~ "RESEP" TEUGAH MAKSIET ~ (Menurut Ibrahim bin Adham)

Pengarang : Akhbar Al-Mutawassila

Asalamu'alaikum, ayyuhan insan
Tapujoe Tuhan, 'Azza wajalla
Keu Rasulullah, seulaweut Salam
Sahbat seukalian, serta keluarga

Nibak siuroe, ubak ibrahim Adham
Troek keunan, sidoe manusia
Banlheuh geupubuet, saboh kemungkaran
Nibak Syaikhan, nasehat geupinta

Neubri keu ulon, Ya Ibrahim Adham
Peunawa kemaksiatan, waya syaikhuna
Seumoga deungon, gata peugah nyan
Han lon riwang, dalam buet dausa

Seu-ot laju, Ibrahim lheuh nyan
Keupada si man, 5 perkara
Meu ek neupeubut, adalah jaminan
Han neu riwang, dalam buet mungka

Peureutama phoen, wahee rakan
Rezki dari Tuhan, bek ngui lee gata
Panee pantah, pajoh makanan
'Oh tee lheuhnyan, maksiet seungaja

Nyang keu-2, ulon khabarkan
Kheun Ibrahim Adham, geusambong teuma
Bek neutinggai, lam bumoe Tuhan
Bila keulakuan, keuji ngon mungka

Mita teumpat, kheun ibnu Adham
Nyan oleh Rabban, geutupat hana
Nyan keuh sinan, pubut keujahatan
Lam khabaran, keu-3 teuma

Meunyang keu-4, bila datang
Izrail taulan, ukeu gata
Lakee tunda, jatah keumatian
Lakee teunggang, cabot nyawa

Nyang keu choet, ingat rijang
Zabaniah datang, geutueng gata
Watee geu rhoen, dalam Jahannam
Baci lawan, bek teurima

Ban geudeungoe, lee hamba nyan
Geumoe rijang, kliek meu'a'a
Panee mungken, lon pubuet meunan
Wahee syaikhan, beutoi gata

Ulon taubat, keupada Tuhan
Inseuf lon tuan, Ya syaikhuna
Hana pantah, maksiet keu rabban
Bila 5 nyan, han ek keurija

Meumada 'ohnoe, lon top karangan
Teugah rijang, nyang salah haba
Maklum ulon, teungoh latih Nazam
Peumeu'ah rijang, Akhbar Al-Mutawassila

Lhokseumawe, 26 Maret 2013