Cari

Subscribe:

Ads 468x60px

Pasang Iklan Anda Disini


Wednesday, April 3, 2013

~ KISAH MASYITAH ~

Pengarang : Tgk Diyueb Bruek

Alhamdulillah, lon puphoen kisah
Lon pujoe Allah, Azawajalla
Laen tan sidroe, yang ulon seumbah
Malingkah Allah, sidroe yang Esa

Yang bri raseuki, nikmat neulimpah
Rahmat neucurah, ban sigoem donya
Ulat lam bate, raseuki mudah
Dumnan di Allah, gaseh keu hamba

Seulawuet saleum, lon intat bagah
Keu Rasulullah, Saidil Ambiya
Nabi Muhammad, utusan Allah
Yang ba risalah, keu umat Dumna

Jinoe saleum lon, kalam sipatah
Jaroe dua blah, atueh jeumala
Gantoe ulon bri, kupi saboh glah
Nyoe pat mudah, saboeh mustika

Haba riwayat, Quruan peugah
Kisah Masyitah, fireu’un Raja
Raja Fireu’un, si laknattillah
Jitem Masyitah, jijak elanya

Jipike kiban, iman masyitah
Jisangka goyah, Iman lam dada
Walau direuboeh, tuboeh Masyitah
Ngoen anuek lidah, bandum keluarga

Meunoe riwayat,deungoe lon kisah
Iman Masyitah, padumna saba
Kisah fireu'un , deugon masyitah.
Qur’an neupeuhah, kisah neubaca

Kisah masyitah, lakoe ngoen binoe.
Dalam meuligoe , geunaseh raja
Raja fireu'un, si kafe pidoe
Diyue aku droe , keu Tuhan Esa.

Diyue khen Tuhan , bak rakyat nanggroe.
Seumah ngoen pujoe , bandum keu Raja
Meusoe han pateh , jipoeh dikiloe.
Hana meusidroe, yang jeut meudawa.

Soe han tem pateh, diyue poeh mate.
Dhalem bukoen le , Raja ceulaka.
Gaki ngoen jaroe , pasoe lam rante.
Ka jipoeh mate, pasoe penjara.

Teukeudi Tuhan, nibak siuroe.
Masyitah sidroe, Allah neucoba
Teungoeh masyitah, sugoet ok putroe.
Leukang bak jaroe, sugoet suasa.

Masyitah Iktifar, astagfirullah.
Laju amarah , di aneuk raja.
Toeh laen Tuhan ,seulaen Ayah.
Cuba ci pegah , lon deungoe nyata.

Jawueb masyitah, sigra le meunoe.
Diloen kupujoe, Tuhan yang esa.
Yang peujuet langet, seureta bumoe.
Yang peujuet asoe , sigala rupa.

Ayah di gata , hai nyak putroe ti.
Peuneujuet rabbi , Tuhan yang Esa.
Sinoe di donya , raja meu ungki.
Akhirat geubri, Asoe nuraka.

Ubak Ayahda, putroe peusampoe.
Masyitah sidroe , Yang han peucaya
Raja Fireu’un, beungeh kon bagoe
Beulangoeng beusoe, diyue seudia

Diyue reuboeh ie, beulangoeng beusoe
Jikeunuek pasoe, saboeh keuluarga
Apui jipeudep, raya kon bagoe
Na abeh tungoe, dua fuso ka

Keuluarga Masyitah, lakoe ngoen binoe
Meulhe anuek droe, keunan ka jiba
Awai phoen jitiek, nyan urueng lakoe.
Masyitah sidroe, mantoeng lam saba

Anuek lam lingkue, jitiek lom dudoe
Meuka dua droe, ngoen bijeh mata
Karap salah niet, masyitah sidroe.
Guekalon lakoe, deungoen anuekda

Anuek lam lingkue, ka jitroen keudroe
Seureuta meunoe, jibuka haba
Tan laen Tuhan, Wahe poma droe
Malingkan sidroe, Allah yang Esa

Hanpue neutakoet, beulangoeng beusoe
Azueb that dudoe, Apui Nuruka
Iman beuteutap, wahe poma droe
Bahle ulonnyoe, tamoeng keudua

Lhuehnyan Masyitah, jitiek lom dudoe
Habek ban lhe droe, saboeh keluarga
Sinoe didonya, Riwayat sampoe
Oh uroe dudoe, Asoe Syuruga

Kareuna Iman, keu Allah sidroe
Tabah han bagoe, bandum geu ridha
Misue geutanyoe, pakriban bagoe
Kadang meupaloe, iman tatuka

Astaufirullah, lindoeng nibak po
Malam ngoen uroe, iman lam dada
Beuteutap iman, oh wate tawoe
Keu Allah sidroe, meubek tatuka

Kisah Masyitah, meumada ohnoe
Neucoek neupuwoe, pasoe lam dada
Kadang Mujarab, keu ubat dudoe
Keu pangkai tawoe, nanggroe kalbaka

Meunyoe na salah, kisah lon rampoe
Meuah rakan droe, hana lon saja
Hana lon jak buet, kon surah keudroe
Haba lon deungoe, Surah ulama

0 comments:

Post a Comment