Cari

Subscribe:

Ads 468x60px

Pasang Iklan Anda Disini


Monday, February 11, 2013

Wafeuet Nabi

Pengarang : Tgk Diyueb Bruek

BISMILLAHIRRAHMANIRRAHIM

Alhamdulillah wabiham ihi
Wafeuet nabi saidil ambia
Sonyang deungo wafeuet nabi
Tuhan neubri le that pahala

Sang katamat tubooh nabi
Deungon tangan jaroe dua
Bak si uroe tren jibrai
U bak nabi nyang mulia

Ya Rasulullah saleuem tuhan
Ajai datang katroh masa
Hana treb le ya janjogan
Woe bak tuhan nanggri baka

Ban neudeungo kheuen jibrai
Neumoe nabi rheut ie mata
Kheun jibri ya jangjongan
Mantong sayang akan donya

Ya maulana that yuroilan
Ulon pandang rhet ie mata
Jaweub nabi lon syuroilan
Bukon sayang lon keu donya

Hana sayang keu fatimah
Ken aisyah hana lon kira
Amren hasan hana lon chen
Amren husen han lon cinta

Abu bakar tan lon ingat
Han lon minat keu judonya
Umar usman hana cintaan
Ali pih tan ulon cinta

Nyangna sayang that cit keu umat
Oh lon rhet ie mata
Salang na lon mantoeng disinoe
Geunab uroe dalam dosa

Oh tan ulon saleeh pakri
He ya rabbi hukom gata
Nyangkeuh nyangna lon syuroilan
Nyang laen tan dum perkara

Teuma neuwoe ya jibrail
Tinggai nabi nyang mulia
Nabi neuwoe bak aisyah
Pakon gundah ya maulana

Nyang barokon oh troh keunoe
Ban mata uroe limpah cahya
Ulon kalon bak uroe nyoe
Sang ureueng moe lagee rupa

Teuma sabda rasulullah
Bak aisyah neu calitra
He aisyah deungo kamoe
Ulon jinoe katroeh masa

Ulon jinoe habeh reuzeuki
Katroh wahi jibrail ba
Tren jibrail uroe nyoe
Jak tueng kamoe nyawong geuba

Allah allah he aisyah
Serta bohbah ngoen ie mata
Ya tuhannku pakon meunoe
Tinggai kamoe nyang that hina

Ureueng lakoe neuba dilee
Pakri lagee kamoe dumna
Ya habibi bak siseun nyoe
Tinggai kamoe tajak gata

Neulake do’a ya habibi
Beusigoe matee sajan gata
Oh tan gata ya muhammad
Han soe peu ingat rijang jula

Oh lon ingat that meusampee
Droeneuh hanle tinggai hamba
Sabda nabi bak aisyah
Janji allah hana dua

Haros kamoe matee dilee
Gata pihmee matee juga
Com diteu ot seumah di gaki
Lon beumate sajan gata

Lom meusabda nabi yullah
Bak aisyah neucalitra
Meukon habeh langkah rezeuki
Adak lon nyoe hanjeut lon ba

Alllah allah he aisyah
Kheundak allah hana dua
Aisyah deungo sabda nabi
Narit suci baknyum rasa

Wahe nabi po janjongan
Pakri kamoe oh tan gata
Yohnyan gundah tuan aisyah
Allah allah he saidina

Nabi meuhoi dumna umat
Deungon siat hadir dumna
Teuma sabda nabi muhammad
Nyoe amanat lon bak gata

Beek lupa allah deungon nabi
Dum teurasi tuha ngon muda
Taseumbahyang linoeng watee
Dum meutentee takeurija

Habeeh geudeungo dumna umat
Neubri bi’at ngon rahsia
Habeeh biat ngoen talkin
Muhammad amin hendak bungka

Masa neukheun nyan rasulullah
Ile limpah ngon ie mata
Habeh geudeungo dumna sahabat
Woe dum umat tuha ngon muda

Dumna sahabat jak bak nabi
Gundah hate pucat muka
Dumna umat kunjong aisyah
Nabi yullah that mulia

Yohnyan teuka tuan fathimah
Oh ban leumah rhet ie mata
Neue eu nabi sangt gundah
Maken sosah nibak nyangka

Tuan fathimah kheun bak nabi
Pakon saidi meunan duka
Teuma sabda nabi yullah
Ohmoe langkah lon lam donya

Lon kheundak woe u bak tuhan
He bangsawan tinggai gata
He fatimah aneuek meutuah
Sujut keu allah beekna lupa

Beuna ingat tuhan sidroe
Duma geutanyoe tinggai donya
Yohnyan neumoe tuan fathimah
Han le leumah neu eu donya

Han sapejeut neumarit le
Neumo sabee hana reuda
Beek tamoe le aneuek lidah
Kheundak allah katrok masa

Bandum mate he aneuk cut
Rukuek sujuet beek talupa
Wahe ayah peue di kamoe
Ulon teunyoe sajan neuba

Tuan fathimah laju neumoe
Ro neumanoe rhet ie mata
Rhet ie mata sangat limpah
Allah allah he saidina

Tinggai ulon pat neukeubah
Soe peurintah umat dumna
Hasan husen cuco seudang
Hansoe sayang oh tan gata

Maken neumo amat sangat
Gadoh ingat baknyum rasa
Sabda nabi neubri bi’at
Nyoe amanat he aneukda

Leupah lon woe bak hadharat
Hantreb that tinggai gata
Tuhan neubri rijang meusapat
Han lambat bijeh mata

Nam buleuen trek aneuek da
Teuma tawoe bak ayah da
Ban neudeungo sabda nabi
Teutap hate puleh duka

Teubleuet mata neugrak bibi
Neumo nabi rhet ie mata
Pakri untong dumna kamoe
Soe peurunoe tuha ngon muda

Adak bit na saidina ali
Deungon nabi hana citsa
Saidina ali cit pahlawan
Rimueng tuhan dalam donya

Nabi neumoe han ek neutheun
Naban ujeuen ro ie mata
Tamse laot meugeulumbang
Bukon sayang saidil ambia

Kareuna sayang neuh keu umat
Neutakot that lam nuraka
Yoh nyan sabda nabiyullah
Beek gundah that nyan di gata

Ulon teunyo teukeudi rullah
Habeh langkah katroh masa
Sayang lon that dumna umat
Lon takot sisat darohaka

Tuan fathimah aulia allah
Neupateh teugah tuhan esa
Uroe katroh watee jum’at
Habeh rakyat keunan teuka

Nyangka dilee hantom meunoe
Bak uroe nyoe jula maulana
Pakri pike dum geutanyoe
Get keuh jinoe tanyoe pareksa

Tayujak bileue ubak nabi
Salee pakri jula neuteuka
Ban meurempok ucap selamat
Dumna umat duka cita

Bileue teubit yohnyan rijang
Troh datang u rumoh tangga
Mubri saleuem rijang rijang
Nabi nyumsang leumoh raya

Seu ot saleum neutren laju
Leumah neu eu bileue teuka
Bileue pandang pang ulee nabi
Bak neu eue hi ubah rupa

Yohnyan bileue ka teupike
Lalu hile ngon ie mata
Ya rasulullah dumna umat
Dalam mesjid geupreh maulana

Kamoe bandum sangat rindu
Bandum meunafsu keu maulana
Sabda nabi rasulullah
Ulon gundah nekmat teuka

Lon keumeung woe u bak allah
Habeeh langkah lon lam donya
Takheuen saleum lon keu umat
Keu ibadat beek jilupa

Keu abubaka loen peu ek saleum
Nyangkeuh imum gata nyangna
Nibak allah han teukeuse
Hukom ade buet sibeuna

Bileue deungo kheun pang ulee
Rhet meuree ngon ie mata
Bileue neutrenle neujak leugat
U meuseujid troh neugisa

Ya abu baka gata keu imum
Neu peu ek saleuem le saidina
Gata keu imum sigala umat
Tapeue ingat dum barang na

Nabi geutanyoe saket larab
Nibak adat tinggai donya
Umat deungo haba meunan
Jinoe bandum rhet ie mata

Abu baka jawueb pantah
Beuna salah ateueh gata
Jaweueb bileue pane beurani
Meungkon bak nabi jatoh sabda

Subhanallah wabiham dulillah
Rasulullah lon calitra
Nabi peugah bak aisyah
Sireuta bohbah ngoen ie mata

He aisyah lon jak siat
Sayang umat duka cita
Nabi beudoh nibak saket
Ija neupalet bak keupala

Nabi neutren nyan di rumoh
Badan leumoh jeub anggota
Sira neujak rasulullah
Ija basah rhet ie mata

Jikaloe tan beurangkat nabi
Pungoe umat le nyang gila
Deungon syuruban neukeulubong
Ingat untong dumna umat

Ie mata rhet hana reunggang
Sang geulombang laot raya
Hana teudoh rhet meuree-ree
Badan pangulee basah rata

Saket nabi bungong keumbee
Hanjan tathee siat kamala
Tamse ie keunong uroe
Meunyom bak asoe di maulana

Miseu bungong keunong uroe
Saket bak asoe jeub anggota
Nabi neumoe teungoh berjalan
Neu ingat sayang umat dumna

Ie mata rhet di pang ulee
Basah bajee deungon ija
Ban mu’anikam putong keunarang
Bukon sayang saidil ambiya

Sangka mata uroe ka awan top
Rooh lam sagoop han le cahya
Cahya hanle oh tapandang
Miseue janjongan teuka bala

Miseue pham nabi muhammad
Meunan umat lam donya
Meunan miseue oh tan nabi
Bandum sare putoh asa

Miseue bungong putoh keunaarang
Kahilang hanale cahya
Nabi muhammd that sungoilan
Umat pandang rhet ie mata

Leumbah leumbot nabi beurangkat
Neupeuturot hajat umat dumna
Suka hate sigala umat
Nabi muhammad kaneuteuka

Nabi seumbahyang du’a raka’at
Bandum sahabat pih kateuka
Abu bakar sangat rindu
Neuduengo su nabi kita

Sabda nabi meu alon alon
Neuhei kawom dum simua
Na tadeungo wahee kawom
Wasiet ulon be ek talupa

Makan hareuem beek tapajoh
Nyang haleue troh tajak mita
Harta syubeuhat beek tagalak
Nyang bukon hak beek tahawa

Beek ta ubah banlon kheun nyoe
Pagee dudoe teu meureuka
Ureueng gasin beuta tulong
Ngoen ureueng gampong bek masam muka

Beek troh deundam dalam hatee
Beurangkakri le ureueng lingka
Beuta deungo wahe umat
Nyoe amanat lon bak gata

Ta ibadat kareuna allah
Beek dube drah kareuna donya
Beuta ingat wahe wareh
Beutapateh kheun ulama

Karena ulama wareh allah
Sonyang ubah darohaka
Nabi meusyawe mihrab
Bandum sahabat rhet ie mata

Sabda nabi dum keu umat
Beuseulamat beu meubahgia
Neubri umu dum beulanjut
Rukuek sujud beekna lupa

Karena ulon donya hanle
Uroenyoe cre lon ngon gata
Ajal ulon cit karab trok
Pubuet suroh bandum gata

Kateupike dumna umat
Hanle ingat moe dum rata
Wahe tuboh jinoe ho troh
Misue lampoh po jih hana

Adak nyang na soe didalam
Pageu pih tan soe peulara
Meuna pageu sit that mudah
Hana payah tapeulara

Wahe tuboh salaeeh malang
Saleeh hilang tuah bahgia
Buet nyang salah han so larang
Hansoe peugang suroh gata

Ya tuhanku poku tuhan
Neubri sajan kamoe dumna
Yohna mantong keubajikan
Keujahatan gohlom teuka

Wahe nabi payong kamoe
Soe peureunoe umat gata
Sabda nabi rasulullah
Neupeugah bak sahbat dumna

Uroe kamis beurang kajan
Poku tuhan nyang peunyata
Get ngon jeuheut seukalian
Bandua nyan tuhan peunyata

Get tapubut get neubalah
Jeuheut neukeubah lam nuraka
Ulon lakee nibak allah
Neubi beuleupah nibak deesya

Meunan sabda rasulullah
Beekle sosah dumna gata
Bitpih meunan hanji ingat
Dumna umat roe ie mata

Muka mameeh suara mangat
Nabi muhammad ta umpama
Bandum ureueng habeh geumoe
Hana sidroe nyang ek saba

Wahe umat tadeungoe kamoe
Minuman nyoe dum tarasa
Bandum sithan tinggai sinoe
Keupeu tamoe hana guna

Jaweub sahabat he pang ulee
Temakot padee bak agama
Sit hana le soe peutentee
Datang sitree jipeu fana

Sabda nabi rasulullah
Ban peurintah tuhan esa
Ulon peujok u bak allah
Keubajikan ulon pinta

Yohnyan nabi rasulullah
Ile limpah ngon ie mata
Neutakot rohbut nyang salah
Nibak allah pih meureuka

Ya tuhanku po ku sidroe
Umat kamoe beuseujahtra
Beumeusapat uroe dudoe
Dum sajan droe lon eue rupa

Hingga nabi neulakee droe
Lon nyoe kuwoe tinggai gata
Allah allah wahe umat
Ban nyang wasieet beek talupa

Harap ulon bak gata dum
Wahe kawom tuha muda
Meunan sabda nabi bak umat
Sayang rakyat bandum rukha

Nabi neuwoe troh u rumoh
Saket leumoh jeub anggota
Subhanallah walham dulillah
Nabi yullah laen keunira

Teuduek oh noe kabar nabi
Bileue teubit lon calitra
Teulheueh seumbahyang di mesijid
Bileue teubit pantah sigra

Jak u rumoh rasulullah
Teuka gundah hate lam dada
Troh u rumoh pang ulee nabi
Neupeugah kri meunoe haba

Wahe bileue tadeungoe hareutoe
Beek tinggai sidroe ta ek lanja
Sahabat nyang peut beuta peugah
Lon yue langkah keunoe sigra

Sahabat troh le teuma keunan
Umar, usman, ali dan abu bakar
Saidina umar duek blah kiri
Uneuen lagi abu bakar

Neutik jaroe keudeh keunoe
Peubeudoh droe nabi mulia
Abu bakar teuma peugah
Rasulullah deungo nyata

Ulon lumpoe ya rasulullah
Tuan aisyah neukret ija
Alamat ureueng keumatian
Rahasia nyan abu bakar

Saidina umar pih geupeugah
Dilon leumah lam rahasia
Pintoo adil nanyum reubah
Habee runtoh lon eue rupa

Alamat ureueng kematian
Tafsir meunan kheun saidina
Maka seumah saidina usman
Ya janjongan lom pih hamba

Bak hambanyoe tuhan peuleumah
Mesjid madinah ka binasa
Habeeh luroh binteh bubong
Ureueng gampong sosah raya

Alamat ureueng keumatian
He usman lumpoe gata
Teuma seumah saidina ali
Ulon lagi na rahsia

Pintoo ka’bah nanyum teubalek
Ulon tilek rhet ie mata
Yohnyan sahbat moe meuree-ree
Kameutentee nabi bungka

Teuma seumah saidina abbas
See khalifah gantoe saidina
Oh ka leupah wafeut pang uloe
Soe meutentee mat neuraca

Jaweub nabi rasulullah
Keu khalifah abu bakar
Nyang geulantoe wahe sahbat
Beek tabantah barang kabar

Be ek talinteung ngon tabantah
Meung dube drah beek dakwa
Nyan wasiet lon beuta ingat
Wahe umat ban simuwa

Soenyang ubah wasiet lon nyoe
Page dudoe teumeu reuka
Nyoe bacut treuk ulon tanyong
Kheun beukeunong hanpu mara

Beek male nyan tapeugah
Kareuna allah ta calitra
Soenyang na hak nibak kamoe
Peugah jinoe lon ngon gata

Sona lonpoh ngon lon caret
Sona lon dhet bandum gata
Lon meung bajeue bak uroenyoe
Kareuna kamoe hendak bungka

Sahabat jaweub seukalian
Hak kamoe tan bak maulana
Hana patot nabi salah
Kamoe dumsah nyang meudosa

Kayem salah kamoe bak nabi
Saleeh pakri ya saidina
Sari habeh dum peuneugah
Teuma angkasah meusuara

Ulon na dilee keunong camti
Masa nabi ateueh guda
Bak jak prang raja leuhat
Keunong tungkat bak rueng hamba

Wahe angkasah dilon tuwoe
Jinoe tagantoe ateuh hamba
U bak dilee sabda nabi
Jak cok camti keunoe sigra

Tajak laju nyan u rumoh
Camtin lon keubah nbak tangga
Bileue neujakle nyan u rumoh
Ta eue mehmoh pantah sigra

Hoka gata tuan siti
Tacok camti yu saidina
Dawa angkasah ateueh nabi
Neuyue tung camti u bak gata

Tuan fathimah seu ot leugat
Soe galak that lob nuraka
Yohnyan gundah tuan siti
Neudeungo nabi keunong dakwa

Neudeungo angkasah lakee balah
Maken susah roe ie mata
Oh saree troh camti keunan
Lom janjongan neumeu sabda

Nyoepat camti he angkasah
Tatung balah uleh gata
Abu bakar peu ek seumah
He angkasah deungo hamba

Gantoe siseuen ateuh nabi
Siplooh kali tapoh hamba
Wahe mukmin seukalian
Ateuh gata han ulon rila

Taim gata raja kamoe
Uloen teunyoe ngon saidina
Abu bakar kaneu im droe
Maret jinoe saidina umar

He angkasah deungo lon kheun
Duaploh seuen tapoh hamba
Lon theun gantoe rasulullah
Di angkasah hanji rila

Teuma marit di usman
Ganto janjongan ateub hamba
Ateuh ulon lheeploh kali
Taboh camti uleh gata

Wahe raja dungo kamoe
Get taim droe hana lon rila
Teuma seu ot saidina ali
Peuploh kali badai saidina

Seu ot angkasah han loen tem
Nyang get ta im droe ya maulana
Amren husen pih lakee theun
Limong ploh kali badai saidina

Wahe cuco rasulullah
Di ulon bah bak saidina
Han ulon tung barang kaso
Seu ot adoe lom syedara

Amren husen teuma peugah
He angkasah ateuh hamba
Badai siseun ateuh nabi
Namplooh kali tapoh hamba

Meunan meunan bandum sahabat
Di angkasah hana rila
Sabda nabi bak angkasah
Nyopat camti tapoh hamba

Nabi neujok yohnyan camti
Mantong lagi he maulana
He ya saidi buka baje
Dilon dilee hana sapeue na

Masa keunong camti dilee
Hana bajee bak anggota
Nabiyullah neusued bajee
Rakyat meuribee kalon rupa

Oh ban leumah tubooh muhammad
Meuhamno nubut jeut anggota
Yohnyan leumah tuboh muhammad
Com bak pusat deungon dada

Oh lheuh neucom le angkasah
Kaneupeugah bak sahabat dumna
Ya habibi ulon peugah
Jinoe ka jeulah ya saidina

Nyoe keuh hajat lon meukeusud
Jeut lon tuntu sunggoh raya
Sabda gata yoh saboh roe
Lon ngo keudroe ngon teulinga

Soe meutemee com bak pusat lon
Jihnyan tumpat lam syuruga
Hanlon tukri mita lagee
Uleh pang ulee buka dada

Suka bandum dumna umat
Nabi muhammad leumah bak dada
Geu eu cahaya that meuhamboo
Geumoe be e tuha ngon muda

Bee chulumbak bee keutanggi
Bee kasturi gaharu jeumpa
Teulheuh nyan neutob dada nabi
Neukheun lagi dinap mata

Nyoe tadeungo ulon peugah
Angkasah nyoe asoe syuruga
Beudoh umat dum teurasi
Mumat jari peumeulia

Bunoe beungoh keu angkasah
Sitthat tuah di kepala
Kakeuh habeh buet angkasah
Nabiyullah tinggai donya

Laila haillallah
Rasulullah katroh masa
Nabi muhammad katroh janji
Troh edrail suroh rabbana

He edrail tajak jinoe
Geunaseh kamoe nabi muhammad
Geunaseh lon nyoe keunoe taba
Suara mangat tapeue mulia

Beek tatamong lam u rumoh
Meugoh saleuem izin rila
Meugoh suroh geyue masok
Pintoo meurook tayue buka

Takheun saleuem nibak kamoe
Narit meunoe ta calitra
Peurman tuhan ya habibi
Katroh janji ajai gata

Beuket izin ulon masok
Jikalee han ulon gisa
Meunan perman nibak rabbi
Bak edrail neuyue tanya

Subhanallah wabihamdihi
Troh edrail bak saidina
Dua blah uroe rabiul awal
Troh bak ajal nabi mulia

Aneuk ngoen cuco wie ngon uneuen
Umar, usman dan abubakar
Saidinan ali pih di sinan
Peut sahbatnyan leubeeh mulia

Malengkan mawot dong dipintoo
Han neulaloo bah diluwa
Tuan fathimah neutren leugat
Neujak lihat sigra sigra

Ban neukalon hana jeut rab
Ureueng arab hibat raya
Hantom lon eu ureueng arab
Hibat cakap lagi raya

Edrail bi saleuem leugat
Teukeujot that fathimah zuhra
Geumpa asoe yo meuthat that
Pansan leugat hanle haba

Edrail tren yohnyan pulang
Kaneuriwang lam syuruga
Cok kopiah troh datang
Neu ek rijang sigra sigra

Neucom bak hidung tuan fathimah
Teubit nafas teubleut mata
Likot pintoo lom neujak dong
Neupreh mantong nabi rila

Bak fathimah sabda nabi
So berdiri di pintoo tangga
Jaweub fathimah sabda nabi
Han lon turi ya saidina

Wallahu’alam hanlon turi
Wahe abi tanglong donya
Kadang sinan likoot pinto
Ulon tahe lon eue rupa

Lon meung tanyong pane tuan
Han tuhan bri suara
Teukeujot lon ya rasulullah
Lon woe pantah bak maulana

Badan hibat raya panyang
Akal tercengang lon eue rupa
Sidroe arab that samlakoe
Hantom puro lagee nyangka

Tuboh leusooh lagi hibat
Pane umat keunoe teuka
Yohnyan nabi kateupike
Lalu hile non ie mata

Yohnyan sabda alaihissalam
Ban mu’anikam hamba kira
Fathimah deungo sabda nabi
Neupeurab le pantah sigra

Tuan fathimah susah hate
Neumoe sabee nabi mulia
Sireuta neukheun kabar meunoe
Sira neumoe rhet ie mata

Bukon arab he aneuk droe
Jroh samlakoe ta eue rupa
Na turi he boh hate
Urueng peucre lon ngoen gata

Han taturi he aneuek droe
Han taturi hai bijeh mata
Ureueng lakoe ureung binoe
Tapeu runoe oleh gata

Malengkal mawot hai aneuk droe
Tahei keuno taba sabda
Tuan fathimah dong dipintoo
Ie mata ro basah ija

Hoka gata tuan arab
Keunoe tapeurab deungo sabda
Tamong ezrail nibak muhammad
Deungon nekmat lam syuruga

Serta saleum keu muhammad
Deungon nikmat keu maulana
Assalamu’alaikum ya muhammad
Saleuem hadharat nyan keu gata

Poteue allah sangat meuchen
Beuget izin jinoe gata
Beukit izijn ya janjongan
Jikalee han bah lon gisa

Sabda nabi ulon syukor
Ban nyang hukom ulon rila
Lon meutanggoh saboh sa’at
Sabab sahabt gohlom teuka

Jibrail saudara ulon
Pat takalon uleh gata
Mantong dilikoot ya nabiyullah
Suroh allah hias syuruga

Nakeuh siat tanyong nabi
Troh jibrail keunan teuka
Assalamu’alaikom ya habibullah
Wa’alaikom salam ya ikhwani

Kheun jibrail nibak nabi
Suroh rabbi hias syuruga
Sigala aneuek tuan siti
Budiadari muda muda

Padum kande indah indah
Suroh allah neuyue peunyata
Neuyue buka syuruga lapan
Suroh tuhan u bak hamba

Pintoo langet tujoh lapeh
Bandum habeh neuyue buka
Dum meusak sak malaikat
Preh neu intat nabi mulia

Nabi ucap alhamdulillah
Rahmat limpah ateueh hamba
Leubeeh gaseh that nibak allah
Leubeeh indah neupeu mulia

Ulon tanyong ya jibrail
Peulom lagi nyang mulia
Kheun jibrail awal syufeue’at
Ya muhammad cit bak gata

Dumna leubeeh neubri bulung
Awai geutueng syufeue’at gata
Dudoe nibaknyan nabi laen
Meunan izin bak rabbbana

Alhamdulillah ulon syukor
Rahmat that le ateueh hamba
Laen nibaknyan ya jibrail
Peulom lagi nyang mulia

Kheun jibrail he pang ulee
Tamong dilee umat gata
Syuruga neuraka han neupasoe
Meugoh sampoe umat gata

Umat gata nyang meutentee
Tamong dilee lam syuruga
Jaweub nabi alhamdulillah
Syukor keu allah nyang that mulia

Nyangkeuh lon preh ya jibrail
Jeuet lon sudi u bak gata
He saudara lon ya jibrail
Soe peumandi wafeuet hamba

Soe sibu ie soe peugafan
Sembahnyang soe imum nyan taba
Pat tanom tapeugah kri
He jibrail kheun sigra

Nyang sibu ie meuhat kamoe
Nyang seumanoe saidina umar
Nyang peusuci tuan usman
Nyang peugafan ali murtala

Nyang keu imum seumbahyang jenazah
Nyoe loen peugah abubakar
Nibak gampong tuan asiyah
Rasulullah kubur gata

Jibrail kheun dum meutentee
Nabi peuthee bak sahabatnya
Nyoe ban neukheun le jibrail
Meunan sahabat takeurija

Malek mawot duek di uneun
Siteuntang ngon buju muka
Tujoh ploh ribee malaikat
Jak horeumat nabi mulia

Nyang duek diwie hasan husen
Sahabat laen han terkira
Sabda nabi rasulullah
Serta bohbah ngon ie mata

Tanyoeng jibrail ya nabi saleh
Mantong sayang nyan keu donya
Jaweub nabi he ya akhi
Han sayang lon keu donya

Hana sayang keu aisyah
Keu fathimah han lon kira
Sahbat nyang peut hana lon chen
Hasan husen han lon cinta

Sayang lon that cit keu umat
Teumakot that darohaka
Salang na lon mantoeng disinoe
Geunab uroe pubuet dosa

Nyankeuh seubab teuka gundah
Lon takot that darohaka
Abubakar pih disinoe
Yoh masanyan rab saidina

Banpeuet sahabat digeunireng
Maseng maseng duka cita
Aisyah mueng ulee nabi
Tuan siti duek rab dada

Tuan fathimah neumoe sabee
Ie mata hile basah iaj
Teuma sabda nabi muhammad
Neubri ingat keu aneukda

Wahe aneuk tadeungoe lon kheuen
Sep nam buleuen cre ngon bapa
Beekle tamoe aneuk lidah
Gaseh allah that keu gata

Ban neudeungo sabda nabi
Teutap hate lam dada
Rasulullah neucok sugoe
Bak judo droe nyang seutia

Lheuh meusugoe rasulullah
Teuka ubah warna muka
Mata nabi ka mumandang
Neukalon hu nyawong geuba

Jibrail pih hana jarak
Neupandang bak nabi mulia
Oh troh nyawong bak haleukom
Nabi meuphoom theuen nazeu’a

Jibrail hanjeuet le neungieng
Kaneupaleng teuma muka
Ya jibrail peu neupaleng
Saleeh ban chit nyang keuhamba

Jibrail kheun lon gaseh that
Hanle dapat lon eue muka
Sabab hanjeut le lon lihat
Sayang lon that he saidina

Nabi neukheun laila haillah
Sajan nafah sigoe keuluwa
Malam seunanyan wafeuet nabi
Wafeuet siti buleuen puasa

Wafeuet nabi lam lumung aisyah
Alhamdulillah kasampurna
Bak masanyan srah jibrail
Ireng nabi nyawong geuba

Tujoh ploh ribee malaikat
Nyawong geu intat lam syuruga
Fatimah moe bukon le sayang
Sang meuguncang langet donya

Asiyah kheun e janjongan
Soe peutimang umat dumna
Masanyan moe dumna umat
Sang kiamat langet donya

Nyang leubeh that tuan fathimah
Ngon aisyah meugisa gisa
Meunguncang aras ngon kursi
Tuan siti beukah rasa

Di mariyam pih neu ba e
Su meuche che hana reuda
Allah nabi rasulullah
Soe peurintah lom agama

Oh tan gata saleeh pakri
Wahe nabi tanglong donya
Hasan husen pih cit neumoe
Ro geumanoe ngon ie mata

Ehai duchik tinggai kamoe
Soe peurunoe rijang jula
Sahabat laen han peu peugah
Subhanallah han ek kira

Nyang hana moe wahe ya akhi
Bangsa nasrani nyan ban hawa
Laen nibaknyan bangsa yahudi
Nyan pih meunan saboh bangsa

Seb keuh dumnan ulon peugah
Tan faedah panyang cakra
Kareuna buetnyoe kabar nabi
Tan beurani lontung laba

Ubee nyang na bak naseukah
Bak nyang salah neupeue beuna
Hingga nabi geuseumanoe
Geu uet asoe patna nyang leupa

Saidina umar seumanoe nabi
Sibu nabi ie krung kalkausar
Saidina usman nyang peusuci
Sahabat laen rahoob muka

Hasan husen pih disinan
Mueng uleenyan nabi mulia
Aneuk abbas gusuk bak gaki
Aneuk ali gusuk bak dada

Nyang mat asoe adun adoe
Bandua droe duka cita
Saidina ali booh lam gafan
Seumbahyang keu abu bakar

Gafan nabi lhee lapeh
Kaen halooh jroh that rupa
Bandum neubooh uleh ali
Gafan yamani teutap seumua

Gafan geubooh troh u gaki
Tuan ta’ali lom berkata
Peurab keuno hasan husen
Peulheuh meucen ngon saidina

Hingga peurab hasan husen
Com nibak dhoe nabi mulia
Habeeh umat habeh sahabat
Com bak talak saidil mustafa

Hingga cukop sileungkapan
Nyang seumbahyang abubakar
Malaikat ren meuribee-ribee
Kunjong pang ulee dalam donya

Soh keuh langet ngon kursi
Tuhan rani nyang kuasa
Seubab leubeeh nabiyullah
Neuyue seumah ban simua

Pinto syuruga lapan pangkat
Tuhan halarat nyang yu buka
Habeeh teuhah syuruga lapan
Berhamburan khulumbak jeumpa

Bee komkomma bee kasturi
Hirom lagi bee syuruga
Geupeutron nikmat sileungkapan
Dum perhiasan lam syuruga

Padum padum budiyadari
Hana sakri meulaksa laksa
Bandum jimee nyan ngon tanglong
Dum ji usong hana tara

Tuhan yumee sileungkapan
Jeuneh rihan indah rupa
Teuma reuhab meutatah meuh
Cahya peungeueh eumah uluwa

Tuhan yumee kaen sandosen
Tuhan yu salen lam syuruga
Padum suara bunyi bunyian
Geu arakan jeunazah geuba

Malaikat dum seumbahyang
Teulheuhnyan pulang dum geugisa
Ladom tinggai arak jeunazah
Ban nyang titah bak rabbana

Bak pintoo langet ladom geupreh
Sabab leubehh geupeumulia
Oh sare troh u bak tuhan
Leubeeh nibaknyan geupeu tahta

Katroh nyawong bak hadharat
Malaikat deungo sabda
Tapeuteumeueng he malaikat
Nibak tumpat nyang that mulia

Tapeurasa dumna lezat
Dumna nekmat lam syuruga
Malaikat nyang hantar khimah
Han ek ingat sigom donya

Aras kursi lom ngon kalam
Jimoe bandum hana reuda
Allah ya allah ya rasulullah
Pat takeubah umat dumna

Habeh jimoe seukalian
Bandum insan hate reukha
Bukon sayang dum seukalian
Jihei tuhan sidroe esa

Urueng lakoe ureueng binoe
Habeh jimoe tuha ngon muda
Ulama dum tik syurban
Nabi katan hanle kuasa

Soe peugahlom hadis peurman
He janjongan oh tan gata
Oh meutamong lam meuseujid
Solom marit nyang bri aja

Allah ya allah ya habibi
Saleh pakri umat gata
Nyang hana moe biek yahudi
Kawom nasrani paleh raya

Sabab han jimoe bik siparsi
Kareuna benci keu maulana
Dijih banci meuna nabi
Han jitukri keumeueng daya

Dumna syetaan hate galak
Trohban kheundak napsu hawa
Oh hanale nabi muhammad
Ek jipeungeuet umat dumna

Soe kutakot oh tan nabi
Kutaki ban saboh donya
Meunan jikheuen ibliih syeetan
Ingat taulan dum teurata

Saleeh bit meunantroh banjikheun
Hukom tuhan zat nyang esa
Teutapi nyang umat nabi
Han sikali paleng muka

Bah jidaya beurang kakri
Bah jigegee lam lam mata
Wasiet nabi han ku ubah
Amanah han kupeu tuka

Sampoe u nabi u meuseujid
Sigala sahbat dum sireuta
Oh sare habeeh sahabat lalu
Geutop pinto meusjid raya

Seumbahyang dilee malaikat
Dumna umat tuha ngon muda
Teulheuhnyan seumbahnyang sigala sahbat
Uroe teungoh cot rab seunia

Karonya po bri tuhanku
Nabi u kubu leugat geuba
Keutika luhoo troh bak watee
Tanom pang ulee nyang mulia

Malaikat nyang teumanom
Sahabat sajan dum sireuta
Abdurrahman saidina ali
Peutamong nabi lam kuburnya

Nyang ron tanoh saidina usman
Umar sajan ngon abu baka
Tanoh madinah tanoh kubu nabi
Tanoh nyang suci hana leta

Dalam mesjid tumpat kubu
Tanoh meusyuhu hana tara
Pintooo bumoe bandum teuhah
Kubur luah hana tara

Cukop hase sileungkapan
Dum beebeewan lam syiruga
Beuthat hirom hana lawan
Ngon perhiasan alat syuruga

Dalam kubu sang peungeh sang uroe
Po geutanyoe nyang karonya
Dalam kubu jeuneh perhiasan
Punoh beebewan gaharu jeumpa

Budiyadari ngon malaikat
Suroh halarat nyang peutahta
Hingga cukop sileungkapan
Nabi janjongan lam kuburnya

Karonya po sidroe tuhan
Jibrail peu ingat bak umatnya
Bak uroenyoe hanle narit
Lon keubit kujak gisa

Hoka gata wahe umat
Dum amanat beek talupa
Ban nyang wasit rasulullah
Beek ta ubah bandum gata

Beek tapateh daya syeetan
Kiri kanan yang mulia
Beuta ingat wahe umat
Uroe kiamat rab ka nyata

Limong ploh peut thoen wahe sahabat
Hadis nabi neucalitra
Nalom neutren dilikot nabi
Sikureueng kali tron didonya

Tren seuleuso uroe dudoe
Hanle nanggroe kiamat donya
Raseuki habah kalam singkat
Katroh hayat alam donya

Teulheuh neukheun le jibrail
Moe meureb reb umat dumna
Maseng maseng ingat keu nabi
Pakri pakri ya rabbana

Lheuh nibaknyan sebkeuh ohnoe
Umat dumwoe maseng tangga
Oh troh u rumoh meuchanduri
Akan nabi nyang mulia

Maseng maseng meukhanduri
Troh lhee hari hana reuda
Tuan aisyah meukhanduri
Troh lhee hari wahe syedara

Abu bakar duablah hari
Dum seunari lakee do’a
Laen nibaknyan sigala sahabat
Maseng maseng ingat keu maulana

Bahkeuh ohnoe teutap siat
Nabi muhammad dalam seuniya
Tuhan peuteutp seugala umat
Dalam ta’at keu rabbana

Kakeuh tamat wafeuet nabi
Hai boh hate tapercaya
Nyanghan peucaya khabar wafeuet
Dudoe azeub lam nuraka

Jeut keukaphe asoe jahanam
Sotan iman wafeuet ambia
Oh noe teutap kabar wafeuet
He tengku cut tapercaya

Oh noe kakeuh habeh
Ingat wareh dum simua
Watee neukheun jampang jampang
Beek hai taulan wayang seunda

Beek le canek watee neukheun
Wahe buleuen ingat keu dosa
Beugot tatroh dalam rumoh
Seue oh peunyaket han rab ga

0 comments:

Post a Comment