fasa penceritaan dalam Surah ini yang memiliki 7 ayat. 3 ayat pertama untuk Allah, 3 ayat akhir untuk manusia dan 1 ayat (yang di tengah) untuk Allah dan manusia. Ini dinyatakan dalam sebuah hadis Qudsi riwayat AlTabrani yang bermaksud:
“Wahai Bani Adam!…Aku telah menurunkan kepada kamu 7 ayat. 3 daripadanya untuk-KU. 3 lagi untukmu. Sedangkan 1 untuk kita

Kumpulan BEK dari posting Group FB Panah Aceh


http://www.facebook.com/groups/PANAH.Aceh/

Bek si buta tayuë béut kitab
Bek si bangsat tayuë meu dô'a
Bek si Sulet tayuë meukat
Bek si Kaplat tayuë jaga si Dara

Bek peukeupok padee tan asoe
Bek boh tajoe bak manoh patah
Bek talaboh pukat tan taloe
Bek meulampo bak buloh beukah

Bek meutudong ngon on jeulatang
Bek boeh tumpang bak tanoh leuhob
Bek meukawen ngon inong jalang
Bek tapulang peucrah atra gob

Bek tameu’ue keubeue pok taloe
Bek peuceudah droe bak ureueng buta
Bek meuca’e nibak ureung kloe
Bek peu buheu droe bak aneuk paya

Bek talet gajah ka u gle
Bek tiek kawe dalam ie tuba
Bek tob galah bak tanoh cayee
Bak kayee mate bek tatak tanda

Bak rang patah bek tapeh binteh
Bak bubong tireh bek taleung tika
Bak buet pakat hatee beukaleh
Bek arang habeh busoe han pija

Bek pike naleung jeut keu pade
Bek pike rante sbe meuputa
Bek pike udep ka tan le mate
Bek pike hate bndum seutia

Bek pike cnta keu ubt hate
Bek pike bude cma snjata
Bek pike harta sabe tan reule
Bek pike pike meunye tan guna

Bek tayue jaga manoek bak musang
Bek tayue kang-kang lueng bak guda
Bek tayue peusing eungkot bak bubrang
Bek tayue jeumeurang meutan na behtra

Bek tayue let bui meunyoe tan pawang
Bek yu maen bhan bak nyang patah pha
Bek bak mie tayue jaga panggang
Bek ta meungarang nyang hana-hana

HABA ANEUK MIET BIRAH

Pengarang : Agam Sidroe

Assalamu'alaikom, kaoem meutuah,,
Ummi ngoen ayah, mandum syehdara,,
Saleum mulia, dalam group PANAH,,
Rangkang keuneubah, haba meuguna,,

Ureung lam donya, ka apoeh apah,,
Ka deuk deungoen grah, dalam uroe kha,,
Ka beukah ija, aurat deuh leumah,,
Luweu ka beukah, seumbah Rabbana,,

Keu raja donya, takoet meuleumpah,,
Raja akhirah, meubacut tan rasa,,
Ngoen sikilo saka, gadeoh maruah,,
Geutem jak peugah, salah yang beuna,,

Ta bleut syedara, mata ta peuhah,,
Mata ka mirah, gadoeh lam tika,,
Pane na cara, hase meulimpah,,
Tanyoe ngoen Allah, jeu oeh lagoe na,,

Bukeuti nyata, fakta ta peugah,,
Mandum ka leumah, koen rekayasa,,
Gampoeng ngoen kuta, peugah syari'ah,,
Cuma bak babah, bak buet ka hana,,

Meugantoe masa, cara di olah,,
Tanyoe dijajah, bideung Agama,,
Mandum ka sirna, seuramoe makkah,,
Islam yang meugah, toek tinggai nama,,

Kiban keuh hukoem, kaoem meusumpah,,
Al-Qur'an ta ilah, peukuat fakta,,
Dalam keureuja, ka laen ulah,,
Ka peuget tingkah, meureupah harta,,

Ta ucap kata, ta'at keu Allah,,
Keu Rasulullah, seupeunoeh cinta,,
Takaloen fakta, ka beda arah,,
Yang na syit leumah, sabe lam dusta,,

Bak meututoe, aulia leupah,,
Meu insyaAllah, bak peugah haba,,
Watee keureuja, harta ta reupah,,
Dum hamba Allah, ta tem ilanya,,

Taroe ie mata, ka dikeu Allah,,
Bak sang ka teuhah, hate teubuka,,
Palsu beulaka, ie mata beukah,,
Bak buet geuteugah, sinan keureja,,

Kiban singoeh, uroe akhirah,,
Mada ngoen peugah, loen sidroe raja,,
Aneuk aulia, dithee that meugah,,
Yang po wilayah, sagoe dunia,,

Atau koen fakta, uroe akhirah,,
Haba peuneugah, sidroe ulama,,
Iman KAFARA, nye nyan ta peugah,,
Ka haleu darah, lagee bui rimba,,

Hudep lam donya, mandum na salah,,
Bek meutuka arah, taubat nasuha,,
Do'a ta pinta, bak sidroe Allah,,
Bekle meu ilah, bak buet meudosa,,

Hana treb masa, pangkat ta sanggah,,
Rumoeh yang meugah, mandum nyan fana,,
Intan permata, dara yang ceudah,,
Cuma amanah, keu tanyoe hamba,,

Haba lam rika, kata loen ilah,,
Dipat na salah, meu'ah loen pinta,,
Maklum ban teuka, aneuk miet birah,,
Ban peuhah babah, lam bhah agama,,

Agam Sidroe at Kuta Raja

“ TEUTOP NGOEN DUROE, ASOE JEUT TAPLAH”

Pengarang : Tgk Diyueb Bruek

Deungoen Bismillah, lon puphoen kisah
Lon pujoe Allah, ilahon khalet
Sigala pujoe, muwoe keu Allah
Yang ka neulimpah, mangat ngoen saket

Seulawuet saleum, keu Rasulullah
Yang ba risalah, sunat ngoen wajeb
Nabi Muhammad, Utusan Allah
Sabda neukeubah, peudoman hudep

Samboet saleum lon, rakan meutuah
Hajat lon peugah, dua lhe baet
Nyoe hadih maja, hajat lon kisah
Beugoet neukeubah, Narit meusaket

Peudoman Hudep, hajat lon peugah
Lam bumoe Allah, Bek juet Peunyaket
Adak Tamarit, bek leupah leupah
Peulara lidah, hate gob saket

Leubeh bak Peudueng, tajam lom lidah
Ban rimueng juah, haba bicah phet
Meuprang ngoen pake, bak gara lidah
Bak salah peugah, kajuet peunyaket

Teutop ngoen duroe, asoe jeut taplah,,
Teutop ngoen babah, leupah that saket,,
Seubab nariet, teubiet lam babah,,
Meunyoe ka leupah, han ek le talet,,

Wahe syedara, bek leupah peugah
Yang le beurakah, kayem that sulet
Dak tameututoe, bek leupah-leupah
Peulara lidah, yoeh goeh meusingklet

Nuraka Syuruga, punca bak lidah
Nyan Dosa Ghibah, fahla meurateb
Dosa ngoen fahla, sinan bak lidah
Beugoet neupapah, bek juet peunyaket

Ohnoe sikada, haba lon peugah
Keu hamba Allah, peudoman hudep
Teuseurah bak droe, tajaga lidah
Tatueng faedah, mangat ngoen saket

( Tgk Diyueb Bruek/Sulaiman.A.Gani)17/02/2013

Saturday, February 16, 2013

~MARTABAT NAFSU~

Pengarang : Akhbar Al-Mutawassila

Assalammu'alaikum, saleum ulon bri
Keu bamdum akhi, tuha ngön muda
Pujoe keu Allah, seulaweuet keu Nabi
Nyang bri raseuki, geutanyoe hamba

Nibak uroe nyoe, ya Allah neubri
Ulon neuk rawi, saboh mustika
Martabat Nafsu, judul U lon bri
Wahee ee akhi, neutulong baca

Nafsu yang keuphon, Ulon peuturi
MANGAT BEK sangsi, Amarah nama
Nafsu amarah, mangat tatuti
Tan jipadoli, hukom salah ngoen beuna

Peuturot nafsu , han dikendali
Ku'Eh dan dengki, dum manusia
Teuma kedua, wahee E Akhi
Lawwamah lagi , guesuebot nama

Nafsu Lawwamah, ulon peuturi
Hukom jituri, meutuka meutuka
Sifeut Amarah, kueh ngon benci
Sigoe-goe akhi, mantoeng jitueka

Teuma nyang keu lhee, Mulhimah lagi
duengoe lon rawi, suen suen sibanja
Dalam nafsu nyan, kana di Zikri
Latihan jibri, Riyadhah kana

Teuma dinafsu, kadang ingkari
sinan kendali, geutanyoe beuna ,
Nafsu nyang keu peut, Muthma innah ismi
Ulon peuturi, bandum keu gata

Meunyan keuh Nafsu , ridha ilahi
Nyan Al-Jannati, teumpat digata
Hudep ureung nyan, ka geuridhai
Meunan hai Akhi, kalam Rabbana

Pakhok lon gatoe, ngat ragoe rawi
Ngat mangat bunyi, wate tabaca
Nafsu Radhiah, keu limoeng lagi
Meunan hai akhi, surah ‘ulama

Tingkat Radhiah, tatueme payah
Tuebit lam babah , zikir tiep masa
jinoe Geutanyoe, mohon bak Allah
Zikir tapapah, sabe tiep masa

Teuma nyang keunam, Nafsu Mardhiah
Ka Baqa illah, deungon Rabbana
Didalam jiwa, hana lee gundah
Keupada Allah, hana lee Tansa

Tingkat Keu tujoeh , Nafsu kamilah
Na chiet yang peugah, kamaliah nama
Dalam nafsu nyoe, ilham Syahadah
kurnia Allah, hak istimewa

Meuka kueh habeh, nafsu lon peugah
Pat-pat nyan salah, peumeu'ah sigra
Harap neu maklom, syedara meutuah
Nyang ulon peugah, golom sempurna

Wednesday, February 13, 2013

Ca-E Peu Eh Aneuk


Allahu Allah, Allahu Rabbon
Allah qadiron, Maha Kuasa
Masa cut Nabi, didalam ayon

Rahmat neupeutron, uleh Ilahi

Doda idi, putik sukon
Di dalam on, jroh meusundi
Ka-eh hai Nyak, dalam ayon
Ayah geutron, mita raseuki

Jak kuayon, putik rambot
Aneuk lam limboet, beurijang raya
Beu Tuhan bri, umu lanjot
Beuna taturoet, kheun Ulama

Allah hai do, doda idi
Boh campli, beurijuek seuba
Beuna umu, Tuhan neubri
Boh hate Di, beurijang raya

Lom geukheun do, doda idang
Bancalang, dilaot raya
Beuta gaseh, Ulee balang
Adat naprang, nasoe sangga

Nyoe kukheun do, doda idi
Mirah Pati, jeh dipara
Wahe aneuk, nyang johari
Beu Tuhan bri, rijang raya

Allah haido, doda idang
Seulayang blang, kaputoh Taloe
Poma geutron, jak poh linggang
Ka-eh rijang, nak mangat asoe

Ijo-ijo, naleueng samboe
Nyang goet ijoe, naleueng sira
Bek kamoe lee, hai aneuk oe
Nyoe ku kheun doe, jak ku doda

Ie dilaot, puteh ijoe
Peurahoe, umbak cencala
Gata hai Nyak, ulon dodo
Aneuk lintoe, ayeuem mata Ma

¤ 7 Perkahra Gangguan Syaithan dalam Seumbahyang ¤

Pengarang : Akhbar Al-Mutawassila

Assalamu'alaikum, ayyuhal ikhwan
Hadza Yauman, gata peuhaba
Banmandum pujoe, keu sidroe Tuhan
Keu Nabi khatam, Rahmat Sijahtra

Sabee uroe, meugantoe malam
Tilek Tuhan, ateuh hambaNya
Nibak uroe nyoe, wahee e rakan
Haba peringatan, didalam banja

Hadist Turmizi, didalam nazam
Nabi meukalam, keutanyoe dumna
Dalam shalat, na 7 gangguan
Yang dari syaithan, peukahru hamba

Jiteubit darah, wahee e taulan
Dalam hidong sinan, nyang peureutama
Nyang kedua, sambong hadis nyan
Teungeut mata, wahee syedara

Nyang keu-3, weh weuh pikiran
Raka'at bilangan, ladoem chiet lupa
Meu seumeungeup, keu-4 hai ikhwan
Garoe badan, keu-5 teuma

Paleng muka, nyan yang keu nam (6)
Ceumeucu pandang, dalam mushalla
Nyang keu-7, peunutop khabaran
Jeut permainan, ngon saboh benda

Lon pada ohnoe, rika lam nazam
Baci perhatikan, buhu lam banja
Pat na salah, atau kekurangan
Peumeu'ah rijang, Akhbar Al-Mutawassila

Lhokseumawe, 13 Februari 2013

Hadist :
"7 Perkara didalam shalat adalah dari gangguan syaithan ; keluar darah dari hidung, mengantuk, was-was, menguap, manggaruk, berpaling muka & bermain-main dengan sesuatu"
(HR. Turmidzi)

“ LIWA UL-HAMDI “

Pengarang : Tgk Diyueb Bruek

Deungon Bisminlah, Lon Puphoen Kalam
Lon pujoe Tuhan, Khalikul Ibad
Sigala pujoe, meuwoe keu Tuhan
Yang peujuet Alam, Bandum lat batat

Seulawuet saleum, akan janjongan.
Pang Ule Alam, Nabi Muhammad
Meunyan keu Nabi, Rasul Khataman
Uroe komdian, yang bri syafaat

Lhuehnyan saleum lon, suson karangan
Keu bandum Rakan, deungan Sahabat
Bandum Anggota, Dalam Grup Nazam
Inoeng ngoen Agam, Rata juet teumpat

Izin lon lake, meuribe kalam
Hajat lon karang, Payoeng Muhammad
Liwa Ul-Hamdi, lon keunuek peutrang
Payoeng janjongan, Uroe Akhirat

Teumpat berlindoeng, Urueng Meu iman
Meusapat keunan, umat Muhammad
Yang tan seulawuet, akan janjongan
Meuhanjuet keunan, Sajan Muhammad

Uroe that tutoeng, Nibak watenyan
Mayang Sijeungkai, hanjuet ta ingat
Laen tan sapat, yang na naungan
Malingkan sinan, deungan Muhammad

Liwa ul-Hamdi, payoeng janjongan
Luah hanaban, Meutingkat tingkat
Ubena Nabi, Meusapat keunan
Sejak bak Adam, sampoe Muhammah

Dum Malaikat, meusapat keunan
Sajan janjongan, Nabi Muhammad
Nyan keuh Bendera, panji Muhammad
Wate beurangkat, meunuju Mizan

( Tgk Diyueb Bruek/Sulaiman.A.Gani)13/02/2013

Monday, February 11, 2013

“ACEH KA GADOEH HAROEM”

Pengarang : Tgk Diyueb Bruek
ASSALAMMU'ALAIKOEM ,WARAHMATULLAH
ALHAMDULILLAH, PUJOE RABBANA
SEULAWEUT SALEUM, KEU RASULULLAH
YANG BA RISALAH ,BAN SIGOEM DONYA

DEUNGOEN IZIN PO, KUDRAH IRADAH
PIKIRAN TEUHAH , HABA LOEN RIKA
BERKAT MUJIZAT, DI RASULULLAH
ACEH MEUTUAH, LOEN KEU NEUK RIKA

ACEH MEUCUHU, MASA KOENG ADAT
YOEH MASA KUAT, QANUN NGOEN REUSAM
YOEH MASA RAJA, MANTOENG BERDAULAT
ULAMA MEUHAT, RAYEUK THAT PEURAN

PO TEUMEUREUHOM , ISKANDAR MUDA
YANG MAT KUASA, ACEH JAYA PHOEN
NANGGROE MEU ADAT, KUAT AGAMA
KAWOEM ULAMA, BANDUM YANG SUSOEN

YANG ATOE NANGGROE, BAK SIDROE RAJA
KAWOEM ULAMA , BANDUM GEUHIMPOEN
RAYEUK THAT PEURAN, KAWOEM ULAMA
SAMA NGOEN RAJA , GEUPIMPIN KAWOEM

MEUCUHU ACEH, KUAT AGAMA
KAWOEM ULAMA, PEUDOENG AWAI PHOEN
NA KADHI AGOENG, SIDROE ULAMA
YANG BRI FATWA, SYARIAT HUKOEM

ACEH MEUCUHU, SEURAMOE MEKKAH
DILE KOEN MEUGAH, CUKOEP THAT HAROEM
CUKOEP MEUCUHU, LAGI NGOEN MEUGAH
ACEH DAERAH, LE THAT GOEB KAGOEM

ISKANDAR MUDA, YANG MAT PEURINTAH
BUET TUNGKU SYIAH, PEU PUTOEH HUKOEM
TEUNGKU NGOEN RAJA, ADE MEULEUPAH
ACEH NYOE MEUGAH, SAMPOE NANGGROE ROEM

SEULAMA TANLE, PEURAN ULAMA
ACEH MULIA, KA GADOEH HAROEM
KOEN LAGE DILE, PARA UMARA
DEUNGOEN ULAMA, SABE GEUDUEK GLOENG

SABE MUFAKAT , AKHIRAT DONYA
NGOEN SAMA SAMA, GEUPIMPIN KAWOEM
MISEU LOEN PEUGAH, SABOEH UMPAMA
MEUNOE BAN HABA, NEUCUBA PUPHOEM

MEUROEK DEUNGOEN TOI, KEU ASOE NANGGROE
RUHUENG NGOEN BAJOE, KEU PEUTUA
TAMEH NGOEN PUTEING, KEU ULE BALANG
BEUNEU NGOEN ADANG, KEU ULAMA

MEUNYOE MEUSAPAT, BAN PEUT URUENGNYAN
CUKOEP THAT TIMANG, TEUDOENG NEURACA
ADAT NGOEN HUKOEM, QANUN NGOEN REUSAM
NYAN PIH PEUT MACAM, ATURAN KANA

GEUBOEH ADAT, GEUNANTOE PAGEU
NGAT BEK JILINGKEU, SIAPA SAJA
GEUBOEH HUKOEM, KEU AKIDAH
MANGAT BEK SALAH, BAK AGAMA

GEUBOEH REUSAM, MANGAT MEUKEUNOENG
AGAM NGOEN INOENG, MANGAT BEDA
GEUBOEH NGOEN QANUN, SUPAYA JROEH
NGAT BEK MEUROEH ROEH, DUM PEUKARA

MEUKOENG ADAT , SEULAMAT HUKOEM
REUSAM QANUN, TEUPEULIHARA
RAKYAT SEUNANG , AMAN GAMPOENG
HAN MEUROEN ROEN, JEUT PEUKARA

MEUNYOE MEUSAPAT, ADAT NGOEN HUKOEM
MISEU NYAWOENG , NGOEN ANGGOTA
UMPAMA REUSAM, DEUNGOEN QANUN
MISEU REUBEUNG, DEUNGOEN TIKA

YOEH MASA JAMEUN, MEUNAN HAI KAWOEM
ACEH GEUSUSOEN, ULAMA UMARA
GEUPEUDOENG ADAT, SYARIAT HUKOEM
REUSAM NGOEN QANUN, GEUYUE PEULARA

SUPAYA AMAN, RAKYAT LAM GAMPOENG
HANA MEU ROEN ROEN, BANDUM PEUKARA
KANA ATURAN , MEUNUROET HUKOEM
MAKA LAM GAMPOENG, AMAN SENTOSA

JINOE ACEHNYOE, HANALE HAROEM
SEUBAB HAI KAWOEM, ADE HANLE NA
KA GADOEH ADAT, REUSAM NGOEN HUKOEM
KA MEUKOEH REUBOENG, KA PUTOEH KAJA

JINOE BERSATU, BANDUM HAI KAWOEM
ACEH TAJUNJOENG, TUAH YANG KANA
BANDUM ULAMA, JINOE NEUHIMPOEN
BEUSABOEH PAYOENG, DEUNGOEN UMARA

BEU SAPUE PAKAT, NEUDUEK SABOEH GLOENG
PEU PUTOEH HUKOEM , KEU RAKYAT DUMNA
HUKOEM BEU ADE , DIGLE NGOEN GAMPOENG
TUHAN NEULINDOENG, PEUTROEN SEUJAHTRA

BALA YANG KA-KA, HANLE NEUPEUTROEN
ALLAH NEULINDOENG, ACEH MULIA
ACEH LHE SAGOE, TUHAN NEULINDOENG
HANLE LAM GAMPOENG , JEUT PRANG SAUDARA

PUTIEK BOEH SUKOEN, JANTOENG BOEH PISANG
RINCOENG NGOEN PARANG, PUSAKA MAJA
MEUMADA OHNOE, HABA LON KARANG
SINGOEH LAEN JAN, TASAMBOENG RIKA

Haba MUSA ngon ALLAH

Pengarang : Akhbar Al-Mutawassila

 Lon pujoe Tuhan, 'Azza Wajalla
Raja Diraja, sabee tiep uroe
Seulaweut Saleum, ateuh sayyidina
Rasul Musthafa, Pang Ulee geutanyoe

Sira meuduek-duek, lon cuba rika
Keu wareh lingka, rakan sinaroe
Ibnu Hibban, nyang rawi haba
Al-Hakim juga, sama hareutoe

Kalam Nabi Musa, ngon Allah Ta'ala
Hadist baginda, neucuba deungoe
Musa meukalam, bak saboh masa
Meunoe neukata, lakee nibak poe

Wahee Allah, nyang Maha Kuasa
Neubri Kalimat Mulia, keupada kamoe
Untuk meuzikir, seureuta meudo'a
Nyang hebat lagoina, langsong troek sampoe

Neuseu'ot lee Allah, keupada Musa
"La ilaha illallah" saja, cuba tahiroe
Teuma Musa, laju berkata
Kalee Ya Ta'ala, gob kheun lam nanggroe

Wahee Musa, beutatupu lee gata
Andai langet & donya, beuserta asoe
Tapuduek timbangan, tatimang sigra
Niscaya neuraca, brat kalimah bunoe

Baci takaji, wareh syedara
Makna lam haba, cuba neuproe
Hebat sunggoh, kalimah mulia
Beukayem tabaca, oleh geutanyoe

Meubek ta-anggap, biasa saja
Beu-oe tabaca, malam ngon uroe
Tapada 'Oh noe, nazam lon rika
Akhbar Al-Mutawassila, mantong meureunoe

Lhokseumawe, 3 Januari 2013

“ Beudoeh Ibadat “

Pengarang  : Tgk Diyueb Bruek

Assalammua’laikom, kawoem nngoen sahbat
Saleum Horuemat, keu bandum gata
Bacut wasiet loen, haba peu ingat
Wareh ngoen sahbat, duson ngoen kota

Yoeh mantoeng teuga, beudoeh ibadat
Beudoeh haruekat, yoeh mantoeng muda
Meunyoe ka tuha, singoeh meukarat
Han ek ibadat, mita beulanja

Tuboeh ka saket, tulueng ngoen urat
Dak ta ibadat, hanle sempuna
Mita raseuki, pih ka meukarat
Maklum hai sahbat, tanyoe ka tuha

Oleh seubabnyan, rakan ngoen sahbat
Yoeh goeh teulambat, rijang keurija
Yoeh mantoeng teuga, tuboeh teuh sehat
Beudoeh ibadat, pujoe Rabbana

Pujoe Tuhanku, dan ta haruekat
Tanyoe peusiap, keu wate tuha
Wate tajak woe, nanggroe akhirat
Tanyoe ka siap, amalan kana

Kana pue pajoeh, seukeuda siat
Dang dang tapreh had, sampoe kutika
Tapreh troek ajai, tawoe akhirat
Tawoe bak teumapt. Yang kekal baqa

Yang laen bandum, hanpue taharap
Hana mamfaat, meubube seuma
Seukeuda ohnoe, uloen peu ingat
Jinoe lon surat, geubulueng harta

“ Harta Warisan “
Teukeudi Mate, sidroe droe urueng
Peut hoe geubulueng, harta pusaka
Di ulat asoe, di bumoe tulueng
Teuma di urueng, jitueng pusaka

Teuma di nyawoeng, milek Po tallah
Meu digata sah, hana sapuena
Malingkan yang na, amal ibadah
Seudeukah jariah, masa lam donya

( Tgk.Diyueb bruek) 27 -01- 2013

"Bungoeng Jeumpa" Aceh

Pengarang : Akhbar Al-Mutawassila

Allhamdulillah, lon pujoe Tuhan
Khaliqul A'lam, Maha Kuasa
Seulaweut Saleum, ateuh janjongan
Nabi nyang khatam, Rasul Musthafa

Sira meuduek-duek, lon karang nazam
Keu handai taulan, tuha ngon muda
Meu insya Allah, geubri lee Tuhan
Jeut peuringatan, keu tanyoe dumna

Keu "bungoeng jeumpa", haba lon karang
Dalam perumpamaan, neucok keuh makna
Didalam rika, lon pasoe peusan
Mudah-mudahan, akan meuguna

"Bungoeng Jeumpa", dilee hai rakan
"Bungoeng" pujaan, puteh wareuna
Sunggoh that mangat, meube "wangi"an
Ceudah hanaban, galak seumua

Pulom takalon, 'Oh watee "Keumang"
Ramee that "kumbang", keunan jiteuka
Hana pree sinja, uroe ngon malam
Seubab sa'ah nyan, ramee nyang "Hawa"

"Bungoeng" yang "Ceudah", bukoen simbarang
"Bijeh" hai rakan, beu unggul teuma
Ureung nyang "Jaga", pih menentukan
Lingkungan sinan, haroh teujaga

Teuma takalon, jinoe hai taulan
Lee tan be-bewan, si "bungoeng jeumpa"
Hana "meusaloep", watee bak jalan
Jiba lee "kumbang", ladoem lam "paya"

Jaga bek "mala", "bungoeng" rupawan
Bek "mameh" katan, 'oh katroek masa
Meuka mulia, "ujoeng" ngon "uram"
Bek tapeu "masam", tiep-tiep kutika

Lhokseumawe, 6 Januari 2013

“ UMARA NGOEN ULAMA”

Pengarang : Tgk Diyueb Bruek

KAREUNA ACEH, SEURAMOE MEKKAH
ACEH DAERAH, ISLAM HAI KAWOEM
ISLAM DI ACEH ,JAMEUN KOEN KANA
ALEM ULAMA , PEUDOENG AWAI PHOEN

NANGGROE PEUREULAK , SINAN PHOEN MULA
DUDOE SAMUDRA, WILAYAH GEUDOENG
HINGGA BERKEMBANG, SAMPOE MALAKA
ISEULAM JAYA , SAMPOE REUTOH THOEN

PO TEUMEUREUHOEM, ISKANDAR MUDA
YANG MAT KUASA , ACEH JAYA PHOEN
NANGGROE MEU ADAT, KUAT AGAMA
KAWOEM ULAMA, BANDUM YANG SUSOEN

YANG ATOE NANGGROE , BAK SI DROE RAJA
KAWOEM ULAMA , BANDUM YANG SUSOEN
RAYEUK THAT PEURAN, KAWOEM ULAMA
SAMA NGOEN RAJA, GEUPIMPIN KAWOEN

ISEULAM DI ACEH , JAMEUN KOEN KANA
KAWOEM ULAMA , PEUDOENG AWAI PHOEN
NA QADHI AGOENG , SIDROE ULAMA
YANG BRI FATWA, SYARIAT HUKOEM

MEU PAKOEN JINOE, ATRANYAN HANA
MEUBALEK CARA , MEUTUKA UJOENG
PADAHAI ACEH , HAK ISTIMEWA
KA TINGGAI RUNGKA, SYARIAT HUKOEM

HANA LE MUPAT ADAT, NGOEN REUSAM
KA GADOEH PERAN , KAWOEM ULAMA
PADAHAI ACEH , LEUBEH MEUGAHAN
LHEE BOH LANDASAN , AWAI KALHEUH NA

(TGK DIYUEBBRUEK )

*****PANTON MEURAWE CA E MEU PUREON*****

Pengarang : Chikmun Sya'ir Keuchik Mun

Assalamu'alaikom hai bintang kande*
Bintang seu rheungkhe Lam bale PANTON*
Bngeoh uroe nyoe kamoe kahazdhe*
Panton mrawe ca E meu Alon*

Meukru smangat rhmat bukoen le*
Sehat tuhan bre keu mandum kawom*
Uroe pih bngeoh mehmeoh dum sare*
Mcam profesie mnureot mfom*

Tjak Ulamno ngon mto kherie*
Tjak Usiglie dngon mto tong*
Hnya skian ulon mulaie*
Nyo na sahuti aknLon smbong*

ACEH MEUJASA

Pengarang : Tgk Diyueb Bruek

DI ACEH MEUGAH, SYIAH KUALA
YOEH SABOEH MASA,MEUSYUHU KONLE
PO TEUMEUREUHOM, ISKANDAR MUDA
YANG MAT KUASA, LEUPAH THAT ADE

RAKYAT THAT SEUNANG, AMAN SENTOSA
ADAK AGAMA, KUAT BUKOEN LE
SEURAMOE MEUKAH, MEUGAH U LUA
MEUCUHU NAMA, SAMPOE U MEUSE

DIKEUMEUJAJAH, OLEH BEULANDA
OH LHEUHNYAN NICA, PEUTAMOENG KAFE
ACEHNYOE JIPRANG, JENUEK KUASA
RAKYAT SENSARA, RATA LUNGKIEK GLE

BEUDOEH PAHLAWAN, YANG TEUGA TEUGA
MEUPRANG GERLIYA, GEULAWAN KAFE
GEUJOEK NGOEN MODAL, INDONESIA
KAPAI UDARA, NGOEN GEUBLOE BUDE

YANG PHOEN JOEK PANGKAI, INDONESIA
YOEH GOEH MERDEKA, MEUPRANG NGOEN KAFE
SEULAWAH AGAM, SEULAWAH DARA
KAPAI UDARA , NEUCUBA PIKE

KEUDEH BLANG PADANG, NEUJAK PAREKSA
MANTOENG NA RUNGKA, KAPAI BOEH HATE
KEU ANEUK CUCOE, SEUJARAH BANGSA
BEK SINGOEH HANA, BUKEUTI LAHE

KEUBIT LE JASA, ACEH MULIA
PEUTHEUN MERDEKA ,GEUPUBLOE MATE
PEUTHEUN AGAMA, BEK KAFE CUCA
SIDUMNAN JASA, BEUNA JIPIKE

BANTU EK U FRONT, MEDAN AREA
PEUTHEUN MERDEKA, GEULAWAN KAFE
PADUM LE SYAHID, PAHLAWAN TEUGA
KRUENG TANJOENG PURA, SINAN MEUGULE

TEUDOENG NGOEN NANGGROE, INDONESIA
GEUMAT KUASA, SABANG MAROKE
DARI PHOEN SABANG, IRIAN JAYA
ACEH LE JASA, MASA PRANG KAFE

ACEH LHE SAGOE, TANOEH PUSAKA
PEUNULANG BANGSA, KAYA BUKOEN LE
ACEH THAT GIGEIH, PEUTHEUN MERDEKA
INDONESIA, YOEH GOH LOEM LAHE

NANGGROE ACEHNYOE, CUKOEP MULIA
PUSAKA BANGSA, MEUCUHU KONLE
MEUPAKOEN JINOE, KA TABOEH KADA
DUM ANEUK DARA, MALE HANA LE

HANALE MALE , DUM ANEUK MUDA
DI URUENG TUHA , PIH BANGSAT KONLE
KA SAPUE ANGGOEK, PUTIK NGOEN TUHA
SANG NANGGROE LUA, AGAMA KAFE

KA GADOEH HAROEM, ACEH MULIA
KABEH SEUREUPHA, ADAT HANA LE
BAK DALI ADAT, TAKALOEN NYATA
ACEH MULIA, SANG KARAP REULE

ACEH TSUNAMI , TUHAN BRI BALA
SABE SAUDARA, KA TAMEUPAKE
JINOE KA DAME, AMAN SENTOSA
BEK LE SAUDARA, TAPUGA PAKE

BEK TACUE TUMUET, NGOEN ALE NEUBA
MITA PEUKARA, KEU BUNGOENG PAKE
MEUMADA OHNOE, HABA LOEN RIKA
PEU INGAT BANGSA, KUTA DEUNGOEN GLE.

(Tgk Diyuebbruek) Banda Aceh, 27-01-2013

DONYA AKHE LAHE TAPANDANG

Pengarang : Tgk Diyueb Bruek

DONYA KA AKHE, LAHE TAPANDANG
MU MACAM MACAM, BUET MANUSIA
TANDA DONYA NYOE ,KARAP GEUSIMPAN
UREUENG DUM MUMNANG,PEU SEUTOET DONYA

BAK PUBUET MAKSIET, GALAK KOEN WAYANG
MEUNYO SEUMBAHYANG, HANA JIKIRA
KA GADOEH LALOE ,UROE NGEN MALAM
PEUTUROET SYAITHAN, NGOEN NAFSU HAWA

PEUTUROET NAFSU, MALEI HANA LE
PEUTUROET HATE ,KA HILANG NYAWA
BAK MASA JINO ,TAKALOEN LAHE
HANA YANG PIKE, JALAN AGAMA

JALAN IBADAT,DI TUNUTUT TANLE
KEU PANGKAI TAWOE, U NANGGROE BAQA
NANGGROE AKHIRAT ‘,OH DUDOE PAGE
MEUTAN ELEUME, TANYOE BINASA

SINOE LAMDONYA, JINO TAPIKE
KEU PANGAKAI TAWOE,AMALAN TABA
PUBUET SEUMBAHYANG ,LIMOENG BOH WATEE
BEK SAGAI LALEI,BAK LET HAREUTA

GATA YANG MUDA, BACUT LON PEUTHE
BAK JAK U PANTE ,BEK GALAK RAYA
BEK GADOEH IKOET, BUDAYA KAPHE
HAN JAN TAHE, GEULUNGKOP DONYA

NIBAK WATEE NYA ,BARO TEU PIKE
HANA GUNA LE, TAUBAT DIGATA
ADAK BEUSUNGGOH, TANYOE MEUZIKE
GEUTUNG HANA LE, ULEH RABBANA

MASA LAM DONYA ,RAKAN BOH HATE
KEU RABBOL KADE, MUBEK TALUPA
TEULAH OH DUDOE, HANA GUNA LE
OH UROE PAGE, DALAM NURAKA

LAGE JAMEUN NYOE, JINOE DUM LAHEI
LALE NGOEN HP, TUHA NGOEN MUDA
TUWOE KEU TUHAN, SEMBAHYANG TAN LE
GADOEH BAK PIKE, UROSAN DONYA

AGAMA ISLAM, HAN SOE HIRO LE
AGAMA KAPE, GALAK TEUH RAYA
SEUBAGOE CONTOH, ULON TAPEUSE
MUDA NGOEN MUDI, BAK JINOE MASA

YANG DARA DARA , SOK BAJE SIKHAN
DI JAK BAK JALAN , LEUMAH URAM PHA
NGEN BAJE MIN, MEUBUNGKOH BADAN
SOK LEUWEU PANYANG, KEUTAT LAGOENA

BEUTHAT DI ACEH ,SYARIAT ISLAM
WATE TAPANDANG, SANG RO IE MATA
DI ANEUK DARA ,YANG MUDA SEUDANG
BAK SOK PAKAIAN, AURAT U LUA

IMAN HANA LE, DI DALAM BADAN
HUKOM ISEUAM, JAEH DI MATA
NYAN KEUH JEUT JINOE , ACEH TAPANDANG
LAGE SANG NYUM BAN ,NANGGROE EROPA

HAN PEU JAK PEUDONG , SYARIAT ISLAM
MEUNYOE TAN IMAN, DUM MANUSIA
SEUBAB SYRI’AT, INGAT KEU TUHAN
KOEN BUT PIASAN, KEU GURA – GURA

MEUMADA OHNO, HABA LON KARANG
PEU INGAT INSAN, AGAM NGOEN DARA
TGK DIYUEB BRUEK, ALIAS SULAIMAN
MEUH BEURIJANG, KADANG NA GASA

JAK SABAN TAPIKE KEUNEUBAH ENDATU

Pengarang : Airi Safrijal SH MH

meukrue seumangat poe bintang timu
cahya meujampu ngoen bintang takat
salam'alaikoem saleum loen sigeutu
rata penjuru timu ngoen barat

samboet saleum loen wahe eo teungku
ranup sigapu beu jeut keu ubat
mulia jamee geukheun mameh su
gantoe loen jak eu jaroe tameumat

di alu naga aroen meusiseu
di alu paku jalan meulipat
nibak nyoe uroe loen samboeng buhu
di dalam layeu ca-e loen radat

keu ubat hate ayah ngoen ibu
keu ubat pilu ca-e loen intat
tabaca pantoen bak loen lam layeu
jeut bayet buhu baca beuteupat

budaya aceh jameun meusyeuhu
seubab endatu geujaga goet that
rata jeut sagoe nama gob teupeu
lam seujarah endatu leumah talihat

budaya aceh saheh hai teungku
jameun yang lalu jithee timu ngoen barat
budaya ca-e indah lam buhu
di dalam lagu geukheun lam radat

bak jamboe pade taduek talagu
meunan endatu peukoeng martabat
ateuh rangkang blang suleng jimeusu
meutamah syahdu rawi lam radat

geukeutrip jaroe geu goyang taku
bak prut geubalu seudati mangat
geupeh kulet kameng linggang jimeusu
rapa-i geubalu meutingkat tingkat

banduem atra nyan pusaka endatu
di aceh meusyeuhu jameun eo sahbat
jinoe hanale reule jeut ta-eu
tan soe le peulaku budaya tansoe le ingat

keu budaya gob galak duem ji-eu
duem jipeulaku di balek kiblat
bak goyang disco keudeh dituju
meubahu bahu sinan meusapat

inoeng ngoen agam saban duem ta-eu
rata peunjuru timu ngoen barat
wahe rakan loen sukee endatu
aceh beu ta-eu saban taingat

pusakan naggroe pakoe dek meulu
bek sampe endatu kecewa sangat
meunyoe koen gata yang jaga dek meulu
jadeh aceh han meusyeuhu singoeh ngoen lusa

jadeh aceh nyoe barat ngoen timu
hancoe keuneubah endatu tamita tan pat
maka seubab nyan eo bungoeng meulu
saban tanyoe eu timu ngoen barat

saban tapapah pusaka endatu
mangat meusyeuhu meuwoe martabat
loen kirem peusan di dalam layeu
keu cucoe endatu timu ngoen barat

bekle hai adoe gata goeb hu-hu
pusaka endatu peukoeng eo sahbat
meunyoe koen meunan jadeh eo teungku
aceh endatu gadeoh martabat

meumada ohnoe loen tuleh buhu
di dalam layeu sibayet loen intat
loen lakee meu-ah haba lam buhu
kadang tutoe loen meujampu na hana mangat

meumada dilee haba lam buhu
singoeh loem teungku loen samboeng radat
salam'alaikoem loen top ngoen buhu
di dalam layeu katamat radat

Lueng Bata Banda Aceh, 31 Januari 2013.

“ ACEH KA MAKMU ”

Pengarang : Tgk Diyueb Bruek

JALAN USIGLI,TUMBOEH U MATANG
JALAN KEUTAPANG ,TUMBOEH ULHOEK NGA
SALAM ‘ALAIKUM, KEUBANDUM RAKAN
WAREH NGOEN TAULAN, BANDUM SYEDARA

ACEH KAMAKMU, JINOE KASEUNANG
KANA JABATAN, PAHLAWAN BANGSA
NANGGROE KAHASE, TANYOE COEK PULANG
KANA LAM REUGAM, ACEH MULIA

BUPATI NGOEN CAMAT, DROE TUEH HAI RAKAN
YANG MAT PIMPINAN, PEULAYE BETRA
PULOEM GUBERNUR, CHIET ,KA AWAK GAM
PEU EK BAROENYAN, RHOET PERTAI P.A.

HANA LE GABUEK ,BANDUM KA TEUNANG
RAKYAT KA SEUNANG ,LAGE MERDEKA
KATROEH BAK JANJI ,MASA UROE NYAN
YOEH MANTOENG LAM PRANG, GOLOM PILKADA

JANJI NGOEN IE MEUH , GEUPEGOET JALAN
BANDUM HAI RAKAN, TUMBOEH U DESA
TAJAK U SABANG, KANA JEMBATAN
HANA PAYAH RAKAN , TAJAK EK BETRA

CHIET HAN TREP LE, BANDUM KA SEUNANG
KAPAI BLANG PADANG, PEU UDEP TEMA
TAPAKEK MESEN, SETIYOER NGOEN BHAN
SIAP TEREBANG, TROEH U MALAYA

KERETA APUI , KANA BAK JALAN
BANDA ACEH MEDAN, CHIET SIGOE PUTA
SIBAK RUKOK TRUEK, KATROEH TUJUAN
SANG SANG HAI RAKAN , CHIET SIKLEP MATA

SYUHADA CAHIET, DALAM MIDEUN PRANG
JAK BAK KUBURAN, JAK KUNJOENG TEMA
TULEH NGOEN IE MUEH, BAK BATE NISAN
TANDA PEJUANG , YANG BELA BANGSA

YANG DILE SUMBANG, KEU PERJUANGAN
KAJUET COEK PULANG, MEULIMPAT GANDA
ANUEK SYUHADA, YANG SYAHID LAM PRANG
GAJI BULANAN, JIBAGI DIBAGI RATA

INOENG SYUHADA, JANDA PAHLAWAN
GAJI BULANAN, JINOE MEUJUTA
FAKIR MISEUKIN, PIH MEUNAN MACAM
DUA’FA SAJAN, PIH KA BAHGIA

TEUKEUDI SAKET, CIRET NGOEN MUMANG
HAN PUE U PENANG, MEU UBAT GATA
DISINOE KANA, DOKTER DI PENANG
NGOEN PELENGKAPAN, KEURIJA SAMA

TANUEK EK HAJI, HANPUE ANTRIAN
SEUBAB NA KAPAI. ALA PERSIA
ENGKOET KEUMAMAH, KEU PERSIAPAN
ATRA BANTUAN, JIBRI KEU GATA

DUM RAKYAT ACEH, JINOE KA SEUNANG
KANA BANTUAN, JINOE TIEP DESA
TIEP SABOEH KAKA, JIBRI JUTAAN
TIEP TIEP BULANAN, SABAN KUTIKA

( Tgk Diyueb Bruek Tgl 28 -01-2013)

“INOENG YUE TALEUK DROE”

Pengarang : Tgk Diyueb Bruek

Assalam mua’laikom, kawoem saudara
Tuha ngoen muda, saleum lon peu ek
Hajat lon tanyoeng, saboeh peukara
Meunoe ban haba, beugoet neutilek

Na sidroe inoeng, bungong kupula
Ceudah that rupa, lagi pih cantek
Kulet jih puteh, meucaya caya
Hana ngoen peusa, ruman cut adek

Badan jih bulat, lagee teu upa
Sapai jih dua, meutangke putek
Keu ieng jih rampeng, ok patah manyang
Bahoe jih keumang, lage geularek( biola )

Dak disoek baje, jipinggang ija
Rata anggota , minyeuk di reuteik
Oh watee dijak, bak jalan raya
Mareh peumuda ,meutroen ngoen meu ek

Koen meuceh mantoeng, nyan aneuk muda
Dum ureueng tuha, ulee meu asek
Nama dara nyan, sinyak zulaikha
Aneuk saudagar, toke ben asyek

Kana suami, sidroe peumuda
Sinyak mustafa , karyawan pabrek
Hudep lam aman, lam rumoeh tangga
Awaknyan dua, cinta meunarek

Adak nafakah, baje ngoen ija
Pawoen bak dada, ube boh iteik
Dak tangieng rumoeh, jeundeula kaca
Kurusi meja, meuculek – culek

Bak teungoeh duek duek, awaknyan dua
Taleuk jimita, uleih cut adek
Di yue taleuk droe, hana kareuna
Sinyak mustafa , ulee meu asek

Pakriban hukoem wahe saudara
Lagenyan cara, si inoeng burek
( Tgk Diyueb bruek ) Tgl,31/01/2013

PANAH

Pengarang : Agam Sidroe

Alhamdulillah, Allah loen pujoe,,
Dzat sidroe, yang Po kuasa,,
Rasul Mustafa, saleum loen hujoe,,
Rahmat lam bumoe, asoe ubena,,

Mandum syedara, lam group PANAH nyoe,,
Bak agam sidroe, saleum mulia,,
Saleum syedara, uloen peu sampoe,,
Aduen ngoen adoe, lam alam maya,,

Hate loen seudeh, peudeh lam asoe,,
Ka padum uroe, peunyaket tuba,,
Rangkang budaya, na soe peu kachoe,,
Anggota geutanyoe, hanjeut geu teuka,,

Aleh muruwa, buaya sampoe,,
Aleh syit beusoe, meu asah mata,,
Ditem ilanya, rangkang PANAH nyoe,,
Teumpat meurunoe, asoe lam donya,,

Rayoek faedah, mauidhah asoe,,
Rame yang pasoe, bhah agama,,
Meusoe yang baca, meuguna asoe,,
Han sampe rugoe, beu that lam maya,,

Mungken syit iblih, yang gatai asoe,,
Keunoe jak peutoe, kachoe ubena,,
Ubena cara, kaseb uroe nyoe,,
Bek le peu kachoe, keunoe meudoda,,

Alhamdulillah, iradah sampoe,,
Yang get2 asoe, teutap teujaga,,
Rangkang budaya, pantoen nazam nyoe,,
Cuba neu hiroe, pakoe bersama,,

Syair agama, cuba neu pasoe,,
Peu ingat asoe, bumoe lam maya,,
Mangat na guna, beu that dhiet kilo,,
Yang peunteng nanggroe, asoe mulia,,

Meubek ta linteung, kawat meuduroe,,
Mata geu gajoe, bek cuba raba,,
Tajaga kata, seu golom kutoe,,
Tajaga asoe, seu golom luka,,

Hai yang ka-ka, makna ta hujoe,,
Peulajaran tanyoe, bek le meugisa,,
Mandum syedara, yang na disinoe,,
Harapan adoe, pakoe bersama,,

Teurimoeng geunaseh, hana loen tuwo,,
Syedara tanyoe, Tgk Murtadha,,
Ngoen susah payah, cara neu hujoe,,
PANAH neu puwoe, bak asai mula,,

Pat salah kata, di agam sidroe,,
Meu'ah keu adoe, bek jeut keu dosa,,
Manteong that muda, umu goh sampoe,,
Keunoe jak peutoe, buet ureung tuha,,

Seumoga bahagia, makmu lam nanggroe,,
Man2dum asoe, iman lam dada,,
Rahmat karunia, bak Dzat yang sidroe,,
Malam ngoen uroe, ingat Rabbana,,

SYUKOR ALHAMDULILLAH

Pengarang : Musliem Barcelo Nakata

Alhamdulillah,lon pujoe Allah
Katroek lon langkah,saweu syedara
Seulaweut saleum,keu Rasulullah
Yg bri risalah,keu tanyoe dumna

Salam'alaikom warahmatullah
Saleum lon kubah,keu mandum gata
Suoet saleum lon,rakan meutuwah
Bek sampe basah,oh ujeun teuka

Ulon meusyukur,Alhamdulillah
Seubab grup panah,kajeut lom buka
Ka padum uroe,hanjeut le peuhah
Error ji peugah,wate ta buka

Aleh keuh pakon,aleh soe olah
Hanjeut le peuhah,grup tercinta
Tapi uroenyoe,kajeut lom peuhah
Hana le susah,dum wareh lingka

Teurimong geunaseh,aduen meutuah
Ngen apoh apah,aduen usaha
Mandum ka seunang,ureung grup panah
Kajeut geu singgah,lage biasa

JAK TAPEU BEUDOEH BUDAYA

Pengarang : Akhbar Al-Mutawassila

Assalamu'alaikum, saleum lon sapa
Tuha ngon muda, fi kulli makan
Tapujoe Allah, Tuhan Nyang Esa
Tiep-tiep kutika, uroe ngon malam

Seulaweut saleum, bek sagai lupa
Sabee tabaca, akan janjongan
Nyang ba Risalah, ateuh rhueng donya
Rasul Musthafa, Nabi nyang khatam

Meugah Raja, Iskandar Muda
Dharma Wangsa, nama digobnyan
Jak tapeubeudoh, wahee syedara
Pusaka Maja, nak kebangkitan

Aneuk Aceh, dalam meubahsa
Sayang lagoina, ka meutamparan
Watee meukalam, dijampu bahsa
Takot saboh masa, ancoe kebudayaan

Panton-Nazam, Hikayah seureuta
Pusaka ureung tuha, keusoe geupulang
Meuhan tapakoe, meutan tajaga
Awoh lam masa, hana bekasan

Group Panah nyoe, wahee pemuda
Kamoe puga, teumpat peudalam
Meureunoe meungarang, latih meurika
Sinoe saudara, bek seugan-seugan

Bek neumalee, neumeu karya
Upload haba, ayyuhal ikhwan
Na soe peupah, na PEUTUHA
Peubeutoi haba, sesuai peraturan

Tameu Panton, bek gura-gura
Peu-indah kata, beuna aturan
Jak tapeupah, kaedah sastra
Lam Panah raya, na soe bimbingkan

Tameu panton, meunyoe dilua
Nibak beuranda, kadang dipeujaehkan
Oleh seubab nyan, kamoe buka
Group sastra, PANAH meuboh nan

Sinoe bandum, lagee saboeh ma
Meu saudara, dalam keakraban
Saleng horeumat, sesama anggota
Adak meucakra, jaga garesan

Sama tahiroe, beuna tajaga
Posting bersama, pasoe u dalam
Panton-Hikayat, atawa hadih maja
Laju neu geulawa, beuseurta Nazam

Lheuh Trieng Gadeng, laju Pang Wa
Pante Raja, saboh kawasan
Lon karang nazam, panceng haba
Komen sigra, bek cuma "suka"an

Lhokseumawe, 11 Januari 2013

Syari'at Lam Nanggroe

Pengarang : Al-Din Triengga

Assalamu'alaikum tanglong hareutoe
Sambot rakan droe saleum lon maba
Katrep hana deuh lam panton nazam nyoe
Jinoe lon putoe keunoe lon teuka

Hajat bak hate lon neuk peusampoe
Teuntang syari'at di naggroe mulia
Tangieng jinoe rata jeut sagoe
Agam ngon binoe agama tan le na

Dalam buet maksiet leupah dipakoe
Keu Tuhan sidroe hana diniet na
Meunan sit ta-eu penguasa nanggroe
Diputroe pruet droe ngon keluarga

Meumada oh noe wahe rakan droe
Jampang jampang ta sambong teuma
Maklum beungoh nyoe tarek that uroe
Beumangat asoe geutanyoe dumna

TAMSELAN SEUSAMA ISEULAM

Pengarang : Akhbar Al-Mutawassila

Tapujoe Allah, sidroe Nyang Esa
Nahar ngoen laila, fi kulli waqtan
Ateuh Muhammad, rahmat sijahtra
Ateuh keluarga, sahbat sekalian

Sira lon duek-duek, ulon meurika
Peuhantoek haba, lon peugot nazam
Dalam shaheh bukhari, lon kutep haba
Beuna keuh guna, keu handai taulan

Bak saboh uroe, Nabi meusabda
Keu manusia, umat di gobnyan
Baci neusimak, wahee syedara
Insya Allah Ta'ala, na kebaikan

÷÷÷÷÷÷÷÷÷÷÷÷÷÷÷÷÷÷÷÷÷÷÷
"Antara mukmin, didalam donya
Geuboh umpama, lagee bangunan
Saleng peukuat, seusama syedara
Watee berkata, jaroe Nabi meusilang"
÷÷÷÷÷÷÷÷÷÷÷÷÷÷÷÷÷÷÷÷÷÷÷

Cuba takalon, jinoe syedara
Kiban keuh ka, ureung Iseulam
Peuna bersatu, didalam donya
Atau seusama, ka bicah prang

Hana meuleset, Tuhan bri haba
Juga baginda, watee meukalam
Awai neuteupu, yoh goh jiteuka
Akan meubahgia, meusoe amaikan

Ureung Iseulam, maju han teuka
Meunyoe han geuba, nyan perkataan
Ladoem ka ngui, haba nashara
Seubab dunia, lee ka meunan

Astaghfirullah, meutajoe haba
Tapi hai syahra, memang meunan
Lon pada 'oh noe, haba lam rika
Komen beusigra, meuna tambahan

Lhokseumawe, 12 Januari 2013

Keunangan Dilei

Pengarang : Agam Sidroe

Assalamu'alaikom, saleum loen dilei,,
Pah ateuh ulei, jaroe bandua,,
Saleum mulia, meu'ah loen lakei,,
Sikrak dua lhei, cuba meurika,,

Yoeh saboeh masa, teu ingat dilei,,
Bak saboeh balee, loen beut aleh ba,,
Iqrak loen baca, meuasek ulei,,
Huruf tan teuntei, meubalek tuka,,

Meutuka bareh, meugareh malei,,
Meu asek ulei, guree neu ija,,
Loen cuba baca, salah ka teuntei,,
Ngoen sikrak kayei, kajeut keu dua,,

Ikhlah lam dada, ija di gurei,,
Beu that ka lapee, umu ka tuha,,
Loen geu aja, sikrak dua lhei,,
Dari phoen dilei, loen beut aleh ba,,

Sikrak ija kroeng, dua krak bajei,,
Uloen geu madee, bak ayah ngoen ma,,
Ngoen peng beulanja, meunyan ka teuntei,,
Loen eh bak balee, demi cita-cita,,

Buboeng yang tireh, meulapeh kayei,,
Binteh peureudei, teumboeh ulua,,
'Oh angen teuka, sijuek meulagei,,
Ngoen lapek kayei, keu gantoe ija,,

Keu teumoen bu, boeh itek teuplah lhei,,
Eungkoet masen keupala batei, jareung loen rasa,,
Peulom mentega, ruti lam jurei,,
Sagai yoeh dilei, tan leumah mata,,

Meu ulang malam, meujan tan loen thei,,
Karap jeum poh lhei, goh teungeut mata,,
Meu ulang baca, keudeh bak gurei,,
Peutimang ilmei, bek sampe sia,,

Kadang 'oeh suboeh, peunoeh ngoen embe,,
Ie moen meulagei, ka basah tika,,
Karna tan jaga, azan le gurei,,
Ngoen cabeung kayei, bak beuteh dua,,

Kadang hukoman, keunoeng grak batei,,
Beuthat jeut malei, bak rakan lingka,,
Basah ngoen ija, deong ateuh balee,,
Jak angkoet kayei, seubagoe denda,,

Mandum meuguna, haba digurei,,
Brat yoeh dilei, mangat loen rasa,,
Dua krek kata, haba lam ilmei,,
Leubeh bak jeunamei, intan permata,,

'Oh noe meumada, haba yoeh dilei,,
Ingat bak balee, mudhiah nama,,
Ka tinggai nama, keunangan gurei,,
Dalam ilmei, yang na lam dada,,

Bek Laloe

Pengarang : Banta Indra


Assalamu'alaikum,awai mulaan
Lon pujoe tuhan,Azza wajalla
Seulaweut saleum,hana lupaan
Panghule alam,muhammad nana

Donya nyoe,katroh bak akhe
Macam dum lahe,takalon rupa
Laloe ureung,kuta ngon digle
Bak buet jahe,galak leupahna

Perintah poe,pubuet tanna le
Maksit hana pre,beungoh sinja
Bak pike,sang hudep tiep sabe
Keu suai mate,ingat hana

Peugot droe,lagei awak kafe
Sang hana le,iman lam dada
Takalon buet,leupah that ganje
Male tan le,tuha ngon muda

Peugah droe,ureung islam
Pakon meunan,buet tahawa
Dalam syariat,na aturan
Pateh tan,deungoe pih hana

Wahe rakan,syedara meutuwah
Meunan ulah,bekle tahawa
Beudoh laju,taubat bagah
Lake bak Allah,ampon dausa

Capli cina,leupah that keu-eung
Bineh bateung,timoh meu banja
Yang teumuleh,sikula pih tan
Aneuk miet bangai,eleume hana

TAMSELAN "SEULANGA"

Pengarang : Akhbar Al-Mutawassila

 Tapujoe Allah, tiep tiep kutika
Keuwajiban Hamba, seubagoe 'Abdan
Keu Rasulullah, Rahmat Sijahtra
Rasul Musthafa, Nabi nyang khatam

Lhokseumawe, awai Aceh Utara
Geuplah teuma, yoh peumekaran
Goet saboh nanggroe, meugoet wanita
Tiang neugara, inong disinan

Bumoe Aceh nyoe, tanoh Auliya
Meunan beurita, nibak masyaikhan
Bustanul Saltin, meusoe tu'oh baca
Kana tertera, matan disinan

Teuma jinoe, sayang lagoina
Nanggroe Mulia, asoe meutamparan
Lam ibarat, bungoeng "seulanga"
Lon atoe kata, keu peuringatan

Bungong "Seulanga", di Aceh Raya
Lee ka mala, diteungoh jalan
Mantoeng putik, ka ulat seuba
Meubanja-banja, duroeh hai taulan

Pulom geupula, hana geujaga
Geusiram hana, pupoek juga tan
Meuka thoe kreng, "seulanga" mala
Gadoeh cahya, hana bee-bee wan

Jaga hai "seulanga", mareuwah gata
Bek jiseuba, lee kumbang jalang
Beujeut bungoeng, nyang meubahgia
Indah lagoina, watee tapandang

Supaya bungoeng, nyan meuhareuga
Suwah tapula,lam peukarangan
Taboeh pupok, ngon pageu silingka
Ulat beu bekna, sampoe 'oh keumang

Meusoe mantong, jinoe hai syahra
Na "seulanga", amanah Tuhan
Jaga beugoet, bek sampoe mala
Dikeu Tuhan gata, nyan keuwajiban

Ka meumada, ulon meuhaba
Haloh-gasa, beuneu ma'afkan
Maklum ulon, hana sikula
Akhbar Al-Mutawassila, meureunoe mengarang

Meusoe neuk komen, silahkan saja
Bek seugan gata, laju peupanyang
Syarat utama, sopan haba
Didalam rika, beuna kebaikan

Lhokseumawe, 13 Januari 2013

BEK PEUBEUNA "KAHIN"

Pengarang : Akhbar Al-Mutawassila

Alhamdulillah, lon pujoe Tuhan
Nyang peujeut alam, jen dan manusia
Nyang gantoe uroe, deungon malam
Han meusalahan, tiep-tiep kutika

Seulaeut saleum, teuma 'ohlheuh nyan
Akan janjongan, rasul Musthafa
Pang ulee Nabi, rasul yang khatam
Keusayangan Tuhan, silama-lama

Assalamua'laikum, saleum lon layang
Keu rakan-rakan, lam donya maya
Han lon peubeuda, inong ngon agam
Hana tingkatan, banmandum sama

Keude geurugoek, meubanja panyang
Teuma Kuta Blang, hana chiet beda
Nibak uroe nyoe, didalam Nazam
Ulon uraikan, Hadist maulana

Ulon meudo'a, neubri Ya Tuhan
Beujeut peuringatan, keu wareh lingka
Nakeuh Muslim, nyang riwayatkan
Sabda janjongan, meunoe geukata

Sibeurangkasoe bak KAHIN, troek jidatang
Diteumanyoeng keunan, lalu peucaya
Maka bak Allah, shalat ureung nyan
40 uroe bilangan, han geuteurima

Maka hai rakan, neuperhatikan
Bek sampoe meunan, rhoeh ta keurija
Ureung meuramal, wahee e taulan
Ahli Nujuman, KAHIN geunama

Meubek jak tanyoeng, hai macam-macam
Seubab ureung nyan, hana kuasa
Qadha ngon Qadar, wajeb meu-iman
Bek tajak peutrang, nyan hana-hana

Sayang lawet nyoe, wap kebiasaan
Lee meusalahan, seubagian hamba
Ramalan bintang, nibak bacaan
Ladoem Lee seunang, malah peucaya

Beuteugoeh-goeh, ayyuhal ikhwan
Meubek atra nyan, got that tasuka
Meunyoe gata, teungoh bosan
Leubeh got Al-Qur an, neucok neubaca

'Oh lheuh Langsa, Kuala Simpang
Baroe Medan, Sumatra Utara
Nazam lon pada, seubab ka panyang
Pat keusalahan, meu'ah beu raya

Lhokseumawe, 19 Januari 2013

Nazam Nasehat

Pengarang : Malek Neuheun

Bismillah, Tuhan sidroe poe
Dunia meusahoe, sampoe akhirat
Rasulullah, Pangulee geutanyoe
Seulaweut dudoe, tamah syafaat

Saleum seujahtra rakan disinoe
Beu lagee unoe kheun pangulee umat
Seulamat iman hate bek kutoe
Bek peusaban droe meulagee lalat

Peu haba rakan ni bak seupot nyoe
Kabeh meusahoe Peusapat rahmat
Semoga mudah hana yg peu kachoe
Kupi saboh glah tamah seumangat

Mungken ladom yang na disinoe
Leuh padim uroe watee istirahat
Mungken na chit yg teungoeh galoe
Tamoeng laju keunoe semoga manfaat

Na chit ladom peike keu nanggroe
Malam ngoen uroe suson siasat
Teuma yang deuh laen that bagoe
Karu keu droe-droe kiban keuh rakyat

Abeh tanaman kameng tan meutaloe
Hana geupakoe pageu tan meupat
Meunan hai rakan peukateun jinoe
Tip rata sagoe ka ji meu upat

Alah hai kaom meunan geu ujoe
Bak Allah poe lakee seulamat
Leubeh kureung cukop keuh et noe
Meuah ulon nyoe keu mandum sahabat

Ca-E Singkat

Pengarang : Halodi Haka

Dengan Bismillah kisah lon suson,,
Atjeh nanggro lon bacut lon rika,,
Rindu ngon sayang mejampu rihon,,
meheut hate lon kapadup lama,,

mecen keu nanggro betedong hukom,,
lage geu petron oleh Rabbana,,
hukom Islam tanyo mepayong,,
lage kheun Rabbon mebek metuka,,

Alqur'an hadist tacok tapephum,,
di sinan hukum salah ngon beuna,,
Ijmak ngon kias ulama suson,,
tacok ke hukom Atjeh mulia,,

kepeu hukom gop tanyo peu angong,,
hukom bak Rabbon hana tanitna.

Ca-E Peu ingat

Pengarang : Banta Indra

Leupah sayang,pade dalam blang
Uroe ngon malam,angen peudoda
Hudep lam donya,tanna sembahyg
Rugoe that rakan,faedah hana

Boh panah,taguen keu gule
Boh jambe,talhap ngon sira
Nyoe syeitan,jeut keu gure
Sitka teunte,maksit takeurija

Aneuk beurijuk,jiduk lam eumpung
Aneuk kleung,gura that rupa
Hana guna,harta meukuyan
Seudeukah tan,bantu sydara

Leuk jidoeng,di pucok kulu
Tiong jimeusu,dicong bak pala
Keupu guna,panyang umu
Peuturot nafsu,sabe lam dausa

Bak rambong,timoh dlam gle
Bak awe,duroe that bisa
Peusiap beukai,seugolom mate
Bek laloe le,hudep lam donya

Ie krueng tumboe,leupi kon wayang
Ie krueng sawang,meutuka take
Bacut sapu,kalon ci karang
Gantoe ulangan,keu lon nyoe

^Ca E Peu Eh Aneuk^


Allahu Allah, Allahu Rabbon
Allah qadiron, Maha Kuasa
Masa cut Nabi, didalam ayon

Rahmat neupeutron, uleh Ilahi

Doda idi, putik sukon
Di dalam on, jroh meusundi
Ka-eh hai Nyak, dalam ayon
Ayah geutron, mita raseuki

Jak kuayon, putik rambot
Aneuk lam limboet, beurijang raya
Beu Tuhan bri, umu lanjot
Beuna taturoet, kheun Ulama

Allah hai do, doda idi
Boh campli, beurijuek seuba
Beuna umu, Tuhan neubri
Boh hate Di, beurijang raya

Lom geukheun do, doda idang
Bancalang, dilaot raya
Beuta gaseh, Ulee balang
Adat naprang, nasoe sangga

Nyoe kukheun do, doda idi
Mirah Pati, jeh dipara
Wahe aneuk, nyang johari
Beu Tuhan bri, rijang raya

Allah haido, doda idang
Seulayang blang, kaputoh Taloe
Poma geutron, jak poh linggang
Ka-eh rijang, nak mangat asoe

Ijo-ijo, naleueng samboe
Nyang goet ijoe, naleueng sira
Bek kamoe lee, hai aneuk oe
Nyoe ku kheun doe, jak ku doda

Ie dilaot, puteh ijoe
Peurahoe, umbak cencala
Gata hai Nyak, ulon dodo
Aneuk lintoe, ayeuem mata Ma