Ca-e Kishashul Ambiya (Kebijaksaan Nabi Sulaiman)

Salam’alaikum, wareh syedara
Tuha ngon muda, inong ngon agam
Tapujoe Allah, Azza wa Jalla
Rasul Musthafa, seulaweut salam

Ka masa hujeun, saweub keunoeng sa
Meunan keunira, di Nektu Moyang
Sira lon duek-duek, lon mula rika
Kisah Ambiya, Dawud – Sulaiman

Bak saboh malam, bak saboh masa
Yoeh Dawod raja, ayah Sulaiman
Teuka masalah, ureung meudawa
Nyang jeut peukahra, reuloh seulaman

Saweub dipajoh, kameng geumbala
Bandum dicuca, bacut tan tinggai
Oleh poe lampoh, geubuka haba
Ka hek lagoena, kamoe meuladang
 
Lheuh kamoe cangkoi, tajok peubaja
Seurta peulahra, ubi ngon kacang
Hingga seulaman, ka meuhi dara
Panen rhap teuka, hai Yah Sulaiman
 
Kamoe teukijot, Wa ya Nabiyya
Seulaman fana, bak saboh malam
Abeh jipajoh, kameng geumbala
Pakriban cara, keu peudamaian

Geuseu-ot Dawod, laju ngon lanja
Padum biaya, harga seulaman??
Juga geutanyong, bak peungeumbala
Ci yuem takira , publoe kameng nyan

Meuban geuseubot, pih karap sama
Dawoed geukata, meunyoe lagee nyan
Neujok banmandum, nyang kameng gata
Hai peungeumbala, keu poe seulaman

Supaya damee, hana lee dawa
Masalah gata, kasep keuh ‘oh nan
Karab khoek palee, ngon tiba-tiba
Geumeusu lanja, Nabi Sulaiman

Meu’ah Tuanku, wahee ayahnda
Nibak ananda, pih na pandangan
Ulon neuk peugah, na saboh cara
Nak meuseulinya, cok keuputosan

Dawod peusilah, wahee Ananda
Peundapat gata, baci uraikan
Nak kamoe deungoe, pakriban cara
Nak meubahgia, dua ureung nyan

Sulaiman seu’ot, laju sigeura
Di peungeumbala, seurah kameng nyan
Keu poe seulaman, seukian masa
Sira geubina, akan seulaman

Nyang ka jipajoh, bandum geukira
Bandum geupula, lagee yoh awai
Hasil bak kameng, aneuk – susunya
Jeut geupuguna, oleh poe ladang

‘Oh lheuh geupeugot, lagee yoh mula
Laju peugisa, kameng jok pulang
Bak ulon rasa, meunyoe nyan cara
Aman seuntausa, dawa kasep nyan

Meuban geudeungoe, lagee nyan haba
Banduem teupana, akan Sulaiman
Hana teujalok, ubeut lagoina
Hikmah that raya, nibak aneuk nyan

Bandum seutuju, hana lee dawa
Laju laksana, nyan keuputusan
Keuheundak Allah, han ek ta duga
Lagee tabaca, dalam Quru an :

“Dan (ingatlah kisah) Dawud dan Sulaiman, diwaktu kedua-duanya memberikan keputusan mengenai tanaman, kerana tanaman itu dirosakkan oleh kambing-kambing kepunyaan kaumnya. Dan adalah Kami menyaksikan keputusan yang diberikan oleh mereka itu, maka Kami telah memberikan ilmu kepada Sulaiman tentang hukum (yang lebih tepat) dan kepada masing-masing mereka telah Kami berikan hikmah dan ilmu.” (Al-Anbiya': 78-79)