Cari

Subscribe:

Ads 468x60px

Pasang Iklan Anda Disini


Wednesday, April 3, 2013

“ RAMPOE KEU SOAL JUDO “

Pengarang : Tgk Diyueb Bruek

“ RAMPOE KEU SOAL JUDO “
=======================================
1. “KA BUNOE LON EH, AN JINOE GOH TEUNGEUT “
2. “ UDEP MEULAJANG”
3. “BEKLE MEULAJANG
4. ” HANA PEURUMOH “
5. “ PILEH BUNGOENG “
6. " TA PILEH JUDO "
==========================================

1. ‘KA BUNOE LON EH “
====================
Ka Bunoe lon eh, an jinoe goh teungeut,
Aleh peu meuheut, lon tupeu hana,
Keu boh meuria, ulon tan galak,
Keu aneuk salak, pih lon tan hawa,

Han troe pajoeh bu , dak dua goe tamah,
Han jitem gadoeh grah, ie saboh tima,
Mita peunawa, kalheuh geu rajah,
Ka poeh Dua blah , teungeut lon hana.

Lon jak bak dokto, jak mita ubat,
Saket akhirat, dokto bri haba,
Mita peunawa, keudeh bak dukon,
Su_oet mbah bak lon , peunyaket donya..

Peu keuh peunawa, wahe rakan lon,
Ci peugah lansong, neu tulong hamba,
Yg bek neutaki , neu tok tok raboeng,
Meutamah saket Lon, enteuk binasa...
=============000============

2. “ UDEP MEULAJANG”
====================================
Salam'laikom,loen peuphoen kalam
Salem keurakan,bandum seureuta
Nyoepat na rawi,bacut hai rakan
Susah meulajang,uloen hareutoe

Leupah that susah,hudep meulajang
Lage loen tuan, yang mantoeng sidroe
Han soe taguen bue, uroe ngoen malam
Hana soe rakan, rah baje kutoe

Keubiet that saket ,hudep lam lajang
Kupi lam cawan, hana soe cawoe
Adak pajoh bu, hana yang idang
Bu dalam pingan, payah boh keudroe
Han soe peulimboet, leupie oh malam
Oh saket badan, soe uroet hana
Hana soe semir, sipatu itam
Baje kroet-kroet han, hana soe pakoe

Hana yang peungoen, wate oh malam
Tika hai rakan, payah leung keudroe
Han pue loen peugah, yang laen macam
Bah keuh hai taulan, neu boeh pham keudroe.

Ohnoe meumada, loen tuleh kalam
Susah meulajang, uloen peusampoe
Uloen akhiri,deungoen WASSALAM
Salah ngoen kurang, meu'ah keu loen nyoe.
==============000==============

3. “BEKLE MEULAJANG”
============================
Siwah ka jipoe , meukawan kawan
Jiloep lam awan , gadeoh han meuhoe
Umu katuha, bek le meulajang
Mita pasangan, kiban galak droe

Dara muslimah, mita hai rakan
Yang na meu iman, keu Tuhan sidroe
Bek yang soek luweu, yang hie pereman
Udep han teunang, pikiran kachoe

Jalan meuputa, tajak u nagan
Jioh hai rakan, trep that troek sampoe
Menyoe tamita , dara meu iman
Udep teuh tenang, malam ngoen uroe

Adak teumoen bu , gule oen bayam
Hate teuh seunang, oeh wate tawoe
muka jih rumeh, mameh senyuman
Hudep bak rangkang, sang sang muligoe..
==========000=================

4. ” HANA PEURUMOH “
=============================
Sigunca pade , sirante tanoh
Bijeh dirumoh, lam eumpang baja
Ulee meurawe, meusuwe heh hoh
Pikeran mehmoh, hate pih goga

Ulon duek sidroe, di ramoe rumoh
Meutrep that beungoh , dalam supoet kla
Hudep lon sidroe , hana peurumoh
Maka jeut mehmoh, teu bira bira

Geulanceng beusoe , keu seuboe pintoe
Nyan bajee baroe, seuneuboe ija
Meupat tamita, sidara baroe
Yang jeut keu judo, yangna seutia

Meuh leupah muhai , langai pih anco
Bijeh pade roe , neuduek meuampa
Harap keu pade, reule buet tulo
Harap keu jalo , keunayoh hana

Meunuroet jameun, ka meunan atoe
Beulanja keundo, bek coba coba
Anco harapan, meuseubab blang thoe
Pawoen peujudo, beulanja hana

Jinoe buet ulon, jak peh peh tamboe
Keurija kanto, hana ayahwa
Sikula hana, meupeng pih keundo
Ayah ngen ma e , koen ureung kaya

Karna jameun nyoe, beuna eskudo
Meunyoe honda pro, keu mugee raga
Walau lagenyan, niet lon han kundo
Langkah ngen judo, bak tuhan kana

Langkah peutumuen, mawoet teupeuroe
Asai na peng le, abeh peukara
Asai na peng, di dalam jaroe
Meu ek ta puwo, aneuk mantoeng sikula
==========000=================

5. “ PILEH BUNGOENG “
======================
Oh ban Jikalon, sitangkeu bungoeng
Hana deuh langoeng , bak bineh mata
Meunyoe meurempoek, ngoen sidroe inoeng
Tgk belangoeng, ji pakoe hana

Baroe jitepue, oh ule bingoeng
Han geterimoeng, lamaran jiba
Baroe jituri , tgk beulangoeng
Ayah si inoeng , bapak didara

Beu ingat ingat, bak pileh bungoeng
Yang ka le langoeng, bek le neuhawa
Entek menyesai, wate neutamoeng
Oh neu eu bungoeng, kalheh goep cuca.

Cukoep that manyang, puncak gerute
Teumpat meulale, dum asoe rimba
Oh lheuh pueleh, saket pruet kasakeut ule
Pakiban lage, lon peugoet cara

Peu keuh dausa lon , yoeh awai dile
Pue keuh ka lale , suroeh Rabbana
Bak soe keuh ubat, jinoe lon lake
Ulon that male , dengon Rabbana
==========000============

6. " TA PILEH JUDO "
===================
Krue Seumangat, Rahmad Tuhan Bri
Langkah raseuki, keu manduem Hamba
Peuteumuen mawoet, Allah khendaki
Ta pileh Isteri, na peut peukara

Peukara nyang phon, Hukoem jie turi
Nyang Suroeh Rabbi, jitem keurija
Agama beu koeng , Hukoem beu ngerti
Nyang laen pasti, ikoet seureuta

Teuma keudua, wajah beu tari
Bak sidroe Isteri, beu mameh muka
Muka jieh bek kroet , 'oh woe Suami
Troeh syedara suami, bek masam muka

Keu lhee Hartawan, bacuet pih beuna
Bacuet Hareuta, nibak Isteri
Bila pih teulat, ta puwoe beulanja
Asam pieh ek na, Sira ngoen Campli

Teuma nyang keu peut, ciet Keturunan
Tilek hai Rakan, soe Ayah ngoen Ma
Meunyoe ka jeulas, soe Keturunan
Mudah hai Rakan, nibak ta biena

Peut peukara nyoe, beuna hai Rakan
Dak jeut beu sajan, Banduem pih beuna
Sengkira pih hana, man peut peukara nyan
Pileh hai Rakan , Bideung Agama

'Oh noe keuh dilee, haba ulasan
Bacuet lon Peusan, keu bandum gata
Meunyoe ta ikoet , Handai dan Taulan
Bahgia hai rakan, lam rumoeh tangga

2 comments:

أبو كوثر said...

Yyyy bereh2...;)

Unknown said...

Bereih2 guree.. Kiban jeut ta save guree loen

Post a Comment