~ 10 SEUBAB GEUTULAK DO'A ~

Pengarang : Akhbar Al-Mutawassila

Nibak siuroe, Ibrahim bin Adham
Teungoh berjalan, wahee syedara
Di kuta Basrah, geujak lam Peukan
Ureung masa nyan, teumanyong teuma

Pakon Ya Syaikhi, kamoe seukalian
Meulakee bak Tuhan, geukaboi hana
Padahai Tuhan, kalheuh meukalam
Tiep permintaan, pasti Geu maqbula

Abu Ibrahim, peugah masa nyan
Han mungken Tuhan, geu maqbol do'a
Bak awak gata, na 10 halangan
Sabee atra nyan, da-em keurija

Peureutama phon, taturi Tuhan
Tapi Haq gobnyan, tatunai hana
Nyang kedua, tabaca Qur an
Tapi pengamalan, lam udep tanna

Nyang keu-3, tameumusoh ngon syaithan
Tapi seruan, juga teurima
Watee jipakat, dalam kemungkaran
Sigra rijang, menta'atinya

Seulanjot jih, gata nyatakan
Umat pilihan, rasul Musthafa
Teutapi sunnah, pakon tinggaikan
Nyan keuh alasan, Keu-4 marduda

Nyang keu-5, gata harapkan
Lam Jannah Tuhan, tiep-tiep kutika
Namun digata, tanna amalan
Meunyoe lagee nyan, peucuma saja

Takot that-that, gata keu Na-Ran
Seubab keu-6, do'a marduda
Hantom taplueng, bek rhoh keunan
Jalan keujahatan, maken meudoda

Nyang keu-7, Ayyuhan Insan
Akan keumatian, teumakoet raya
Tetapi hana, peugoet persiapan
Lam kehidupan, gadoeh ngon lagha

Ban beudoeh eh, meunyang keu-8
Sigra calitrakan, 'aeb syedara
Keu 'aeb droe, hantom hisabkan
Nyan pih sinan, paloe leumpahna

Nyang keu-9, watee kematian
Gata kuburkan, manyet syedara
Hana tacok, sinan peulajaran
Maka seubabnyan, do'a marduda

Nyang seuneulheuh, cuba renungkan
Dumna nikmat Tuhan, tangui lee gata
Hana ta syukur, keupada Tuhan
Sabee lagee nyan, geutulak do'a

Meumada 'ohnoe, ulon khabarkan
Didalam bayan, geutulak do'a
Pat na salah, atawa kesilapan
Peumeu'ah rijang, Akhbar Al-Muwassila

Lhokseumawe, 23 Maret 2013