"HAJAT MEUKAWEN"

Pengarang : Agam Sidroe

Assalamu'alaikom, wareh kaoem sigeo loen sapa,,
Jaroe siploeh di ateuh ulee, meuah loen lakee bak bandum gata,,
Dalam group PANAH, katreb tan leumah beukoen loen lupa,,
Bacut masalah, meucukoep panaih loen teugoda,,

Nibak coet uroe, suum han bagoe di kuta raja,,
Uloen keuneuk proe, aduen ngoen adoe keu bandum gata,,
Silap ngoen salah, ka meunan ulah geutanyoe hamba,,
Meu'ah loen ilah, bak bandum sahbah lam donya maya,,

Meusoe yang hajat keuneuk meukawen, dara canden putroe jeulita,,
Bacut loen peugah, bungkoeh loen keubah bak jeut peunawa,,
Bek toek nafsu, tanyoe di adu syethan peudaya,,
Sampe teugoda bak malam minggu, mandum meureunu bak jalan raya,,

Tapi hai sahbat, bacut loen intat ubat peunawa,,
Ranueb lam bungkoeh, beuthat pih hantroe ujoe loen ija,,
Meusoe meunikah, ngoen Ridha Allah yang that geudamba,,
Meucukoep that jroeh, hudep teusatoeh ateuh rhueng donya,,

Bonus meulipat, 'oh ta ibadat keu Po Rabbana,,
Reuoeh yang jitroen, pahala meususoen 'oh ta keureuja,,
Sabe lam Rahmat, meuruah nikmat Allah karunia,,
Han sampe mehmoeh, tuboeh ka leumoeh jeut2 anggota,,

Raseuki luah, rata jeut leumah jalan bak kerja,,
Sabe lam seunang, hudep han mumang meutamah anggota,,
Bek ikoet KB, budaya kafe ala eropa,,
Sunnah Nabi, meubek ta anti wahe syedara,,

Meutamah ummat, maken le Rahmat ateuh rhueng donya,,
Bak get ta satoeh, bak jalan yang jroeh aneuk ta jaga,,
Bek lagee budee, aneuk ka cree bree meuho yang suka,,
Uroe akhirat, azeub cukoep brat dikeu Rabbana,,

Meumada 'oh noe, haba uloen proe ujoe lam rika,,
Manteong that ubeut, ilmee cukoep cuet yg na lam dada,,
Neusak lam bungkoeh, puwoe u rumoeh meunye na guna,,
Meunyeo bit tan jroeh, neu sak lam toeng broeh peu peo lam paya,,

Agam_Sidroe at Kuta Raja