*NASEHAT LUQMANUL HAKIM*

Pengarang : Alhadi Andika

Alhamdulillah segala pujoe meuwoe keu rabbi...
Yg bi raseki keu mandum hamba...
Seulawet salem sabe meucurah keu baginda nabi...
Bak ule titi geubi syufu'at hamba...

Salam 'alaikum hay insan seni...
Keu sidroe wali lon neuk calitra...
Luqmanul hakim nama di wali...
Yg taat keu rabbi si umu masa...

Nibak si uroe neujak di wali...
Dua ngoen putehdi u pasai kota...
Di ateuh himar geuduk di wali...
Sinyak putehdi ngoen tapak saja...

Rame yg upat keu peurangui wali...
Sunggoeh di abi gaseh tanna...
Sayang aneuk di jak ngoen gaki...
Ateuh himar abi, senang saja...

Karna geudingoe ureung ceumaci...
Maka di wali geu balek cara...
Ateuh himar geuyu duk putehdi...
Sedangkan di abi ngoen tapak teuma...

Teuma dikheun leu ureung dengki...
Sunggoh sinyak putehdi adab hana...
Abi katuha diyu jak ngoen gaki...
Pakoen putehdi lage nyan cara...

geu'ek ateuh himar laju di abi...
Sajan putehdi sapat mandua...
Teuma dikheun leu ureung iri...
Biet that yahudi peurangui hamba...

tanna di gaseh keu makhluk rabbi...
Sampoe qalbi di giduk mandua...
Laju neu troen ngoen sinyak pudehdi...
Jinoe ngoen gaki geujak mandua...

Laju di kheun le ureung peurati...
Bangai sekali dua droe hamba...
Na kendaraan geujak ngoen gaki...
Tan geu manfa'ati kendraan geuba...

Nyan keuh hay aneuk dunia ini...
Yg Salah dipeurati leu manusia...
Pue yg tapeubut bek ta padoli...
Asai di rabbi tanyoe geuridha...

Tanyoe na akai hay nyak putehdi...
Bek tapadoli perangui hamba...
Laju tapeubut peu yg ta yakini...
Ingat keu rabbi gata bek lupa...

Beu gigeh hay aneuk mita raseuki...
Yg hale hay putehdi yg neu usaha...
Mangat gata hanjeut ke faki...
Di dunia ini hudep bahgia...

Na 3 perkara yg na bak faki...
Yg sereng terjadi hay aneukda...
Perkara yg phoen hay putehdi...
Iman di hati mudah teugoda...

Perkara keu dua bak si faki...
Leumoh ingati bak keunira...
Bagah jie tiepe leu ureung dengki..
Meunan terjadi hay bijeh mata...

Peukara yg keu lhee hay putehdi...
Tanna si faki keyakinan di dada...
Tp yg leubeh celaka hay putehdi...
Yg mita raseki deungoen riba...

Hale harem tan di padoli...
Hukom rabbi jie peuringan hamba...
Jie anggap ringan syari'at nabi...
Mita raseuki asai ka laba...

Cukop celaka ureung mita raseki...
Yg tan padoli hale ngoen riba...
Beujeut keu manfa'at hikayat ini...
Ingat hay akhi hukom ta'ala...

Meunyoe na salah nibak alhadi...
Meu'ah hay akhi khilaf hamba...
Neuci baca serta perahti...
Neutegor alhadi yg salah haba...

Wassalam
 *ALHADI ANDIKA Selangor, 24-03-2013*