Cari

Subscribe:

Ads 468x60px

Pasang Iklan Anda Disini


Saturday, March 23, 2013

Panton Beudoh Eh

Pengarang : Teuku Raja Mahkota Padakme

sayang that buleun di salop awan
sayang that bintang tan le meucahya
yoh buno uro hate that seunang
troh keajaiban dara jeulita

teungoh loen duk duk sajan ngen rakan
ban lheuh seumbahyang pujo rabbana
mata loen sayu meuteungeut han ban
krna beuklam loen nonton bola

kujak lam kama kupeurubah badan
siat oh lheuh nyan teungeut di teuka
lheuh nyan teukeujot di goyang badan
loen pike sang2 terjadi geumpa

kubleut ngen mata, ku balek badan
ternyata rakan geumpa cit hana
yang na si dara teudong di sinan
dengon senyuman indah lagoina

di tubit ngen sue leumbot hana ban
Beudoh hai cut bang uro ka asha
kajeut neubeudoh neumano reujang
di uloen tuan katroh ku teuka"

wate loen dengo narib lagenyan
di uloen tuan kubeudoh sigra"
kugrak ngen langkah kureutek tangan
keudeh u bak kran kujak rah muka"

lheuh kurah muka kulap ngen badan
nibak dek intan keupeuto lanja
kucok ngen rukok kupip ju reujang
sirang leon tuan kubuka haba

di langet manyang meureudok pih tan
uro cukop trang angen meu bha2
saleh pat ilat han ek uleon pham
ujeun dan topan ngen tiba2"

aleh pu lumpo di adoe beuklam
nibak loen tuan katroh neu teuka
karap lhe ploh thon umu loen tuan
uronyo keuh sang baro loen rasa"

” JAGA AMANAH “

Pengarang : Agus Sprayer

Pensempurna : SULAIMAN.A.GANI.
==================================
Rahman ngoen rahim, sifuet di Allah

Nikmat neulimpah, keunoe u Donya
Qadha ngoen kada, bak sidroe Allah
Hana hak bantah, geutanyoe haba

Meugrak teukeudi, neubri lon le Allah
Saboeh Hidayah, keu lon geuyue ba
Sira lon duek duek, pikiran teuhah
Tuleh naseukah, peu ingat Hamba

Ulon bri judul, jaga Amanah
Ummi ngoen Ayah, jaga Anuekda
Kareuna anuek, nyan pih Amanah
Beugoet neupapah, neusadu bawa

Meunyoe roeh anuek, jipubuet salah
Meuhat ma ngoen yah, tanggoeng dosa
Meunan meuteume, di dalam surah
Di Rasulullah, meunan meu Sabda

Hadis janjongan, Rasul po tallah
Meunoe ban ulah, ulon calitra
Kareuna anuek, jipubuet salah
Meu ma deungoen yah,tamoeng nuraka

Na sidro Aneuk, rakan meutuah
Peuritah Allah , pasoe nuraka.
Ka juhuet sifuet, jipubue salah
Peurintah Allah, han dikeurija

Le malaikat, neucoek le bagah
Lage peurintah, Allah ta’ala
Dalam nuraka, neulanboeng bagah
Meunan keu ulah, malaikat keurija

Teuma Anueknyan, lake bak Allah
Hajat jipeugah, seubab kareuna
Meupakon di jih, jipubuet salah
Le ngoen Ayah, peurunoe hana

Oh kalhueh izin, ka nibak Allah
Anuek seumeugah, seun seun sibanja
Waya Rabbana, Tuhan ulon sah
Yang po Amanah, u atueh hamba

Meuseubab dilon, meuroeh buet salah
Seubab ma ngoen yah, peurunoe hana
Hantom na geuyue, dilon ibadah
Hantom peurintah, bak buet Agama

Umi lon lale , minta nafakah
Teuma di ayah, sibuk keurija.
Sehingga ulon , hantom geupapah

Hantom geupegah, eleume agama

Meunyoe hanjuet droe, wajeb peu upah
Keudeh u dayah, geujak joek ulonnyoe
Mangat lon turi, larang ngoen teugah
Beutoi ngoen salah, e ya rabbana

Meuka Seubabnyan, wahe ya Allah
Ulonnyoe salah, seubab yah ngoen Ma.
Meutroen Fireuman, ka nibak Allah
Malaikah sah, suroeh Rabbana.

Meuhoe ureug syik, yang tan amanah
Po ma ngoen Ayah, Asoe Syuruga
Laju neujeumpuet , le malek Zabaniyah.
Po ma ngoen Ayah , yg na lam syurga.

Masa lam donya, hana amanah
Suruhan Allah , meuhadap sigra
Meutroen fireuman, yoeynyan bak Allah
Amalan ayah, tuka ngoen aneukda.

Yoehnyan geutuka, sigra le Allah
Peutamoeng Ayah, Asoe Nuraka
Anuek Syuruga ,tamoeng le bagah
Meunan keuh ulah, rawi ulama
================================

-Agus Salim (Agus Sprayer).
-Kruengceh, Seunagan, Nagan raya Aceh (23-03-2013)

* Luqman Al-Habasyi & 3 Pelacur *

Pengarang : Alhadi Andika

Alhamdulillah segala pujoe meuwoe keu allah...
Yg brie hidayah ke tanyoe hamba...
Seulawet salem tapeuhimpon keu rasululullah...
Lam apui luah ummat geumita...

Salam 'alaikum keu rakan meutuah...
Ulon neuk kisah keu sidroe hamba...
Hamba yg ta'at sabe keu allah...
Yg jaga amanah walau derita...

Riwayat dari Sai`id bin Amir meunoe peuneugah...
Abu ja'far peugah bak kamoe dumna...
Luqman Al-Habasyi sidroe budak yg amanah...
Bak saboh sa'ah di ba u pasai kota...

Jie keuneuk peubloe hamba yg amanah...
Keu ureung mewah yg mita hamba...
Luqman tanyoeng bak ureung mewah...
Peu hajat qudrah neubloe hamba...

Lon yu peubut peu yg mudah...
Kah lon peurintah peu yg hawa...
Meunan geuseu'ot le ureng mewah...
budak amanah neu jaweb haba...

Lon mohon bak gata hay ureung qudrah...
Lon bek neukeubah u rumoh gata...
Sebab ulon ureung yg leumah...
Sapu han keumah hay paduka...

So yg nak bloe meunan geupeugah...
Sampoe saboh sa'ah laen haba...
Lon yu Jaga rumoh sagai dikah...
Nyan keuh perintah keu kah hamba...

Luqman jaweb bak ureung mewah...
Jinoe lon ikhlah keu hamba gata...
Laju geupeuwoe hamba yg amanah...
Lheh nyan tugah geuyu bak hamba...

Di rumoh na 3 droe dara yg ceudah...
But laknat Allah yg dara keurija...
Peulacur lon kheun ngat jelah...
Sabe di tung upah bak but zina...

Nibak saboh uroe geuteurimoeng amanah...
Tuan geuneuk minah u keubon raya...
Nibak luqman tuan amanah...
Pintoe bek kapeuhah keu si dara jelita...

Makanan kana keu si dara ceudah...
Gata bek ta minah pinto bek buka...
Segohlom lon woe bek ta minah2...
Meunan geu amanah bak si hamba...

Hana trep saat lheuh tuan minah...
Dara yg ceudah bak luqman jie teuka...
Bagah hay habsyi pintoe ka peuhah...
Bek ka bantah pintoe ka buka...

Tp luqman han geutem peuhah...
Karna amanah han geubi buka...
So yg langgar saboh amanah...
Nuraka allah tempat di hamba...

Ban jie dingoe yg luqman peugah...
3 droe dara ceudah, luqman di aniaya...
Ci klok muka luqman, sampoe meudarah...
Luqman tan goyah amanah geujaga...

Geusampoh muka yg ka meudarah...
Pinto han geupehah sampoe tuan teuka...
Wate Geuwoe tuan hana geupeugah...
Perangui si ceudah geurahsia lam dada...

Asai geujak tuan meunan geu amanah...
Kah bek kaminah pintoe bek ka buka...
Lheh geujak tuan troek dara ceudah...
Sabe diyu peuhah pintoe diyu buka...

Sabe luqman han geutem peuhah...
Sabe di jajah leu dara durjana...
Luqman di aniaya sampoe meudarah...
Tp han geupeugah nibak paduka...

Sampoe dara yg tuha hate teu gugah...
Pakoen keu Allah ta'at that hamba...
Padahai jih sidroe budak habsyah...
Sabe susah lam menderita...

Pakri ulon tuwoe keu Allah...
Padahai meulimpah nikmat karonya...
Laju di taubat sidroe dara ceudah...
Yg larang allah tanle keurija...

Ban jie kalon kakak ka meu ubah...
Adek pih teuhah hate ngoen mata...
Ban 3 droe jie taubat keu allah...
Tanle di upah but meuzina...

Soe yg kaloen hiren meuleumpah...
Sampoe teugugah ban saboh kota...
Pelacur2 laen pih taubat keu allah...
Pinto hidayah allah geubuka...

Oleh sebab nyan rakan meutuah...
Ureung ta ubah ngoen but gata...
Keupu rata sagoe gata meu dakwah...
Asoe dakwah soe kaloen hana...

Memada dile ulon meukisah...
Meunyoe salah neuteugur sigra...
Neupeu meu'ah meunyoe na salah...
Bek sampoe susah hate andika...

*Alhadi Andika selangor, 22-03-2013*

Friday, March 22, 2013

" SYURUGA 8 ( LAPAN ) "

Pengarang : Akhbar Al-Mutawassila

Nuraka tujoeh, kalhueh lon karang
Syuruha lapan, jinoe tarika
Mangat meusaboh, didalam nazam
Lake lee rakan, Faidzil El León Fasya

Jinoe neu baca, lanjoet karangan
Syuruga lapan, meusoe poe jeumba
yang phon FIRDAUS , Syurga geuboh nan
Asoe di dalam, cukop sempurna

Meusoe yg khusyu’ dalam seumbahyang
Jatah ureung nyan, pulang syuruga
Geutunai zakeut, jaga kemaluan
Amanah sajan , hantom meutuka

JANNATU ‘ADNIN, dua geuboeh nan
Meusoe meu iman , Allah ta a’la
teumpat Meukumpoi , muttaqin sinan
Yg surohan Tuhan , mandum keurija

JANNATUN NA’IM , keulhe geu peunan
Perak ngoen intan, pudoe Mutia
Yang Amai Shaleh, sinan balasan
Peunulang Tuhan , keupada Hamba

JANNATUL MA’WA, keupeut hai Taulan
Geubri lee Tuhan, Meusoe yang saba
Yang keukang Nafsu, bak buet salahan
Gobnya geulang, JANNATUL MA’WA

Meuyang keu limong, Nan DARUS SALAM
Balasan Tuhan, taat lam donya
Amai yg Shaleh, meusoe kerjakan
nyan Darussalam , neuteume rasa

Syurga keu nam, cipta lee Tuhan
Hamba Pilihan, buet salah hana
DARUL MAQAMAH, Tuhan neuboeh nan
Yg kuat Iman, masa lam donya

Teuma keutujoh, meumeuh ngoen intan
Allah neuboeh nan ,AL-MAQAMUL AMIN Nama
Keu Ureung Mukmin, Keunan geupulang
Seubab taqwaan, masa lan donya

JANNATUL KHULDI , Meuyang keu lapan
Hana bandengan, sinoe lam donya
Ureung yg Taqwa, han geusiakan
Ban janji Tuhan, Hana Meutuka

'Ohnoe mumada , tamat karangan
Harab lon tuan, jeut neupeuguna
Le adoe Adoe Fadhil, yangka geupeusan
Patna kesalahan, peubeutoi sigra

" NURAKA 7 (TUJOH) "


 Pengarang : Akhbar Al-Mutawassila

Assalam'alaikum, wareh ngon Ikhwan
Keumandum Rakan, Agam ngon Dara
Sigala Pujoe, meuwoe keu Tuhan
Yang peujeut Alam, ban sigom Donya

Seulaweut saleum, ateuh jonjongan
Pang Ule Alam , rasul mustafa
Ateuh keuluarga, dan sahbat sajan
Seutia han ban , si umu masa

Nibak uroe nyoe, na bacut Nazam
Beujeut peuringatan, keu Sahbat Dumna
Neubri ya Allah, keulon ilham
Dalam Tulesan, beuna keuh makna

Dalam Nuraka, na 7 Baa-ban
Arti hai rakan, Pintoe Nuraka
Pintoe HAWIYAH, yang phon geupeunan
Teumpat hukuman, Munafek nama

Pintoe kedua, JAHIM geupeunan
peusyarikat Tuhan, Sidroe yang esa
Pintoe yg keu lhee, SAQAR geu bohnan
kaum Sabian , sinan teumpatnya

Pintoe yg keu Peut, LAZZA hai Rakan
Teumpat Hukuman, yg Tumpok harta
Pintoe HUTHAMAH limoeng hai Taulan
meusahoe keunan , Yahudi nama

Pintoe yg keunam, SA'IR geuboh nan
Azeub hana ban, Apue meubura
Pintoe keu Tujoh,meu WAIL hai taulan
Urueng Seumbahyang , meukhusyu' hana

Memada Ohno, nazam hai rakan
Seubagoe peringatan, hudep lam donya
meunyo na salah, meu'ah hai taulan
Nazan lon tuan, golom seumpurna

HIKAYAT AULIYA TUJOH - ISEM 7


 HIKAYAT AULIYA TUJOEH (Isem 7)

Keuneubah Ureung Awai
di Upload keumbali oleh : Akhbar Al-Mutawassila

Bismillahirrahma nirrahim, 7 boh isem that mulia
Ibnu Abbas poe riwayat, jeuet keu ubat raja peunawa
Sabda saidi nabiyul karim, tujoh boh isem neuyue aja
Neuyüe peureunoe dum keu aneuk, nameung jarak mara bahaya

Bek jipeurap iblih syaitan, beureukat deungon nama aulia
Antara Musa deungon Muhammad, ureueng nyan meuhat saboh masa
Dalam tafse syhiet geuriwayat, nan ngon sifat geupeunyata
Suratul Kahfi bak jus subhan, sinan taulan dhahe nyata

Padum-padum firman Tuhan, neuajarkan nabi kita
Ureueng 7 lapan ngon asee, that meuteuntee kalam rabbana
Ashabul kahfi ureueng tujoh, barang see troh jarak bahaya
Sangkira tasurat nibak rumoh, peunyaket gadoh jarak bahaya

Adak geutot reumoh han teutong, Tuhan tulong ngon seubabnya
Dum peuncuri han jikarat, seubah beureukat nama aulia
Ngon rizeuki keumudahan, kurnia Tuhan rabbul asma
Buket tasurat nibak biduk, han le duduk barang jan masa

Hanle karam dalam laot, beuthat ribot nyang that lageena
Jarak tupan jeuch bakat, deungon beureukat nama aulia
Gadoh riyeuek ngon geulumbang, meungna taulan surat mulia
Han Tuhan bri geutanyoe meukarat, seubab beureukat asoe guha

Aneuk miet moe nyang that sangat, tasurat isem tujoh nama
Lheuh tasurat bak keureutah, teuma takeubah bak teumpatnya
Atawa taboh dalam bantai, hanle sagai jimeujaga
Jimoe hanle ji eh mangat, seubab keuramat nama aulia

Ureueng meugoe nak got pade, tasurat lee nama aulia
Surat bak kayee haraf beukeunong, diteungoh umong nyan tapula
Sigala peunyaket hanle keunong, tikoh geusong hanle jilingka

Ubat mumang nyan pih jroh that, tasurat bak keunong keutika

Oh saree lheueh nyan tasurat, teuma talipat pantaih sigra
Bak sapai unun nyan taikat, kurnia hadharat sijuek anggota
Mumang gadeh tuboh mangat, deungon beureukat nama aulia
Teuma ureueng nyan jeuet keubidan, tasurat taulan deungon sigra

Lheueh tasurat teuma talipat, laju taikat bak uram pha
Bak pha unun nyan taikat, tulong hadharat budak keulua
Aneuek ngon nang jeuet seulamat, deungon beureukat asoe guha
Budak teubit deungon mangat, karunia hadharat Tuhan nyang esa

Sangkira tamee bak meuhukom, meunang he kawom dakwa gata
Tangui surat wahee taulan, keunoeng aturan narit gata
Bak sapai unun nyan taikat, meunang meuhat dakwa gata
Peue nyan takheuen dum han salah, han soe teugah ubak gata

Beutapateh deungon seusungoh, sit beutatroh bak keupala
Sit beutangui beurangkajan, kurnia Tuhan jarak bahaya
Sangkira gata rhoeh pubuet salah, keunong amarah teumeureuka

Watee tangui surat, jipeumeu’ah meuhat hanle meureuka

Sangkira tabi bak inong madeung, burong bajeueng han jeuet ji daya
Hanjeued jijak ummi shubyan, meuteumee meunan ban sabda.
Bek gata syhen upah tabri, meunghan pakri meuteumee laba
Deungon seubab tatroh surat, neubri beureukat ubak gata.

Ummi shubyan inong syeitan, jidaya insan budak keulua
Meungnyoe tasurat jarak jithat, deungon beureukat nama aulia
That jitakot ngon jimalee, meunan meuteumee dalam sabda
Faedah le that han ek peugah, malainkan Allah nyan ek hingga

Jeut-jeut rumoh dum bak tatroh, supaya jeuoh mara bahaya
Wahe taulan troih surat nyoe, aduen adoe dum bak rata
Adat han jeued tasurat keudroe, peu upah adoe tabri beulanja
Kahan jeud droe gop tapeu upah, beulanja taboh dum sikada

Ngon reuzeuki pi h keumudahan, seubab taulan nama aulia
Reuzeuki mudah bahaya gadoh, soe nyangna troh nama aulia
Beureukat keuramat isem tujoh, Tuhan peutroh ban nyang sabda
Subhanallah wabihamdihi, maha suci Allah taala

Gadoh beunci teuka gaseh, meungna tapateh kalam rabbana
Subhanallah walhamduilillah, nyoe Ion kisah nama aulia
Tuhan tulong nibak malang, nyoe Ion karang seun-seun sibanja
Lon teueng beureukat nibak guree, Ion teurajee nibak ulama

Lon peu aceh jus subhan, tulong Tuhan beu ek lon rika
Supaya meuphom bak ureueng deungo, nyang na ileumee dum sikada
Deungon mujizat sigala nabi, bak Tuhan bri iman sampurna
Kalam Tuhan bak ek lon seu-on, hingga ajai lon hilang nyawa

Deungon beureukat kalam Allah, lailahaillalah bak ek lon kata
Bak ek lon teumee ucap dua kalimah, pujoe Allah Tuhan nyang Eusa
Watee seukreut beuseulamat, soe kayeem ingat kalimah mulia
Deungon beureukat ayat Qur'an, firman Tuhan nyang that mulia

Firman Allah dalam Qur'an, dumna taulan bek talupa
Qalal lahu taala am hasibtu, anna ashhabal kahfi warraqim
Kanu ayatina ajabaa, deungoe he sahabat dum teurata
Neudeungo nibak ganiyul naim, makna raqim neucalitra.

Lhee droe ureueng syre digampong, jak lam gunong meudewana
Taqdirullah meudhahe kudrat, nyum rhot langet ateuh keupala
Ban jikalen lalu jiplueng, seun roet meuteumueng saboh guha
Guha batee sangat indah, itamong pantaih sigra-sigra

Jitamong ban lhee le udalam, takdi Tuhan nyang kuasa
Oh saree troh jih udalam, teutop yoh nyan pintoe guha
Guha teutop le ngon batee, pakri lagee lheueh ulua
Ureueng lhee droe yohnyan susah, apoh apah duka cita

Lalu jimarit sabe keudroe-droe, pakri geutanyoe teubiet ulua
Barang kakri han ek tailah, meukon bak Allah tameupinta
Peue na amai Tuhan Teurimong, jinoe tateung sinan punca
Talakee bak Allah dum teujinoe, beuleupah geutanyoe nibak bahaya

Coba ingat dum geutanyoe,, tangadu droe bak Rabbana
Teuma seu-oet rakan sidroe, geuhareutoe bak nyang dua
Nyoe tadeungoe ulon hareutoe, masa saboh roe lon keu raja
Nibak kaum lon mustajabah, jinoe lon peugah bak rabbana

Lon peu upah peubuet amai, lon bri pangkai ngon beulanja
Ban nyang maklum lon bri meuhat, lon peuadat barang jan masa
Bak siuroe upah kameuhat, meunan adat ulon keureuja
Nibak siuroe Tuhan teukeudi, sidroe faki ban jiteuka.

Rupa pih got shaleh hansoe, ureueng lakoe that taqwa
Ulon teupeudong lon yue, ibadat, upah meuhat ulon peuna
Ulon teukheun bak ureuengnyan, tadong kaman sinoe gata
Taibadat sikhan uroe, upah dumna kubri keugata

Sadum ngon upah nyang si uroe, tadong sinoe muda bahlia.
Oh jideungo lon kheun meunan, meudakwa han ureueng muda
Teuma jidong sikhan uroe, Tuhan jipeujoe hana reuda
Peujoe Tuhan hana khale, seulawuet keunabi hana reuda

Oh troh bak kheut sikhan uroe, jilakee droe jih jigisa
Lon bri le upah ban nyang janji, lalu faki le ji gisa
Ureueng nyang dilee teuma jisudi, padumna neubri keu muda balia
Teuma lon peugah ban nyang lon bri, beungeh faki yang pertama

Ngon amarah jikheun han patot, dumnan tabri beulanja
Lon nyang peubuet siuroe seuntok, sadum syiet tajok tabri beulanja
Yohnyan beungeh bukon bubarang, ka jiriwang le jigisa

Upah tinggai jih jiboh droe, ulon deudoe susah teuka

Upah jih tinggai leumo lon bloe, usaha droe lon peulara
Leumo meu-aneuek hana teudoh, hingga troh ploh peunoh blang raya
Leumo saboh nyang asai phon, troh-troh bak thon aneuek Jihna
Padum lawet akhe dudoe, ureueng saboh roe kajiteuka

Umu tuha sangat dha’ef, that kaleumoh jeut-jeut anggota
Oek kaputeh gigoe kateulhoh, teuot leumoh hana tara
Lalu jingadu bak lon sidroe, upah saboh roe laju jipinta
Leumoe pihlee kajeud baklon, katroh rukon bak lon kira

Ulon peuteunyok teuma upah, leumoe bahrullah milek gata
Teuma jikheuen lon peu-ayang, hana sayang ulon katuha
Ulon meusumpah auwalabillah, sabet nyoe sah milek gata
Ulon peugah hal keulakuan, diasai phon lon calitra

Oh jideungo lon kheun meunan, galak yohnyan ureueng tuha
Teuma jipeuwoe leumo habeh, jih lon gaseh hate suka
Nyan keu amai lon he tolan, nibak Tuhan lon teueng pahla
Ya Tuhanku neutulong kamoe, lon peubuet nyoe karena gata

Ya Ilahi polan ya rabbi, keu lon neubri jalan keulua
Meunyo ikheulah amai lon nyoe, beuleupah jinoe nibak guha
Kalam pih rhot nyan dibabah, gunong peungeuh bacut meucahya
Bahroe leumah cahaya uroe, jiyue lom dudoe bak taulannya

Cuba digata mohon bak Allah, kadang meung teuhah pinto guha
Teuma meututoe sidroe taulan, dilon pih rakan bah lon cuba
Saboh masa yoh saboh roe, deuek that nanggroe makanan hana
Makanan lee bak lon sidroe, laen sinaroe hana sapat na

Teukeudi poe Tuhanku rabbi, grak teukeudi ateuh hamba
Inong dara teuka bak kamoe, ngon sambinoe jroh that rupa
Reupa that jroh hana lawan, tamse intan cahya muka
Jijak lakee bak lon makanan, yoh masa nyan peuhasee na

Yoh masanyan deumpue murah, kareunia Allah atueh hamba
Jilakee makanan baklon sidroe, dara sambinoe jroh that rupa
Puena makanan teungku sinoe, ulon jinoe lapar dahaga
Adakna makanan tabri jinoe, deuek uroe nyoe hana tara

Wahe teungku kaseh sayang, neubri makanan keu lon sigra
Suara maneh han tapeugah, rupa indah sang meutia
Reupa sambinoe jroh that laku, ulon napsu teuka hawa
Teuma lon kheun bak ureueng binoe, ulon teuh nyoe napsu keugata

Tadeungo lon he sambinoe, ulon teunyoe teuka hawa
Nyan keugata hate lon that, peue nyang hajad ulon tapeuna
Meungta peutroh napsu lon nyoe, lon bri jinoe peue tapinta
Adak napsu keumueh pirak, peue nyang galak lon bri sigra

Ban jideunog lon kheun laku, tapreh dilee siklep mata
lon jak tanyong bak suami, meungka neubri ulon teuka
Lheueh jikheun Nyan dara sambinoe, jitren jiwoe pantaih sigra
Jiwoe laju pantaih rijang, jijak kheun ban bak judonya

Oh sare troh bak suami, jitanyong kri pantaih sigra
Habeh jipeugah gop meukeusued, teuma jiseu’ot peue salahna
Ka jilakee jak leh tabri, meung bek matee aneuek cut raya
Lheueh nyan jijak ureueng binoe, janji beunoe ka jireula

Teuma lon kheuen bak ureueng binoe, ta-ek keunoe pantaih sigra
‘Oh jideungo lon khuen meunan, ji ek yoh nyan pantaih sigra
‘Oh sare troh ji ek baklon, lalu ji lhon leumah anggota
Jipinah ija leumah aurat, lon maken that teuka hawa

Oh sare rap ulon keunan, beurahi yohnyan hana tara
Ureueng binoe yoh masanyan,leungo badan jeut-jeut anggota
Teuma lon tanyong bak ureueng binoe, pakon meunoe leungo anggota
Ureueng binoe teuma seu-ot, seubab lon takot keu Rabbana

Ngon leumoh leumbot nyan jiseuot, jikheuen jitakot keu Haq ta’ala
Seubab lon takot nyan keu Tuhan, leungoe badan yoe anggota
Ban lon deungo meunan jipeugah, lon pih susah hate lam dada
Leumoh ngon teuboh teumakot asoe, lon tanyong proe pantaih sigra

Pakri tatakot nyan keu Tuhan, lon sukaran hana tara
Ureueng binoe lom jiseuout, leumoh leumbot ngon suara
Allah he teungku lon takot that, seksa sangat dalam Nuraka
Nyan keuseubab leungoe badan, lon takot keu Tuhan teumeureuka

Peujeud mangat teungku disinoe, pagee deudoe talop nuraka
Peujeud mangat sinoe dinanggroe, page deudoe talop nuraka
Teuma lon kheuen bak ureueng nyan, bit kong iman that digata
Lheueh lon kheun nyan teuma deudoe, lon pi hansoe teumakot raya

Ulon takot keu potallah, teuka susah dalam hate
Lon top lee aurat bued han jadeh, teuma lon weh pantaih sigra
Buet han jadeh lon toep aurat, teuma lon tobat gon naseuha
Ulon tobat lon bri kifarat, kateuhah surat kateubuka

Lon bri seudeukah keu ureung binoe, jitren jiwoe bak judonya
Nyan keu amai kalon peugah, meunyo ikheulas bak leumah tanda
Ya Tuhanku Neudeungoe kamoe, lon peubuet nyoe kareuna gata
Jikalee neutueng amai lon nyoe, bak leupah jinoe dalam guha

Lheueh jikheuen nyan gunong pih teuhah, deueh leumah nyan ulua
Deueh leumah mata uroe, peungeuh meuseumproe ban saboh guha
Ji-eu ulua leumah deumpue, peungeuh meuseumpreu sigala donya
Han syhiet najeud lom jiteubiet, mantong meugrit dalam guha

Teuma meuteutoe sidroe treuk rakan, nyan keu tolan keutika
Dilon pina yoh saboh roe, bakti lon nyoe keu ibu bapa
Ma lon ngon Ku tuha neuh that, lon hareukat mita beulanja
Lon teueng upah keubeu kameng, keu nafakah ibu bapa

Geunap uroe prah ie rabin, keu minuman droenyan bandua
Beungoh seupot peuwoe ie rabin, syiet that yakin keunang bapa
Seuntok-seuntok meunan sabee, hana lale esaboh keutika
Bak siuroe teukeudirullah, hujeun johjah troh ngon sinja

Uroe pih seupot ulon woe, ayah du droe teungeut indra
Ngon ie rabin mat dijaroe, ayah dudoe lon preh jaga.
Ayah ngon ma teungeut pingsan, lon dong sinan lam seupot buta
Simalam seuntok lon dong sidroe, ayah kamoe han ek jaga

Phon sinja kon hingga suboh, hana saboh pih na jaga
Hate lon gundah bukon bubarang, mangkong lon tatang diphon sinja
Lon dong sidroe dalam seupot, hate teumakot aleh teureuka
Kadang marah ma deungon du, pakri laku dosa raya

Meunan teupike dalam hate, lon dong sabee lam seupot buta
Awai seuboh teukeudi Tuhan, jaga yoh nyan ayah ngon ma
Neubeudoh eh neukalon ulon, lon cok mangkong pantaih sigra
Bak neusangka ulon bantroh, mangkong neutroh neutron lanja

Neutroh ie rabin yohnyan rijang, jak seumbahyang peujoe rabbana
Lon pi lontron yohnyan rijang, jak seumbahyang ngon ayahanda
Ayahanda ngon ulonnyoe, malam uroe pujoe Rabbana
Lheueh seumbahyang barangkajan, jak teueng upahan bak ureung kaya

Ulon peulihara ureueng dua droe, han lheueng uroe mita beulanja
Ranub pineung bu ngon ungkot, beungoh seupot lon jak mita
Lon bloe ija deungon bajee, nabek malee bak ureueng lingka
Yoh masanyan lon that jeumot, sira payot lon jak mita

Lon tueng upah keubeu kameng, jeup-jeup gampong meureuraba
oh troh watee lon seumbahyang, rijang-rijang pujoe rabbana.
Kareuna ulon peudeh untong, pat-pat meuteumeung ureueng kaya
Hana peuyoh pi meusiat, lon hareukat mita beulanja

Teupangge teuma seun-seun sidroe, woe unanggroe keukalbaka
Oh lheueh lon tanom bandua droe, teutap lon nyoe hanle goega
Meunan keubuet ulon sidroe, masa saboh roe lon keureuja
Nyan keu amai ulon tuan nyoe, beuleupah jinoe teubiet ulua

Ya Tuhanku neudeungoe kamoe, lon peubuet nyoe kareuna gata
Meunyo ikheulas amai lon nyoe, bak leupah jinoe ya Rabbana
Kalam pi lheueh gunong pi teuhah, yohnyan leupah teubiet ulua
Takdirullah meudhahe dali, ban lhee meuhat leupahulua.

Yohnyan geuteubiet ureueng lhee droe, meunan adoe sabohcalitra
Meunan keudum nyang riwayat, deungo hesabat bandum beurata
Makna raqim neukheun leukh batee, meunan meuteumee saboh calitra
Ashabul kahfi sinan meusurat, katroh meuhat pintoe guha

Subhanallah polan rabbi, ashabul kahfi ulon calitra
Ashabul Tauriah nyang riwayat, neudeungoe bak sahabat saidina umar
Bak siuroe Tuhan teukeudi, lhee droe yahudi keunan teuka
Lhee droe yahudi teuka keunan, meuteutoe yohnyan sidroe pendita

Ngon tuan Umar yahudi peutoe, jitanyong keubit jipareksa
Yahudi jidong dihadapan, jitanyong yohnyan pantaih sigra
He ya Umar ikot Muhammad, peutimang umat mat neuraja
Gata raja bak masanyoe, peutimang nanggroe peukong agama

Jinoe kutanyong dum masalah, beutapeugah he ya Umar
Meungjeud tapeuglah masa alah nyoe, reumbang bak kamoe agama gata
Meung hanjeued tapeugah masa alah noe, kon bak kamoe agama gata
Nyow Muhammad sibeuna nabi, han meu ungki kamoe dumna

Nabi Muhammad nyoe keurasul, kon barangpue tipu daya
Saidina Umar deungoe meunan, neujaweub yohnyan pantaih sigra
Cuba tanyong he yahudi, tulong rabbi akan hamba
Lalu jitanyong lee yahudi, langet peue gunci ngon tabuka

Kubur jijak ngon asoe-asoe, peuingat keudroe kon manusia
Bukon jeuneh jen wahee saidi, beurapa lagi masa alahnya
Limong peukara jinoe lon tanyong, hana jikandong le ibu bapa
Nyan limong nyan peugah meuwaham, peugah bak keunong bek meuriba

Manok keukuuk peue jipeugah, takheuen bak sah tapeu nyata
Jicangguek peue jikheuen jinoe, mirahpati peue jikata
Bah keu dumnan dilee siat, cuba taingat ubee nyangka
Ube nyangka ulon peugah, jinoe tapeugah he ya Umar

Saidina Umar teundok ulee, meunyum malee bak pandita
Teundok ulee u beumoe, sira neumoe ro ie mata
Hanjeud neupeugah tanyong yahudi, hana Tuhan bri ileumee udada
Lalu jibeudoeh pendeta yahudi, ka jikheuen kri pantah sigra

Nabi Muhammad bukonnya nabi, jinoe meu ungki kamoe dumna
Agama Islam nyo bit bateue, nyoe barang peue tipu daya
Teu iem yohnyan dum iseulam, meunyum masam ngon ie muka
Pandita yahudi maken girang, Sulaiman geureuntang pantah sigra

Na seukeujab yahudi girang, meugeureuntang ngon suara
Nyam geupeunan Sulaiman Farisi, he yahudi deungoe hamba
Piyoh siat he yahudi, Saidina Ali jeh ka teuka
Meuban leumah Saidina Ali, teu iem yahudi seukeutika

Saidina Ali pihtroh keunan, Umar yohnyan hate that suka
Yohnyan neubeudoh neumat jaroe, sigra neumoe roe ie mata
Mumat jaroe ban nyan adat, hatee mangat Saidina Umar
Lheuehnyan teuma na seukeujab, Sulaiman isyarat Jaweub sigra

Na seukeujab lheueh nibaknyan, Ali yohnyan lalu berkata
Peue jitanyong lee yahudi, Sulaiman Farisi neu calitra
Yohnyam meututo eSaidina Ali, bak yahudi neuberkata
He yahudi jinoe kupeugah, peu masalah tanyong gata

Jinoe katanyong he yahudi, jaweub lon bri tanyong gata
Rasulullah neupeubeut ulon, ilemee meuphon dalam dada
Meuribee pinto enibak ileumee, Allah bri thee nibak hamba
Insya Allah cuba tatanyong, bak keunong-keunong soal gata

Teutapi na hajad kamoe, tangoe jinoe he pendeta
Meunyoe tatem tamong iseulam, ulon bri pham tanyong gata
Meunyo tatem ucap dua kalimah, jinoe lon peugah ubak gata
Jinoe lon jaweub dalam taurat, ban nyang narit nabi isa

Jaweub yahudi jikheuen na’am, Saidil anam nyoe sibeuna
Nyoe Muhammad sibeuna nabi, han meu ungki kamoe dumna
Nabi Muhammad Rasul Allah, suroh Allah neukeurija
Ulon masuk agama Muhammad, bak lee rahmat keukamoe dumna

Teuma jitanyong lee yahudi, ubak Ali jipareksa
Saidina Ali teundok ulee, neungoe leku tanyong pendeta
Phon jitanyong lee yahudi, Saidina Ali neudeungoe nyata
Pintoe langet pue boh gunci, wahe Ali peu ngon buka

Meusyrek barullah jaweuh Ali, Nyan keu gunci laen hana
Ureueng meusyeurek amai jihtan, neutop le Tuhan pintoe dumna
Aneuk gunci ta-ucap syahadat, langet meuhat pinto teubuka
Pinto langet tujoh lapeh, bandum habeh kateubuka

Kafe meusyeurek meugunci meuhat, taucap syahadat mangat teubuka
Lom meututoe Saidina Ali, he yahudi tanyong lanja
Teuma jitanyong le yahudi, ubak Ali jipareksa
Kubu jijak asoe didalam, jinoe tabri pham keukamoe dumna

Jaweub Ali tanyong yahudi, neupeugah kri pantah sigra
Kubu jijak asoe didalam, jinoe tapham he pendeta
Nyam keu ungkot ‘ued nabinoh, jime ban saboh ulaot raya
Nyan keuh kubu jijak ngon asoe, laen sinaroe meunan hana

Kubu jijak asoe didalam, nyankeu tapham he pendeta
Loem jitanyong le yahudi, ubak Ali jipareksa
Na sapue treuk wahe kawom, deungoe bandum cuba peunyata
Geukheun kon jen bukon insan, saleh peu nyan he Saidina

Jaweub Ali laju rijang, neupeugah nan bak pendeta
Nyan keu sidom nabi Sulaiman, bak turunan he pendeta
lom jitanyong le yahudi, ubak Ali Jipareksa
Limong peukara jinoe lon tanyong, hana dikandong uleh bunda

Saleh peunan nyan hai Ali, pue geuraksi cuba peunyata
Jaweub Ali pantah rijang, neupeugah ban limong peukara
Nama nyang phon nabi adam, nyan keu tapham nyang pertama
Nyang keudua nabi Saleh, keu lhee habeh Ibrahima

Keu peut sidom nabi Sulaiman, binatangnyan asoe syuruega
Nyang keu limong tang jinoe, nini geutanyoe tuan Ti Hawa
Lom jitanyong le yahudi, he ya Ali peugah lanja
Manok ku’uk uroe malam, nyan tabri pham keu kamoe dumna

Peue jipeugah nyan jiku’uk, that biet khusyuek ta eu rupa
Jitangah ulanget tikui ubumoe, sang-sang jimoe ta eu rupa
Ulee meuanggok got that lagee, peu jibri thei manok berkata
Jikupruk sayeup anggoek ulee, keubiet that lagee jiberkata

Jitangah peue jikheuen jitikui peue jikheuen, peuleuheun-leuheun nyan jikata
Leumoh leumbot suara peuleuhuen, that biet hireun ta-eu rupa
Jipeugah peue uroe malam, jinoe tabri pham ya Saidina
Jaweub Ali tanyong yahudi, neupeugah kri manok berkata

Jikupruk sayeub jirukuek sujud, Tuhan makbud han jilupa
Kupruk sayeub laju sajan, jipujoe Tuhan rabbul asma
Kupruk seyeub anggok ulee, siet that jibithee manusia
Seureuta jikheun “Uzkurullah minal ghafilin”, wahee mukmin bek that lupa

Jipeu ingat keu Potallah, bek that tahsyah ingat keu donya
Nyan keuh jikheun manok ku’uk, takalon khusyuek yoh berkata
Jipeu ingat ureung nyang laloe, bah jithei droe ateuh rhueng donya
Han athei droe peuneujeued Tuhan, page taulan tamoeng nuraka

Manok ku’uk nyan jipeugah, tapham beusah he pandita
Lom jitanyong lee Yahudi, ubak Ali jiyue calitra
Suara guda tangoe meuhie-hie, jinoe takheuen kri peu jikata
Jaweub Ali tanyong yahudi, guda meuhie-hie neupeugah makna

Tangoe kupeugah he yahudi, guda meuhie-hie nyoe jikata
“Allahumma anshuri ‘ibadina, mükmini ‘alaika farina”
Nyan keu do’a jih keu mukmin, jilakee yohnyan uleh guda
Bak meunang mukmin beutaloe kafe, guda meuhie-hie nyan keu mkana

Lheuh neupeugah uleh Ali, pandita yahudi tanyong lanja
Dimirah pati peu jipeugah, hireun dahsyah ta-eu rupa
Sang-sang jikheun krakbu-krakbu, meunan lagee ngon suara
Ali deungoe jitanyong meunan, neupeugah rijang pantah sigra

Dimirah pati jikheun “ya hu”, jikheuen teungku alim ulama
Jiseurapa nyang teung adat glee, nyang teueng wase adat kuala
Jiseurapa geunap uroe, riyoh beunyoe geunap masa
Hana teudoh nyan dibabah, “Allahmumma sharral asyirin nyan jikata”

Ya Tuhanku neubri laknat, keu ureueng nyang tueng adat kuala
Nyan keuh jikheuen dimirah pati, he yahudi peuphom lee gata
Yahudi tanyong hana teudoh, sual cangguek neu calitra
Cangguek peu jikheuen riyoh sabe, neupeugah lee ya Saidina

Jaweub Ali pih geupeutroh, sual cangguek neu calitra
Dicangguek diucap tasbeh, lafad faseh pujoe rabbana
Hana lalee tasbieh diseubot, “subhana rabbiyal makbud” nyan jikata
Ucap tasbieh hana khali, pujoe rabbi Tuhan nyang Eusa

Salunya ahke kajibeudoh, hana saboh pitan jaga
Lom jiucap subbana rabbiyal makbud, nyan diseubut dum rata-rata
Yahudi deungoe jaweub Ali, jiucap lee kalimah dua
Kalimah jiucap seupunoh hate, ilham hadarat dalam dada

Yohnyan diucap, asyhaduanlaha ilaillah wa asyhaduanna
Muhammadan abduhu warasuluh, yahudi sunggoh masok agama
Nyang dua treuk sinan taulan, jiba iman sajan pandita
Habeh man lhee masok iseulam, treun ileuham Allah ta’ala

Teuma deudoe saboh treuk kaom, nyang saboh beuhom rukon pandita
Nyang na wareh bawa ngon biek, habeh ban dum masok lam agama
Bandum tamong agama islam, treun ileuham bak Allah ta’ala
Lheuh jimasok agama islam, jitanyong lom pantah sigra

Teumanyöng lom pandita yahudi, ubak Ali jipareksa
Jitanyong ileumee jih hana trok, oh lheueh jimasok bak agama
Yohnyan jitanyong rijang pantah, na masalah nyang goh lon buka
Nyoe na saboh masa alah, jinoe tapeugah ya Saidina

Jaweub Ali rijang le pantah, tanyong beuhabeh uleh gata
Tulong Allah mu’jizat nabi, jaweub ulon bri tanyong gata
Yahudi deungoe tutoe Ali, jitanyong le pantah sigra
Ureueng zameun geukheuen tujoh droe, hana geutousoe geukheun nan

Lhee reutoh sikureueng thon siblet matee, teuma hudep lee misue nyangka
Nanggroe geuh pat nama geuh soe, ureueng tujoh droe matee lam guha
Asee saboh matee sajan, nyangkeuh lapan geujak tapa
Ureueng tujoh lapan ngon asee, that meuteuntee geujak tapa

Geujak tapa dalam gunong, teuma geutamong dalam guha
Peunan guha peu nan gunong, nyan keuh lon tanyong ubak gata
Jinoe tapeugah he ya Ali, lon deungoe saree bandum rata
Syhiet nyan kateugrak tanyong kamoe, tapeugah jinoe ya Saidina

Saidina Ali lheuh neupike, neujaweub lee pantah sigra
Yohnyan neujaweub uleh Ali, sabda nabi neucalitra
Na terseubot dalam Qur'an, sifeut kauwabin ban seunia
Ashabul Kahfi ban tujoh droe, di Rom nanggroe teumpat ayahnda

Mideun kuasa nan Bariyah, jaheliah nyang boh nama
Ureueng islam nama teuseubot, meunan pocut dalam calitra
Seulayeu keurajeuen Milik saleh, malem pih leubeh lagi wara'a
Lheuh matee nyan teuma deudoe, laen meugantoe nyang beragama

Keurajeun Qianus teuma deudoe, raja pindoe tan agama
Qianus nyan raja parsi, jimeu ungki keu agama
Jirabee kameng dijih dilee, hana soe thee jeud keuraja
Takdirullah meudahe kudrat, meuteumee teumpat yup kayee raya

Diyup kayee sinan jipeuyah, kameng pitroh keunan teuka
Na sikeujab Qianus piyoh, kameng pitroh sangat dahaga
Jikurek tanoh jikeumeung bri ie, Tuhan teukeudi lalee mata
Jikurek tanoh yoh masanyan, leumah sinan peutoe raya

‘Ohban ji eu leumah peutoe, peurab jaroe lee jibuka
Teuma jikalon keureutah jroh-jroh, Qianus ploh yohnyan sigra
Meusurat didalam misue kitab, hafad jroh that hana tara
Qianus mee u meunasah, bak tuan syiah jiyue baca

Oh meuteumee deungon teungku, jijok laju surat dumna
Cuba teungku baca surat nyoe, kuteumee beunoe lam peutoe raya
Saboh peutoe beunoe ku teumee, diyup kayee lon ku-eh teujaga
Lon kurek tanoh bri ie kameng, teuma meuteumeung peutoe raya

ie kameng han meuteumee bri, lalu peureugi ubak gata
Lee that teungku surat didalam, han jeut lon pham pueh that bahasa
Peunoh peutoe surat didalam, han jeut loan pham laen bahasa
Nyan keu seubab lon mee keunoe, cuba baca nyoe pue khaba

Qianus jok surat keunan, teungku syiah nyan jeut neubaca
Syiah nyan tuha umu kazameun, seulayeue kheurajuen nabi Musa
Surat neubaca bahasa dilee, syiah nyan neuthee umu ka lama
Khaba lam surat that meulakab, bahasa kitab nabi Musa

Masa raja bumoe peureulan, ngon meuh sajan ji’uej lanja
Masa karon ji’uej le beumoe, seurapa sidroe nabi Musa
Nabi Musa yue boh zakuet, bek jicarot Allah taala
Jikheun tapeubuet nyang han patot, buet nyang karot takeureuja

Nyan keu seubab raja Qaron, beumoe peureulan uyuep donya
Man ji ikot nabi peugah, nabi ditukah jikheuen meuzina
Dua blah mon peunoh limpah, syiah nyan peugah neucalitra
Syiah nyan peugah bak Qianus, meuh peunoh jeueb teulaga

Qianus tanyong jinoe pat teumpat, tajak kueh tateueng dua
Teungku syiah nyan peugah teumpat, Qianus meutot-tot hate lam dada
Nyum beuhabeh lee jiangkot, teukeujot-keujot hana reuda
Nyum-nyum hanjeut meung jijakle, dijih hate pungo gila

Qianus woe le u reumoh, jihei mehmoh isterinya
Hoka gata ma sidapu, tajak laju keunoe sigra
Taseurung lham keunoe rijang, kumeung jak ublang kueh teulaga
Hana pat bri lee ie kameng, tamee reujang keunoe sigra

Ureueng binoe teuma seu-ot, pakon oh seupot takueh teulaga
Adak malam pih leumah deuh, buleuen peungeuh pue gundah gata
Ureueng binoe teuma seunyung lham, Qianus u blang jijak lanja
Jijak laju pantah-pantah, reubah leupah jibeudoh lanja

Meungreb leupah ‘isya katoe, Qianus sidroe jijak lanja
Na sikhan roj Qianus jak, teuma meureumpok iblih ceulaka
Teudong diroj misue syiah, hana ubak misue ulama
Qianus kalon yohnyan gadoh, ureueng keumiet meuh nyan jisangka

Qianus kalon hana ubah, meu bajee jubah sang aulia
Bak malam nyan jikalon dueh, ureueng peuwoe meuh nyan dimata
Iblih jikheuen bak Qianus, bak that mehmoh tajak gata

He Qianus tadong dilee, kadeungo kee ku calitra

Kajak riwang dilee pantah, kapoh syiah nyan beufana
Kapoh syiah nyan beumatee, meuh nyan beklee kaweuk dua
Mangat habeh katueng keukah, jak leh pantah kapeu fana
Oh jideungo iblih peugah, dum geukuebah dalam dada

Teuma teupike dalam hate, kupoh mate syiah ceulaka
Keubiet kupoh syiah nyan dilee, kutueng keukee dum areuta
Meunan leumah dalam hate, ka teukeudi syaitan daya
Qianus riwang lee u meunasah, teungku syiah jijak mita

Teuma ji ek u meunasah, pantah-pantah peudeung diraba
Jikeumeung cang teungku syiah, neukheun pantah meunoe khaba
He Qianus tadeungoe ulon, meuh galian han lon hawa
Beuthat bek tabri meuh keu ulon, tacok bandum milek gata

Qianus kheun pue kapeugah, meunggoh kujak kuh syhit han hawa
‘Oh kujak kueh hak malam nyoe, seupot uroe kaboh dakwa
Qianus beungeh muka mirah, jitop lee syiah mate fahna
Qianus top bak ulee hatee, syiah nyan matee gadoeh nyawa

Keunong kutika rhoh that watee, han saboh thei manusia
Syiah jipoh hana soe thei, reumbang watee jroh kutika
Akhe zameun teuma meugah, Qianus dahsyah kajeut keu raja
Han hasee lee leudoe meugah, Qianus leupah keurajeun raya

Matee syiah bak malam nyan, jikueh yohnyan meuh ban nyang na
Jijok keuraja meuh nan geudong, peuleuh untong beklee bila
Jijok keumeuh ban nyang nabsu, hingga meusyeuhu troh bak raja
Raja neubri mideun Qianus, teumpat makruf meuneu en raja

Yohnyan Qianus kaya leupah, meuh bahrullah han ek kira
Sinan keuteutap keujadian, Qianus nyan kaya raya
Areuta lee rakyat meukatoe, jiprang nanggroe hana reuda
Sinan gampong sinan nanggroe, teuma deudoe jiprang raja

Habeh taloe nanggroe jiprang, deudoe jiriwang jiprang raja
Raja taloe putroe jitueng, habeh pulang dum areuta
Taloe raja jitueng nanggroe, jitueng putroe keumala donya
Teutap jitueng keujih nanggroe, jipeugot meuligoe saboh nyang raya

Dum jeuneh meuh pirak hupam, luah dalam siteuntang mata
Luah dalam saboh peureuhap, meunan peuneugah dalam calitra
Meulinggoe nyan that biet indah, meuh meutatah ngon permata
Ban siseunlingka jiboh gaseng, hana bandeng indah rupa

Peuduek diateuh dum keundi meuh, cahaya peungeuh sigala donya
Meunyuek zaiton jiboh didalam, geunap malam peungeuh rata
Meunan keuh beut raja Qianus, meuh that damoh laju teuka
Deureuham jipeugoet siploh katoe brat, meunan keuh buet seulayeu jih raja

Deureuham dilee habeh jiboh, hanalee saboh jeut-jeut banda
Raja Qianus meuh jin lee that, lurong hadharat ateueh donya
Meunyuek zaitun boh lam keundi, raja jahee boeh areuta
Dalam meulingoe kuta saboh, meutatah jroh lalee mata

Buju linteung lapan ploh hah, meuh meutatah deungon permata
Wie ngon uneun kurusi meuh, cahaya peungeuh hana tara
Na peut ploh boh kurusi meuh, jiduek diateueh nyang muda-muda
Jipeuduek aneuk ulee balang, sajan dendayang nyang jroh rupa

Hulee balang wadhe meuntroe, dum sinaroe sajan sereuta
Dum diulee kulah karna meuh, cahaya peungeuh hana tara
Kulah karna meuh ban peuet sagoe, ban mata uroe leupah cahaya
Na limong ploh aneuk miet disinan, jroh lakuan elok rupa

Aneuek bentara bandum sajan, jibri peukayan bandum rata
Dum Peukayan hijoe biroe, jroh that laku indah rupa
Warna peukayan le that indah, neupeugot meutatah ngon permata
Nibak neupeugot meuh sinaroe, intan peudoe campu meutiara

Na limong ploh aneuk miet disinan, nam droe he rakan aneuk ulama
Nyang nam droe jiboh keu wadhi, habeh pikee si ceulaka
Habeh pikee deungon ingat, kafe laknat saboh masa
Hajat jikheuen droe jih Tuhan, Qianus nyan asoe nuraka

Meung jikheuen lee aneuek nam droe, laen sinaroe rijang seureuta
Meunan pike dalam hatee, teutapi ere aneuek ulama
Aneuk nam droe laju jiboih, raja pindoe balek agama
Bak jikira troh ban hajat, troh meukeusud kafe ceulaka

Meunan pike raja pindoe, ureueng nam droe han teupeue bahasa
Pat nyang diduek raja pindoe, ureueng nam droe jarak hana
Ureueng nam droe hana jiteuhoe, laen laku pike raja
Raja Qianus meunan pikee, ureueng nam ere saboh masa

Bak masa nyan hantom jarak, han sitapak ere ngon raja
Diwie lhee droe diunuen lhee droe, hana siuroe tan seureuta
Raja Qianus waham meunan, aneuek miet nam jeut ban jikata
Jeut ban jikheuen nyan jipike, jiyue kheuen droe Allah ta’ala

Jibri peukayan meuh ngon pirak, pandang galak soe eu rupa
Pat nyang jiduek hoe nyang jijak, hantom jarak aneuk ulama
Lhee di unun lhee droe diwie, hantom meusee ban jikata
Nyang lhee diwie jimat cicem, meunan kayem rok-rok Masa

Nyang lhee diunuen dimat peunuman, asoe didalam geulumbak jeumpa
Cicem utoh that biet ragoe, jiteupeue keudroe ‘oh jibasa
Oh kajiklep jiteupeue le, keuleumbak hasee lam piala
Kheuleumbak hasee lam peunuman, teureubang cicem nyan pantah sigra

Jimee ie mawoe saboh peunuman, barang kajan geunap masa
Geunap uroe deungoen malam, peurmainan bersuka-suka
Meunyeuk ata saboh peunuman, nyan pimeunan jeueb keutika
Kheuleumbak jime saboh peunuman, neungui raja nyan got jiaja.

Peunuman meueh deungon intan, meuteurapan meupermata
Teuma jipeulheueh cicem jijaroe, sit that ragoe guna biasa
Jiteureubang dalam peunuman, lhee cicem nyan maseng jeumba
Bak ie mawoe saboh jibloh, cicem utoh goet jiaja

Bak meunyeuk ata saboh jidong, tahee mandang soe eu rupa
Bak kheuleumbak saboh jidong, rakyat teuceungang kalon rupa
Oh ka rata bulee basah, teureubang leupah ateueh raja
Jikupuk sajeuep hijo biro, meuhambo bee ateueh raja

Lheueh nyan teuma cicem jiwoe, ubak jaroe ureueng muda
Lhee peunuman munan asoe, aneuek lhee droe boh bak raja
Le that nikmat raja pindoe, meuribee bagoe syhit dumpue na
Peue jipinta syhit troh rijang, cicem teureubang jipeuhaba

Kaneulurong uleh Tuhan, jeued keutaulan binatang dumna
Dum binatang le meukawan, lurong Tuhan keuraja ceulaka
Jeued ban jikheun troh ban hajad, lurong hadharat ateueh donya
Raja Qianus biet that meugah, lurong Allah ateuh donya

Neupeulurong uleh Tuhan, jeued ban jikheuen kafe ceulaka
Le that nanggroe taklok keujih, usyur habeh keunan kana
Peue nyang jikheuen deumpeue hase, raja jahee asoe neuraka
Habeh taklok keujih meuwow. mar jikheuen droe Allah taala

Umu lhee ploh thon jikeurajeun, lurong Tuhan ateueh donya
Khabar Qianus keubiet lanjud, lon boh bacut meung keupuca
Khabar aulia punca sinoe, nyan keu jeued nyoe lon cok punca
Dilee pile raja laen, miseue firaun meugah raya

Oh lheueh firaun meugah karon, meuh jitamon han ek kira
Misue namrud leumah ngon ‘ud, bandum laknat daruhaka
Hantom saket kafe pindoe, jiyue kheuen droe Allah taala
Han sabe shiet Qianus sidroe, meuribee bagoe dijih bicara

Padum lawet jikheurajeun, hantom reunmareun keujih teuka
Hatom saket pi meu ulee, hantom layee meu ie muka
Sheit meubatok dijih pitan, lurong Tuhan dijih lam donya
Hantom mumang meung siblet, hantom saket siklep mata

Hantom timoh pih mukude, raja kafe nikmat lam donya
Jiyue kheuen droe ji potallah, rakyat jikrah sigala donya
Jikrah rakyat jeued-jeued nanggroe, jiyue seumbah droe kafe ceulaka
Soe nyang pateh sit nyo eTuhan, jibri peukayan ngon areuta

Soe han pateh jipoh mate, that bit jehe siceulaka
Umu lhee ploh thon jikheurajeuen, hantom reuen mareun keujih teuka
Lheueh nibaknyan teuma deudoe, raja pindoe rab binasa
Takdhirullah teuma deudoe, ureueng nam droe geumeupoh raja

Ureueng nam droe kheuheundak bunuh, raja Qianus rab binasa
Jimeung pakat jikeumeung poh, raja Qianus jipeu pahna
Adat kon troh sidroe meuntroe, raja pindoe rab binasa
Ureueng nam droe meucukeh-cukeh, teuma han jadeh jipoh raja

Teuma teupike dalam hate droe, kadang na soe yue poh bila
Raja tapoh geutanyoe mate, meunan pike bandum rata
Tango lon peugah sidroe meuntroe, dijih nyan toe deungon raja
Meuntroe nyan peugah bak Qianus, gata jikeumeupoh he paduka

Jimeupakat jih nam droe, gata sidroe jipeupahna
Jikheuen gata kafe pindoe, tayue kheuen droe Allah taala.
Jikheuen jipoh gata mate, jikheuen kafe tuan gata
Dolat tuanku syahi berdolat, lon peue ingat duli sripaduka

Jikheuen jipoh Raja Qianus, Jikheuen jibeuhuh tuan kita
Jikheuen jipoh tuanku droe, ulon deungo he meukuta
Meuntroe peugah jihareutoe, aneuek nam droe siat hana
Siat leupah aneuek nam droe, jihareutoe le bak raja

Ureueng nam droe leupah jak manoe, meuntroe peureunoe raja ceulaka
Ban jideungo meunan peuneugah, raja gundah pucat muka
Pucat muka yoe ngon badan, srot le yohnyan ateuh kuta
Puleh teuma srot lam ulee, kakeulayee ngon ie muka

Sit nibak phon hate gundah, teuka susah raja ceulaka
Hate gundah muka hiram, yohnyan jidam aneuek ulama
Teuma jiyue poh aneuek nam droe, ubak meuntroe ngon perdana
Ureueng nam droe jiyue peumate, raja kafe beungeh raya

Ammabakdu teuma deudoe, ureueng nam droe lon kheuen nama
Deungoe lon peugah ureueng nam droe, jroh samlakoe guna ngon raja
Dilee untong cut shit kana ngon, waze geupeunan oh ka raya
Nama nyan phon Tamlikhak. nyang that bijak nibak nyang na

Nama nyang dua beutaturi, nan geurasi meukaslimina
Martabunus nama nyang lhee, meunan meuteumee lam calitra
Ashabul Yamin nyan geupeunan, guna ngon nyan diunun raja
Nama nyan peuet Nainunis, sara bunis nyan keulima

Palyatatiyunis nama nyang nam, habeh tamat lon peunyata
Ashabul syamal nyan geupeunan, diwie raja nyan ureueng tiga
Nyang di unun pih na lhee droe, raja pindoe sangat kaya
Kareuna beuet nyan meuntroe peugah, nyan keu gundah hate raja

Hiram muka sit masa nyan, oh gunongan kalon rupa
Masa dilee hantom meunan, nibak uroe nyan beungeh raja
Ban lejumah gunongan muka, teuka geundah hate lam dada
Na soe peugah pihak geutanyoe, nyan keu beunoe beungeh raya

Yohnyan Tamlikhak kateupike, teuka rawe dalam dada
Nyang dilee kon hana meunoe, nyoe na kamoe ureung peukhaba
Saleh soe deungo pakat geutanyoe, hantom meunan dilee nyang ka
Raja beungeh oh troih geutanyoe, nyoe na beunoe ureung peukhaba

Yoh nyan tamlikhah lomteupike, hanjeud dong lee si poe bak raja
Adat buet nyoe raja Tuhan, pakon ban insan bandum peukara
Makan minum han di kamoe, hana tapeu nyang tan bida
Dum peukara bida di kamoe, nyoe raja nyoe manusia

Sifeut Tuhan hana meunee, teutapi han jijeud kata
Meu ji kheun kon jipoh matee, raja kafe laknat raya
Meu jikheun kon raja nyan Tuhan, jikoh badan lee jisula
Uroe malam dawok pike, susah hate aneuk ulama

Makan pihtan minum pihhan, tidur pihtan dum peukara
Hanlee jikira keu pakayan, teumanggong yohnyan sidroe saudara
Pakon gundah wahee adoe, peugah bak kamoe he saudara
Geutanyoe nam hukom saboh, peugah adoe jroh peu kareuna

Teuma seu-ot muda samlako, hu pike keudroe he saudara
Langet manyang teumpat jitan, kon ban tuhan nyan meureupa
Langet meugantueng lon eu hireun, uroe ngon beuleun soe peuba-peuba
Soe hue beuleun soe boeh bintang, peungeuh bandrang jibeudoh cahya

Beunoe teulueng han mumet - met, pakre han hanyot buket nyang na
Meunan teupike lamhate droe, nyan beunoe nyoe pat geuhantra
Beunoe teuduek sapat ngon laoet, pakri han anyot buket nyang na
Jinoe lon piko that teumakot, oh seupot uroe ho kee geuba

Lom teupike nyan keu ujud, nyan untong cut dalam pruet ma
Yoh masa nyan lam kandongan, pane keunan rizki teuka
ie jihan ngon bu pitan, rayek sinan soe peulihara
Soe nyang peugot sinoe tuboh, pane utoh keunan teuka

Soe boh jaroe deungon gaki, soe boh bibi deungon mata
Shiet han cukop dum sinaroe, tapike jinoe soe usaha
Neung raja nyan jeud ji pitan, pakri Tuhan droe jikata
Pakri jiyue kheun droe jituhan, utoh jitan dum peukara

Cuba pike dum na jinoe, nyo raja nyoe nyang peulihara
Jih pi saban ngon geutanyoe, pakri jinoe Pah bicara
Tuhan geutanyoe han lakuan, hana saban meutapeusa
Hana jaroe deungon gaki, maha suci Allah ta’ala

Raja nyan kafe laknat Allah, beuthat jipeugah gajah guda
Beuthat jikheun bek tapateh, raja paleh asoe neuraka
Beuthat jikheun barang kapue, bek takabul geutanyoe dumna
Raja paleh kafe pindoe, han thee keudroe shet gop peuna

Patot jikheun droe jituhan, iman jitan kafe ceulaka
Raja Qianus lurong Allah, pagee balah dijih neuraka
Jinoe lam donya neubri seunang, akhirat teuman azeupseksa
Rakan deungo Tamlikhah peugah, dum geukheun bah dalam dada

Sabet keuhna ban tapeugah, hana salah ban kheun gata
Rakan limong jaweub meunan, sabet meunan ban kheun gata
Kamoe limong bicaratan, ban dum sajan ikot gata
Ban nyang takheun han meubantah, ban tapeugah kamoe seureta

Meunyoe taikot raja laknat, hana rahmat geutanyoe dumna
Meunyoe takheun raja nyan tuhan, geutanyoe sajan lam neuraka
Meunyoe taikot raja kafe, dudoe Tuhan bri azeub seksa
Tuhan bri azeub geutanyoe deudoe, geutanyoe nam droe sajan raja

Tamlikhah yoh masanyan, hana jalan meukon tabungka
Meukon tabungka geutanyoe nam droe, bak jeu-oh nanggroe jinoe tasafa
Meunyoe taduek sinoe sabe, han meujan mate ji anianya
Nasoe deungo pakat geutanyoe, raja pindoe hiram muka

Pakat geutanyoe nasoe peugah, meunan ulah bak ri rupa
Pakat geutanyoe na soe peuthei, nyan keu lage ngon ie muka
Nyan keu dilee hantom meunoe, oh troh geutanyee hiram muka
Nyan keu lon kheun hanjeud dong lee, akhe mate ji anianya

Tacre nibak raja syaitan, tawoe bak tuhan rabbal asma
Tuhan nyang peubuet langet ngon beumoe, keunan geutanyoe he saudara
Tacre nibak raja paleh, tajak beujeuoh dalam rimba
Bak mupakat geutanyoe nam droe, tacre jinoe he saudara

Akhe meugah kadang deudoe, ureung nam droe jadeh bungka
Rakan limong seuot meunoe, nibak kamoe ban kheun gata
Nibak kamoe dum meuturot, kri nyang patot ban kheun gata
Lheuh meupakat dum sinaroe, bandum jinoe lee tabungka

Tamlikhah publoe kayee sibak, keu pangkai jak laen hana
Lhee boh deureuham nanggroe parsi, buet qianus ji peuraya
Siploh meuh brat saboh-saboh, kherajeuen qianus jiyue peuraya
Nyan keu pangkai nyang na meteume, sibak kayee tatueng hareuga

Oh sare lheueh kayee jibloe, beudoh samlakoe pasang guda
Yohnyan bungka ureung nam droe, jiboh nanggroe ka ji safa
Boh peulana jimat gagang, kajipasang guda poh lawa
Jimat lee taloe gagang, guda jipasang bandum rata

Leugat jiteubiet ureung nam droe, raja pindoe jituho hana
Hana jithee kana ngon plung, raja bajeung tan agama
oh habeh blang meuteume gampong, kupak juroeng meudewana
Teuma meututo sidroe rakan, bekle taulan tapasang guda

kubah guda tajak ngon tapak, bekle galak atra raja
Yoh nyan meupakat ureung nam droe, jitron ubeumoe peulheueh guda
Guda nam boeh jiboh sinan, jijak yohnyan pantah sigra
Tujoh peuseuhab jeuoh jijak ,beusot tapak darah keuluwa

Seubab hantom perjalanan, ngon seubabnyan jeud binasa
Takdirullah dhahe qudrat, muteumee ngon sahabat dirot raya
Meuteumee sidroe ureung di jalan, takdir tuhan nyang that kaya
Ureung tueng upah reubee kameng, hate hueng suci safa

jiduek diglee tueng upahan, nyan keu rakan nyang beuragama.
Meubri salem ureung nam droe, katroh keunoe kamoe bak gata
Assalamualaikom dalem meutuah, perintah Allah muteumeng ngon gata
Kamoe dalam apoh apah, keubit that grah lapar dahaga

Makanan tan minuman han, puena hai rakan jinoe bak gata
Krie syhiet nariet si keubeu kameng, hate kuneng geunaseh raja
Kru seumangat he rakan droe, bak boh kamoe na ubee oen kada
pue na mudah nibak kamoe, lon bri jinoe dum keu gata

Jibri ie rabim keu minuman, jibri makanan zabet keureuma
Ureung nam droe pajoh makanan, nikmat yohnyan cita rasa
Jipajoh lheuh nikmat hase, uroe nyan le teuka sinja
Bak malamnyan teutap sinan, jibri makanan pue hase na

Bak malam nyan peugah meupeugah, pane langkah gata nyoe teuka
Pane gampong pane teumpat, peugah sahabat pue hajad gata
Pane gampong dipat nanggroe, pue hajad adoe pue tamita
Ulon kalon gata he rakan, sanglakuan kana ngon raja

Pane tajak ho tahajad, puegah sahabat nyang sibeuna
Pane gata wahe rakan, lon eu pakayan leungkap anggota
Ngon pakayan le bak asoe, saleh ho nanggroe keumeung bungka
Saleh pue seubab taboh nanggroe, pue na adoe peugah sigra

Saleh pue seubab taboh kheurajeun, pue reum mireun saleh teuka
Peugah bak kamoe adoe meutuah, takheun beusah adoe raja
Pue na salah nyan di nanggroe, peugah bak kamoe he saudara
Ureung nam droe teuma peugah, habeh jikisah asai mula

Hanjeud mucre kamoe nam droe, deungoe jinoe lon calitra
Kamoe rakan raja Qianus, nyoe bit khusus hana ngon jaga
Nyang jeud meuminah kamoe dinanggroe, raja pindoe tan agama
Raja Qianus kaji kafe, hanjeud dong lee kamoe ditangga

Kajiyue kheun droe dijih Tuhan, Raja syaitan asoe neuraka
Jiyue kheun droe jih potallah, teuka susah kamoe dumna
Soe han pateh jipoh mate, raja kafe laknat raya
Soe han pateh jih nyoe tuhan, jikoh badan jiyue sula

Jiyue seumbah droe ubak kamoe, meuplueng kamoe ban barosa
Yan keu punca muboh nanggroe, kamoe nam droe meuteumeung ngon gata
Nyan keu seubab meuboh gampong, seutot untong ho langkah ba
Meudong di nanggroe bahaya keunong, bahle lam ganong muejak tapa

Nyan keu seubab mueboih gampong, mita untong nyang seujahtra
uma seu-ot si Reubee kameng, hate kueneng suci safa
Adat meunan wahe adoe, ulon sidroe sajan taba
Adat meunan nyan tapeugah, dilon pi gundah hate lam dada

Di lon hate pi han mangat, that lon takot nyan keu raja
Jinoe hanle kudong di nanggroe, akhe paloe jeud keu binasa
Teuma teumanyong ureung nam droe, nama geu soe geuhoi gata
Soe nan geuhoi gata sidroe, peugah aduen droe bak kamoe dumna

Ureung duek di glee geuhareutoe, bak ureung nam droe jicalitra
Ulon nyoe geuhoi wahe teungku, Zaumu anis geuhoi nama
Jinoe pih lon tapreh siat, lonjak intat kameng saudara
Lon jak pulang kameng rakan, lonjak sajan deungon gata

Teuma jijak pantah rijang, habeh-habeh jiplueng bandum rata
Oh troh keunan kameng pulang, meu’ah abang ulon bungka
Kameng pulang meu’ah jilakee, jipeuteunte dum peukara
Sare teunte dum sinaroe, jijak jinoe pantah sigra

yohnyan jijak laju ugle, teumu teuseule teumpat nyangka
Oh sare troh ka musapat, jibeurangkat laju bungka
Kaji jak ngon ureung nam droe, jiboh nanggroe takot keu raja
Tujoh ngon nyan nam ngon dilee, jiseutot asee jeud lapan ka

Asee ngon jroh rupa leban, bersalahan kheun ulama
Ladum hijo kuneng meujampu, ladum kheun laku mirah warna
Ladum riwayat warna langet, puteh mublet-blet bungon rupa
Ban nyan surah ladum peugah, meunan ulah ladum kata

Rupa leban nama le that, le riwayat khilaf ulama
Meunan teuseubut lam kitab arab, asoe geuhisap le that nama
Meunan peuneugah dalam hisahi, Saidina Ali nyang calitra
Teudeungoe nibak Rasulullah, deudoe mupeugah bak pendeta

Deudoe nibak wafeut nabi, tanyong yahudi neupue khaba
Deudoe nibak nyan teuma geupeusaheh, Ibnu Abbas riwayat nyata
Geuriwayat rupa asee, le ban lagee lee pue nama
Ibnu Abbas neukheun yohnyan, asee jimeunan Qadhmir nama

Si qadhmir geumuhoi nan asee ji nyan sajan jiba
Po asee nyan Zaumu anis, muenan tungku geukheun nama
Jih hantom pre jiba sajan, kameung meukawan asee seureuta
Tuan ta’ali meuriwayat, asee nyan meuhat ziarah nama

Si ziarah geu muhoi nan, Daunis anis nyang peulihara
Nyan keu geukheun nan Saidina Ali, hana sabe khilaf ulama
Di izrai neukheun yohnyan, asee jih meunan qautrab nama
Si qautrab ji meuhoi nan, asee ji nyan got ji aja

Izrai kheun nyan nan asee, di ujahidin neukeun shohia
Si shahia geuhoi nan, asee ji nyan got jiaja
Di Ujahidin nyan geu kheunnan, di syaib yohnyan laen calitra
Nyan di Syaib neukheun yohnyan, asee jimeunan Ahmar nama

Si Ahmar jimeuhoi nana, asee jinyan mirah warna
Nyan di syaib meunan neufam, Abdullah salam laen kira
Abdullah bin salam teuma neu kheun kri, labidh geurasi asee nyan nama
Si Labidh geu meuhoi nan, asee ji nyan bijak sana

Abdullah bin salam neu kheun nyan, di Wahab yohnyan laen keunira
Di Wahab neu kheun bak masa nyan, asee jimeunan nafahah nama
Si Nafahah neumeuhoi nan, asee jih nyan jigaseh raya
Nyan di Wahab nyan neukheun saheh, Abu Hanifah laen calitra

Abu Hanifah neukheun yohnyan, asee jimeunan qitham nama

Si Qidham ji meuhoi nan, asee jih nyan ceureudek raya
Abu Hanifah neukhuen nyan nan, ulama laen dum khilaf na
Nama le that rupa leban, meunan taulan dalam calitra

Si Qadhmir ladum kheun nan, asee jinyan hijoe rupa

Han ek habeh soe keutahui, malainkan Rabbi thee sibeuna
Kata Muhammad Mamuyatuddin, asee ji nyan taladh nama
Sitaladh ji meu the nan, asee si nyan kuneng warna

Ahli tafsir lee that khilaf, teutapi Allah thei sibeuna
Nyang riwayat Ibnu Abbas, si qadhmir nah neukheun nama
Si Qadhmir seutot di likot, ureung po dikeu pura-pura
jijak ureung nyan tujoh droe, asee sidroe sajan seureuta

Ureung dilee asee dilikot, meunan teuseubut dalam calitra
Ureung po kalon asee dilikot, teuma jidhot pura-pura
Zaumu anis kheun bak rakan, qadmir sajan nyang bek taba
Si Qadhmir bek taba sajan, aib taulan nyum di mata

Sang - sang aib jih dilikot, pakri patot takat bek taba
Ureung nam droe teuma seuot, pakon tadhot jih digata
Beuthat jiseutot jih dilikot, bek gata dhot bahle seureuta
Ureung po kheun teuma bacut, bahle ku dhot na jigisa

Qadhmir deungo meunan kheun kri, lipat gaki pantah sigra

jab ngon dada jih ubeumoe, seureuto jimoe ngon ie mata
Lom ji ucap dua kalimah, bek takubah lon nyoe taba
Yohnyan jikheun LAILAHAILLALLAH, Nabi Musa kalam Allah

Ku-ek saksi poe ku Tuhan, hana saban miese hamba
Hana jaroe hana gaki, maha suci Allah taala
Ku-ek saksi Musa nyoe Nabi, suroh rabbi neyue keureuja
Ulon teungku bek ta tinggai, ulon kawai dum na gata

Kulakee doa ubak Tuhan, beukong iman dumna gata
Lon lakee bak teutop gata tujoh droe, raja pindoe bek jimita
Bak seulamat donya akhirat, bek na sapat meuteumee bahaya
Lom ngan bahaya pi bek keunong, beutuhan peutamong dalam syuruga

Lom lakee bak leupah bahaya meungkorong, teungku ba ulon bak seureuta
Ureung tujoh pujoe Tuhan, jiba sajan dalam rimba
Ureung tujoh lapan ngon asee, meunan meuteume dalam calitra
Ureung tujoh teungoh uglee, meuteumee le saboh guha

Sinan meuteumee guha batee, keubiet that lagee indah rupa
Jabal khulus nama glee nyan, radhiah ji meunan nama guha
Guha that jroh mupolinggam, luas dalam si teuntang mata
Pinto guha ubit lenggam, krueng di dalam indah rupa

Dalam guha yoh masa nyan, le that sinan zabit keureuma
padum-padum ngon boh kayee, nyang mangat bee gaharu cendana
Zabit khereuma masak dibak, tapajoh galak hatee jita rasa.
Masak dibak rhot ditangke, tapajoh le pantah sigra

Dalam tafse meunan peuneugah, Ibnu Abbas po calitra
Ureung tujoh pih troh keunan, geutamong yohnyan bandum rata
Asee dilua dijih teumpat, jikeumiet meuhat pinto guha
Si Qadhmir keumiet pinto, ureung lalu dum ji sanga.

Uroe malam teungeut jihan, barang kajan jimeujaga
Keumiet pinto dijih laloe, ureung tujoh droe teutap lam guha
Amma bakdu teuma deudoe, ureung tujoh droe pinsan lam guha
Bak Izrail firman Tuhan, neuyue tron yohnyan dalam guha

He Izrail jak tron lam gunong, jak tueng jawoeng asoe guha.
Kajak tueng nyawoeng ureung tujoh droe, kajak jinoe dalam guha
Bah jisula raja pindoe, ureung tujoh droe dalam guha
Izrail tron lee lam gunong, meujak tueng nyawoeng asoe guha

Izrail tron lam guha nyan,ureung tujoh sinan fana
Si Qadhmir kawai pinto, ngon kheu hendak po Tuhan Esa
Jieh di pinto sinan sabee, douk pi hana grah pi hana
Hana jiweh asee sinan sabee, peurintah Tuhan Nyang kuasa

Ureung tujoh droe sinan pinsan, firman Tuhan nyang peulihara
Kata dalong po riwayat, malaikat nyang peulihara
Tuhan yue tron asoe langet, peulara manyet nyang lam guha
Sidroe Manyet dua ploh malaikat, Tuhan hadharat nyang peulara.

Jibalek wie deungon uneun, sithon sinan reunan keureuja
Sithon sinan manyet dibalek, bek mubee iek bak anggota
Sit jeub-jeub thon meunan seuntok, na neu bek brok teuboh mulia
Oh troh bak beuleun muharram, sinan ka thafam nan ‘asyura

Siploh uroe beuleun muharram, sinan kata foen teuboh mulia
Bak beuleun muharram siploh uroe, manyet tujoh droe Malaikat gisa
Mata uroe Tuhan suroh, neuyue peutroh dalam guha
Na tho tuboh bek brok jasad, suroh hadharat kepadanya

Ji-ek uroe nyan ulanget, di uneun manyet keunong cahaya
Jilop mata uroe rot wie, uteun gunong dalam guha
Ashabul kahfi teuduek siat, muwoi riwayat ubak raja
Kata shahib po karangan, teumanyong yohnyan raja ceulaka

Raja tanyong yoh masa nyan, ji eu hana ngon teuka hana
Ureung nam droe hoka leupah, jaweub peugah ho jibuengka
Teuma seuot tande bujang, keunan ublang beuhoe jisafa
Ublang beunoe kamoe pandang, jak neureuntang pasang guda

Troh oh jinoe hana jiwoe, kadang ho-ho kaji buengka
Keunan keuh rot beunoe awak nyan, saleh lam gunong jijak Tapa
jijak minta laen tuhan, gata keu Tuhan han jipeucaya
Bak nyum lon jiplueng leugat, lawet nyoe that duka cita

Lawet neukheun droe neu Tuhan, aneuk miet nam duka cita
Nyang dilee kon hantom meucre, ureung nam droe jarak hana
Hatom pre ureung nam droe, tuanku sidroe jigaseh raya
Oh neukheun droe neupotallah, yohnyan susah aneuk ulama

Han jipateh tuanku tuhan, aneuk miet nam kaji bungka
Kawom ulon nyangka jiplueng, saleh lam gunong jijak tapa
Lon preh-preh woe hana jiwoe, duek nam droe hoe saleh ka
Meu keumeung tham meupoh mate, teutop hate kamoe dumna

Hana meungrak gaki jaroe, aneuk nam droe leupah bungka
Jipasang guda aneuk nam droe, rakyat meukatoe jikalon rupa
Bit keuh meunan hansoe tanyong, tahoe mantong hana khaba
Ban raja deungo meunan peugah, rakyat jikrah sigala donya

Jikrah rakyat bandum nanggroe, jeu-oh ngon toe ban sineuna
jiyue mita ureung nam droe, ban saboh nanggroe ji seureta
Meu ploh ribee guda jibri, kondraan parsi jak mumita
Jibi khaba jeub-jeub nanggroe, ureung nam droe jiyue mita

Tujoh uroe jikrah rakyat, habeh meusapat dum barangna
Tujoh uroe jikrah sabe, rakyat ile dum jeub donya
Habeh jitron dum na rakyat, kameusapat u miedeun raja
Yohnyan teupike dum na rakyat, numeusyawarat dum barangnya

Nyang jeud jiplueng ureung nam droe, jiyue kheun droe Allah taala
Bukon Tuhan nyan raja nyan, aneuk miet nam jeud jibungka
Jikalee nyoe raja nyan Tuhan, aneuk miet nam han jibungka
Hana patot jiyue weh disinan, aneuk miet nam aneuk ulama

Meunan teupike dum bak hate, hana dahe dum jikata
jikheun Tuhan hana meudahe, jitakot mate jipoh le raja
lee that rakyat meunan teupike, raja kafe jiboh agama
Seuteungoh rakyat meunan bak hate, oh jipike gadoh bicara

Han jeud han-han jeud kheun kon, seubah jikalon dum peukara
Pakri raja saleh nyoe Tuhan, Saleh shiet kok bak geukira
Peu keuseubab nyang jeud meunan, ileumee jihan dalam dada
Yoh masa nyan jaheliah, ubah-ubah bak agama

Meujan-meujan nyo meujan-meujan kon, eh jikalon dum peukara
Lee that rakyat meunan pike, han meu’oh le syok-syok sangka
Seuteungoh kheun nyoe seuteungoh kheun kon, meunan bangon rakyat dum na
Jaheliah iktikeut leban, makrifah keu Tuhan ileumee hana

Hana jiteu’oh meung makrifah, ileumee sungkat dalam dada
Lee that rakyat yohnyan jikafe, ladon mendhahe ji seureuta
Saboh bangon ikot meudhahe, jeuneh dalam hate asoe neuraka
Jimeung kheun kon han meupakat, le that rakyat raja ceulaka

Lee nyang palak rakyat keunan, ngon seubabnya han jijeud kata
Yoh nyan rakyat habeh meusapat, uyang ka leugat han jeud dakwa
jiyue mita ureung nam droe, rakyat meukatoe yoh nyan bungka
Lapan ploh ribee kandraan jibri, guda parsi jak meumita

Seutot uncit masa jijak, beukas tapak giduek guda
Uroe malam bungka sabe, hingga troh uglee bandum rata
Hingga troh bak saboh gunong, rakyat jitamoeng dalam guha
Nyan keu guha ureung tujoh droe, indah hansoe lale mata

Jipeuweh asee yoh masa nyan, tamong udalam rakyat dum na
Yoh masa nyan teumakot asee, ji eu meuree-ree rakyat teuka
Jipeu weh asee sinan siat, jipreh rakyat upinto guha
Jipreh dilua ladum rakyat, ladom leugat tamong lam guha

Jipreh dilua rakyat bahrullah, jaheliah tamong lam guha
Jaheliah na taturi, niet bak hate syok-syok sangka.
Raja pikon jeuneh tuhan, laen pi meunan syok-syok sangka
Nyan keu ureung jaheliah, makrifah keu Allah ileumee hana

Jaheliah tamong keunan, lam guha nyan seutot lanja
Sare leupah tamong keunan, jieu ureung nyan teungeut indra
Ureung tujoh droe teunget pinsan. tahe meudang ureung dumna
Tron ilham oleh Allah, jaheliah got that bicara

Jaheliah jimeupakat, tapeungeut rakyat nyang dilua
Bak meupakat dum geutanyo, ureung nam droe takheun hana
Hana meuteumeung ureung nam droe, saleh ho nanggroe ka ji bungka
Saleh habeh ka rimueng plah, meunan tapeugah ubak raja

Ureung nam droe han mupat lee, saleh kamate dalam rimba
Meuka Mupakat bandum geutanyoe, weh jinoe teubiet ulua
Meungkon meunan tapeungeut rakyat, jipoh meuhat asoe guha
Jipoh le raja aneuk nam droe, oh troh unanggroe teuma jisula

Habeh bandum jipoh mate, raja jahe laknat raya.
Jitot manyet dalam apui, tutong rangoe azeub seksa
Jaheliah mariet keudroe-droe, ureung tujoh droe jisangka indra
Jisangka teunget ureung tujoh droe, hana jipeugoe dum jirata

Pakri jikheun ureung nam droe, tujoh lagoe bak geukira
Teuma seutot sidroe rakan, meuteumeung di jalan kadang jiba
Jaheliah keumah pakat, teubiet leugat dalam guha
Ureung lam guha hana jipeugoe, ban tujoh droe jiteu-oh hana

Ji takot oh jaga ka teukeujod, plueng ulikot dum ulua
Teuma jidrop oleh rakyat, jiba leugat ubak raja
Nyam keu seubab han jipeugoe, yohnyan si droe teubiet ulua
Jaheliah teubiet le leugat, jipeunget rakyat nyang na di lua

Hana meuteumeung ureung nyan nam droe, keudeh tawoe geutanyoe dum na
Saleh ho-ho nyang ka jiplueng, saleh rimueng pajohdum na
Saleh peu gunong nyang ka mate, bek tadong le tawoe bak raja
Rakyat dilua deungoe hareutoe, habeh jiwoe ban dum jirata

Troh bak raja rakyat jiwoe, ureung nam droe jikheun hana
Hana meuteumee ureung nam droe, saleh ho nanggroe kaji bungka
Daulat tuanku han meuho le, saleh kamate dalam rimba
Jeut-jeut nanggroe meuteumeng han, rata teumpat kamoe jak mita

Saleh peu gunong nyan ka jiplueng, saleh rimoeng ka jiseuba
Hudep mate hanle meuho, raja pindoe hanle kata
Padum lawet hanle meutu-oh, kakeugadoh han soe mita
Raja teutap lam ingat le, akhe-bak akhe hanle jikira

Hingga mate raja qianus, ureung tujoh teutap lam guha
Raja laknat mate katrep, baro hudep asoe guha.
Kata shahib po riwayat, hudep meuhat asoe guha
Lhee reutoh thon sikeureung, hantom ureung keunan teuka

Padum-padum raja meugantoe, ureung tujoh droe goh lom jaga
Meunan teuseubut dalam Quran, firman Tuhan nyang mulia
Lee that raja laen meugantoe, ureng tujoh droe goh lom jaga
Seulayeu kheurajeun Abdurrahman, yoh masa nyan hudep rata

Nabi isa awai lee katrep, baroe udep asoe guha
Kheurajeun isa lam nanggroe nyan, ureung tujoh teunget indra
Nabi Isa mikreuj ulanget, mantong teungeut asoe guha
Raja Jummah mate lom deudoe, ureung tujoh droe goh lom jaga

Nabi isa mikreuj katrep, baro hudep asoe guha
Masa kheurajeun Abdrurahman, yoh masa nyan golom jaga
Tuhan peu udep ureung tujoh droe, nyawoeng neu peuwoe bak anggota
Ka seunia Tuhan nyawoeng neuboh, sigra ban tujoh siseun jaga

Iradat Tuhan mudhahe kudrah, kuasa that Allah ta'ala
Kata shahip po riwayat, teuduek meuhat asoe guha
Oh ban jikalon mata uroe, tahe keu droe sipeungaja
Mata uroe neu eu han manyang, yohnyan teuceu nyang bandum rata

Na sigalah mata uroe, mariet sidroe nyang peutua
Tamlikhah kheun ubak rakan, tawoe keutuhan teunget indra
Simalam seuntok taeh sinan, keusembahyang hana takira
Naseukeujab lheueh jikheun nyan, beudoh yohnyan bandum sigra

Geujak umon geujak eu ie, geumite ie han sapat na
Krueng habeh thoe kayee mate, on jitanlee ban sineuna
Cabeung kayee thoe bak tangke, hireun akai ngon bicara
Bal kalon cabeung mate, gadoh pike ngon bicara

Prut pih that deuk lagi ngon grah, pakri ilah he saudara
Zabet keureuma han le meubak, bukon than deuk geutanyoe dumna
ie han sapat makanan tan, bak soe rakan tabeulanja
Seuot Tamlikhah tanyong rakan, bak lon tuan na beulanja

Tamlikhah teubit yohnyan sidroe, rakan nam droe tinggai lam guha
Teubiet lam guha geujak sidroe, oh troh unanggroe lale mata
Sira geujak katahe keudroe, geu eu nanggroe kon ban nyang ka
Rot han meuphon peukan han meupat, hireun dahsyat ngon bicara

Han meupat le peukan sot, palung palot ureung muda.
Naseukeujab tahe hireun, leumah mideun geu eu rupa
Kageupeurap le bak pinto, sinan tahe le si peunjaga
Meusurat kalimah di pinto mideun, yohnyan hireun ureung muda

LA ILAHA ILLALLAH isa ruhullah, neubaca pataih kalimah mulia
Nyan teusurat di pinto mideun, that biet hireun ureung muda
Geu ucap dibabah muda samlakoe, dua jaroe rahob muka
Na seukeujab teuma deudoe, ureung lakoe keunan teuka

Nyan khairan geu meuhoi nan, tanyong yohnyan di pinto raja
Dipinto mideun meuteume sinan, ureung lakoe nyan jijak lanja
Tamlikhah tajong yoh masa nyan, hajad upeukan tron ubanda.
Tamlikhah ngo meunan hareuto, ulon sidroe teungku taba

Taba ulon teungku upeukan, kujak sajan deungon gata
Khairan seuot insya allah, peuna salah jak udehsa na
seukeujab neuberjalan, troh upeukan le ban dua oh sare
troh le upeukan, tamong sajan le bandua

Tamlikhah tanyong le bak khairan, peukeuh nan nama banda
Peu nan mideun teungku peugah, soe khalifah peu nan raja
Khairan peugah yoh masanyan, Abdurrahman nama raja
Nama raja Abdurrahman, qitusi geupeunan nama banda

Tamlikhah deungoe khairan peugah, hireun dahsyat hate lam dada
Tamlikhah kheun yoh masyanyan, tabloe makanan teungku le gata
Ripe deureuham wahe taulan, tabloe makanan keu kamoe hamba
Hireun kalon deureuham nyan, aib yohnyan akai bicara

Rayek dereuham siploh meuh brat, tahe rakyat ban sineuna
Khairan tanyong bak samlakoe, pat hai adoe meuteumee pedeuna.
Dilon ladum adoe meutuah, meuhan kupeugah ubak raja
Tamlikhah seu-ot demi Allah, neumeusumpah beukon pedeuna

Sibak kayee nyang na lon plah, na lhee uroe bak lon kira
Ulon bungka di Madinah, hana lon seumah raja ceulaka
Kheurajeun Qianus raja pindoe, na lhee uroe ere ngon hamba
Khairan deungo Tamlikhah peugah, bukon beurakah nariet gata

Hana patot takheun meunan, kareuna rajanyan trep ka hana
Lhee reutoh thon ngon sikureung, dum nan zameun ka trep ka lama
Padum-padum raja meugantoe, aib that kamoe nariet gata
Teuma meusyeuhu dalam peukan, keudengaran troh bak raja

Meugah bak raja Abdurrahman, geupangge yohnyan ureung muda
Geuba u dalam yoh masa nyan, rakyat sajan meuribe laksa
Oh troh Tamlikhah geuba u dalam, raja tanyong nan neu pareksa
Yoh nyan raja Nouteumanyong, pane ureung keunoe teuka

Bujang jaweub sabda sultan, meuteume di peukan duli sripaduka
Meuteume ngon kamoe teungku bunoe, ureung muda nyoe kamoe meuba
Meukalon bak jih deureuham jameun, meutanyong jikheun bukon peudeuna
Jikeumeung meubloe tuanku beunoe, bak kawom kamoe nyoe peudeuna

Padum boih guci saleh diteumee, tuanku lake bak ureung muda
Tuanku lake jinoe ladum, meunan hukom dilee nyang ka
Patot tuanku teurimong beulueng, bahagi limong miseu nyangka
Saboh bagi milik tuanku, meunan laku hukom sripaduka

Dijih han jitem peugah teumpat, nyan salah that teumeureuka
Raja teumanyong yoh masanyan, bak ureung muda nyan geupareksa
He ureung muda takheun beusah,cuba peugah nyan sibeuna.
Yoh nyan Tamlikhah ka neungadu, daulat tuanku hana peudeuna

Daulat tuanku syahi alam, lhee deureuham na bak hamba
Sibak kayee ulon peubloe, na lhee uroe bak lon kira
Ulon peubloe kayee sibak, lon plueng nibak raja ceulaka
Sultan Qianus raja pareusi, jinoe deungki keu agama

Jiyue kheun droe jipotallah, soe han seumbah habeh jisula
Manyet jitot dum lam apui, teuboh angoh jeud keu baja
Meunan keuh buet raja Qianus, rakyat jibunuh ban seumeuna
Tamlikhah mudhahe qudrah, neuplueng leugat udalam rimba

Oh sare troh bak saboh gunong, teuma neutamong udalam guha.
Jabalul khulus nama gle nyan, rauniah jipeunan nama guha
Lam guha nyan kamoe nam droe, baro lhee uroe bak lon kira
Kamoe pajoh boh lujalan, teungeut pinsan dalam guha

Na simalam teungeut sinan, jaga nibaknyan nyoeho lon hala
Kamoe dum deuk makanan tan, kelaparan hana tara
ulon teubiet tinggai rakan, ulon tuan jak meumita.
Ulon teujak mita makanan, tinggai rakan dalam guha

Mideun qasusi tuanku kamoe, lam naggroe nyoe rumoh tangga
Doulat tuanku seumbah laman, kamoe keumangan raja ceulaka
Jiyue kheun droe jihpotallah, han meuseumbah meuplueng lam rimba
Raja Qianus that biet laknat, lee that rakyat ji anianya.

Jigeubue kameng dijih dilee, hana soe thee jeued keuraja
Ampon tuanku ulon keunal, meunyoe na tinggai mantong tangga
Ibnu kadhian bapa lon sinoe, lam nanggroe nyoe rab ngon raja
Ampon tuanku rumoh sinoe, lam nanggroe nyoe rumoh tangga

Asai dilee di Madinah, teuma muminah keunoe bak raja.
Seulayue kheurajeuen Malik Saleh, du lon neuweh keunoe neubungka
Oh mate nyan teuma meugantoe, raja pindoe roeuloh agama
Tamlikhak peugah neuhareutoe, harus teumpat nyoe rumoh tangga

Habeh neupeugah meuyüp mayang, hireun teuceungang poteuraja
Sabda raja neunyue intat, ubak teumpat dilee nyangka.
Ubak teumpat yoh nyan geu intat, jijak rakyat sajan seureuta
Tamlikhak troh le ubak gampong, tamong jurong dalam tangga

Rakyat pih troh ek urumoh, jihoi mehmoh asoe tangga
Saleh soe na dirumoh nyoe, tatren keunoe tapeu khaba
Asoe rumoh deungo meunan, neutron yohnyan ureueng tuha.
Ureueng nyan katuha sangat, kadeuk that hana tara

Ureueng tuha nyan that biet datok, kajareueng ok dikeupala
Si on-on treuk nyang na diateuh, puteh sang gapeuh hana tara
Ummu zameun hana lagee, ok di ulee meuputa pura
Bungkok ngon rung bibi karhot, keuneng karhot teutop mata

Ureueng tuha seuot meunoe, saleb soe meuhoi kamoe hamba
Soe nyan diyup meuhoi kamoi, pane nanggroe soe nan gata
Rakyat seuot teuma yohnyan, daulat sultan suroh bak gata
Nyan keu jeued kamoe troh keunoe, ureueng muda nyoe keunoe neuyueba

Ureueng mudanyoe kheun bak kamoe, nyoe rumoh nyoe kon digata.
Ureuneng tuha ngo nariet meunan, buengeh yohnyan hu ngon mata
Teuma neukheuen ngon amarah, cuba peugah soe nan gata
Meunyo gata nyan kameusoe, patot lonboh droe ho langkah ba

Bukon utoh tajak teumaki, that beurani hate gata
Pakri jeued dijih rumoh kee, bukon han malee nariet digata
Rumoh dilon aneuek kubri, le that taki nibak gata
Ureueng tuha sangat amarah, Tamlikhak peugah sipatah khaba

Teumpat Tamlikhak nama kamoe, nyan rumohnyoe aneuek hamba
Ibnu kadhian nama ayah, baroe sa leupah lon lam rimba
Tinggai ayah lon disinoe, leupah kamoe dalam rimba.
Raja Qianus keubit laknat, Tuhan hadharat droe jikata

Soe han pateh jih potallah, jikoh lidah badan jisula
Manyet jitot dalam apui, tuboh angoh jeued keu baja
Kamoe meuplueng dalam gunong, lalu meutamong dalam guha
Jabalul ikhlas nama gle nyan, Ramiat jimeunan nama guha

Ureueng deungo nariet meunan, teuringat yohnyan yeb raya
Peue sit baroe sa nyan tapeugah, seuot barullah nyan ka lama
Lhee reutoh sikureung thon raja kamate, han meupat le dum peukara
Ureueng tuha baroe teuingat, seujud khidmad bak ureueng muda

Baroe teuingat keu ureueng gadoh, dilee meuteu-oh ngonbinoe Isa.
Isa peugah yoh saboh roe, ureueng tujoh droe dalam rimba
Masa kheurajeuen raja Qianus, nam droe gadoh keunangan raja
Ureueng geumeubue sajan sidroe, meuman saboh roe khaba raja

Ureueng tujoh lapan ngon asee, Isa bri thoe untong muda
Mounan teuingat baroe teupike, neuseujud le bak ureueng muda.
Seumbah digaki cum dijaroe, geusyik kamoe nyan keugata
Saudara geusyik nyang gadoh, masa meuteuoh ngon nabi Isa

Seumbah rakyat dum sinaroe, troh meubeunyoe le bak raja
Raja yue intat beunoe keunoe, ureueng mudanyan bak ureueng tuha
Sabet beuna ban peuneugah, raja pantah beurangkat ulua.
Raja piyoh nyan neubeurangkat, neujak peu ureueng muda

Sabet beuna kheuen ureueng nyan, Abdurrahman jak peumulia
Raja pih troh karap keunan, tron yohnyan ateueh guda
Nyang phon raja mumat jaroe, lheueh nyan meuntroe ngon panglima
Habeh mandum imum rakyat, geupeungadat ureueng muda

Raja ngon rakyat kameuhimpon, jaroe jiseuon ateueh jeumala
Lheueh mat jaroe duek meuhimpon, lakee ampon bak ureueng muda
Raja teumanyong teuma deudoe, rakan nam droe ho saleh ka
Tamlikhak seu-ot raja teumanyong, mantong lam gunong sideh lam guha

Sabda raja yoh masanyan, udeh rakan jinoe lam guha.
Taba kamoe kalon piasan, perbuatan Tuhan dalam rimba
Tamlikhak seuot rijang pantah, insya Allah po makuta
Hanpeue salah tuanku droe, udeh jinoe pomakuta

Amma bakdu teuduek siat, neuyue rakyat uleh raja
Neumeujak sajan ngon samlakoe, neumeujak eu proe lam guha.
Neumeujak kalon dum perhasan, perbuatan Tuhan wahidul kaha
Habeh jikrah yohnyan rakyat, duli hadharat hendak bungka

Habeh meusapat dumna rakyat, hendak beurangkat sultan raja
Keusyik waki tande bujang, hulee balang imam peutua
Wadhe kadhi peudana meuntroe, rakyat sinaroe sajan seureuta.
Habeh meusapat dum sibarang, panglima prang ngon sihandrara

Habeh meuhimpon ngon sipa i, sigala paki ngon ulama
Habeh meuhimpon bandum keunan, Abdurrahman beurangkat ulua
Raja yohnyan geubeurangkat, sajan rakyat bala tentra
Amma bakdu teuma keumudian, jiseutot sajan saboh treuk raja.

Kata shaheb punya rawi, raja nasrani jadeh bungka
Dijih pihle habeh meusapat, jiba rakyat ngon peutua
Raja nasrani sajan beurangkat, padum ngon rakyat bala tentra
Dua raja beurangkat ugunong, han peu tanyong bala tentra

Raja Islam ngon raja kafe, hanpeu tanyong le he saudara.
Ohsare troh raja keunan, Tamlikhak yoh nyan kheuen bak raja
Ampon tuanku jaroe gaki, rakyat bek tabri tamong lam guha
Lon takot teukeujot ureueng nam droe, raja pindoe jisangka teuka

Daulat tuanku jimeulawan, jisangka rakan raja ceulaka
Raja Qianus jisangka keunoe, rakan nam droe jithee hana.
Nyan keusabab lon peuingat, bek tabri rakyat tamong lam guha
Raja deungo meunan hareutoe, muda samlakoe ban kheuen gata

Jika lee meunan muda samlakoe, gatanyoe dua droe tamong lam guha
Yohnyan neutamong dalam guha, poteuraja neubaca doa
Neubaca doa hana khali, raja nasrani iem droe saja.
Oh neuteumeueng ureueng nam droe, mamat jaroe poteuraja

Raja tanyong bak ureueng nam droe, padum uroe sinoe gata
Ladom jikheuen na si uroe, sikhan uroe ladom kata
Adat han siuroe sikhan uroe, kamoe sinoe teunget lam guha
Poteuraja neukheuen meunoe, gata sinoe trep ka lama.

Lhee reutoh sikureueng thon lam guha nyan, dumnan zaman trep kalama
Gata pinsan hana tathei, meunan meuteumee dalam calitra
Padum raja laen meugantoe, raja pindoe trep ka fana
Nabi Isa kheurajeuen dinanggroe, gata sinoe hana jaga

Nabi Isa mekreuj katrep, baroe hudep gata lam guha.
Raja teumanyong ubak meuntroe, pakri jinoe geutanyoe tagisa
Saleh na hajad dum geutanyoe, beutapeuwoe dum u tangga
Tamaba woe sinoe sajan, shiet hanjeued han beuseureuta

Meuntroe tanyong yoh massa nyan, bak ureueng nyan dalam guha
Pakri jinoe teungku, peue na nafsu nibak gata.
Neukheundak peuwoe dum utangga, pakri bicara dumna gata
Syit hanjeued han teungku neuwoe, ban tujoh droe sajan raja

Ureueng tujoh seuot leugat, hana hajad ulon keu tangga
Hana hajad keu naggoe, bah keuh sinoe dalam guha
Ampon tuanku jinoe meu’ah, keukamoe dum barangna.
Neulakee doa dum keu kamoe, bak teutop sinoe dalam guha

Na keuh siat teuma deudoe, ban tujoh droe neulakee doa
Neulakee doa droe bak mate, bek neuwoe le dum utangga
Neulakee doa ban tujoh droe, meunoe beuyoe dum geukata
Seureuta neu anggkat dua jaroe, ban tujoh droe dum seureuta
======================================================

Allahumma bihaqqi maa araitana, minal ajayibi fi ambuna
lila qudha an, waramdhan walam yuthligh alaina ahada
lila qadha an alaina ahada, meunan meufhum bandum doa
Bek leumah le nyang ajaib, kamoe bek trep neutueng nyawa

Ya Tuhanku meupandang hanl ee, barang nyang dhahe dalam donya
Bek leumah le kamoe tujoh droe, bak sep ngon nyoe ya rabbana
Doa pilheueh nyawong gadoh, sit bantujoh sigra fana
Kata shaihib po karangan, raja yohnyan teubiet ulua

Raja Islam ngon raja kafe, jiteubiet le dum ulua
Raja Islam saboh teumpat, sajan rakyat bala teuntra.
Raja Islam yohnyan meupakat, deungon rakyat dum barangna
Neuyue peumanoe ureueng tujoh droe, gafhan sinaroe dum kalangka

Oh lheueh manoe deungon gafhan, ulama sajan lakee doa
Sigala rakyat dum kheuen amin, fakir miseukin baca doa
Geusie keubeu troh meuribee, raja peujamee dilua guha.
Geusie keubeu geukhanduri, sigala faki lakee doa

Tujoh uroe raja meupakat, sajan rakyat dilua guha
Pinto guha geutop yoh nyan, karapat ngon kala dama
Lheueh nyan raja neutanyong pakat, pakri mangat geutanyoe dumna
Pakri mangat dum geutanyoe, kareuna gobnyan beuragama

Bak meupakat dum geutanyoe, patot jinoe taboh tanda
Saboh meuseujid patet takeubah, teumpat ziarah soe yang teuka
Soe na hajad meujak keunoe, patot teumpat nyoe taseudia
Meunan keu raja Islam, raja jahanam laen bicara

Raja nasrani jimue jamoe, laen lagee dijih keunira
Raja Nasranai kheuen bek meunan, mate gobnyan agama hamba
Mate gobnyan agama nasrani, dikamoe ni meuboh tanda
Patot lon peugot saboh kubbah, teumpat meukubah potong berhala

Meunan keupakat raja nasrani, hana khali jiboh dakwa
Dua raja hana meupakat, meubatah that dibabah guha.
Amma bakdu teuma deudoe, raja dua droe jeued prang raya
Raja Islam ngon raja kafe, meusu beude rakyat that bahaya

Dua raja kameusagang, hingga jeued prang dibineh guha
Kareuna seubab bak hal nanggroe, bandua droe kheuen hareuta
Raja Islam ngon raja kafe, kalheueh beude jeued prang raya.
Khaba meuprang siat kamaklum, sit kameufhum dum teurata

Sit kameufhom dum alat prang, sikin panyang beude pih na
Peurhasan prang le that bagoe, maklum bak droe dum peukara
Meutom beude meubura asap, meubhoi kilat dum senjata
Meungka jeued prang meuhat patah, talo siblah he syedara

Raja kafe yohnyan talo, surak meuhambo di abah guha
Ma nang Islam talo kafe, hana soe le ngon meudakwa
Oh lheueh meuprang raja meutuah, peuyoh payah ban sineuna
Lheueh nibak nyan padum uroe, buet nyang baroe jinoe takira

Teuma neuhoi utoh tukang, peugo rijang meusjid raya.
Geupeugo meuseujid saboh sinan, seupeurti firman Allah ta’ala
Lan khadna alaihim masjid, firman Tuhan yang kuasa
Sare mate raja nasrani, geupeugot le meusjid raya

Bak kubu Tamlikhak geupeugot meuseujid, ureueng keumiet barangjan masa
Nan Tamlikhak beutateusoe, di Rom nanggroe rumoh tangga.
Meuseujid Rom puncak intan, tarnen lapan tambo suasa
Dumna ureueng jak ziarah, rakyat barullah keunan teuka

Inong agam peulhoueh kaci, asap meübhoi barangjan masa
Ureueng tujoh droe keuramat that, peurintah hazarat aulia raya
Kuasa Tuhan mujizat nabi, kudrah rabbi lahee nyata.
Nyan keuh wali dampeng hadharat, katroh hajad si meunaza

Ureueng peulheueh kaci geunap uroe, hana padoe geunap masa
Oh lheueh mate ureueng tujoh droe, asee sinoe mate dilua
Iradat Tuhan meudhahe kudrah, asee meuhat tamong syeureuga
Raja tanom yohnyan asoe, teumpat teunte dipinto guha.

Dilua meuseujid raja tanom, meunan seuphom bak calitra
Tamat kisah ashabul kahfi, tanyong yahudi asai mula
Tanyong yahudi nibak Ali, habeh neukheuen kri dum peukara
Ali tanyong yoh masanyan, pakri nyo meunan dalam calitra

Seuot yahudi beuna Allah, hana ubah ban kheuen gata.
Meutamong jinoe agama Muhammad, Neulakee rahmat keukamoe dumna
Yoh masanyan yahudi ucap syahadat, ilham hadharatdalam dada
Asyhadualla ila haillallah, wa asyhaduanna Muhammad Abduhu warrasuluh, yahudi seunggoh masok agama


Ashabul kahfi kisah le that, maseng riwayat dum ulama.
Khilaf mandum ureueng mukmin, maseng nyakin akan rabbana
Maseng taqwa keupotallah, maseng peugah dum ulama
Ashabul kahfi ureueng tujoh, barang soe troh jarak bahaya

Ureueng tujoh lapan ngon asoe, lon he sampoe sinoe doa :
Tamlikha, u maksyalimni, u martubu, nisu nainunisa sarabunisu
Za unu anisu, malayatatdiyu nisu Qithmir wabuduhun, meunan meufhon sinoe doa
La ila haillallah Muhammadun rasulullah, Allah ya Abu bakar ya Umar ya Usman.

Ya Ali ya Jibrail ya Mikail, ya Israfil ya Izrail
Neutulong ya Allahku ya Rasullullah beureukat keuramat aulia tujoh.
Beureukat la ilaha illallah, nabi Muhammad rasulullah Shallallahu alaihu, wassallam
Insya Allah ka tammat, ulon surat hikayat

Nyoe Malam hameh tammat hikayat, wahe sahabat watee isya
Bak dua ploh lhee beuleuon syakban, karunia Tuhan kasampurnan
Tammat hikayat aulia tujoh, lon surat sounggoh hana tara
Kareuna seubab wahe rakan, hate nyakin dalam dada

Uroe malam hana teudoh, han lon piyoh he saudara
Jikalee karot deungon salah, bek tamarah keu hamba ini
Pat nyang karot bek tagigeh, pat nyang leubeh taboh tanda
Ulon surat ngon wajah Allah, kareuna Allah he saudara

Nyang po suratnyo lon peugah, nama ngon sah bek meutüka
Muhammad Ah gampong bueh blang, sinan makam teum pat syuhada
Bah keu dumnan lon boh ayat, meungletan mangat bak tabaca
Lompih hajad ka meupat, kareuna sahabat surat mulia.

Tammat hikayat aulia tujoh, he teungku beh watee ‘isya
Alhamdulillahi rabil alamin, kabul mukmin lakee doa
Talakee 'doa keu ureueng surat nyoe, malam uroe he saudara
Talakee beuleupah bahaya akhirat, wahe sahabat dum teurata


Shallala ala, saiyidina Muhammad,
Wa’ala Alihi Wasahbihi Wassallam, Yarabbal alamin

TAMMAT