KISAH : MUDA SEUDANG

Pengarang : Akhbar Al-Mutawassila

Assalamu'alaikum, tanglong Jeumeurang
Saleum riang, didalam hatee
Keupada Allah, pujoe talayang
Keseuljahtraan, keu nabi Akhe

Uroe nyoe, didalam karang
Muda seudang, haba tarawee
Kiban beuhoe, jih lam prang
Ji teureubang, mita matee

Sidroe aneuk, muda seudang
Dijak lam prang, lawan kaphe
Peulana guda, ka jipasang
Cok geuliwang, deungoen beude

Diba Peudeung, ngoen alat prang
That guransang, dalam hatee
Oh troeh keudeh, lam mideun prang
Di ceumeucang, Shallu Alee

Lee that matee, kaphe suang
Keunong cincang, ladoem ngoen beude
Aneuk muda, got that seunang
Kaphee jiprang, dum sagoe bee

Padum uroe, ka di meuprang
Kureung imbang, lawan kaphe
Teuma syahid, muda seudang
Bak teungoh blang, ka-meugulee

Sunggoh that jroeh, hana bimbang
Mandum barang, tan tingat lee
Tinggai rumoh, gampong ngon blang
Tinggai ladang, bak bineh glee

Muda seudang, woe bak Rabban
Syuruga lapan, Chiet ka hasee
Meunan janji, lam Quru an
Nikmat Tuhan, hebat kon lee

Budia-dari, ireng sajan
Rupa jih ban, cahya kande
Tujoh ploh droe, saban-saban
Nyang balasan, bak prang kaphee

Mantoeng keuh na, nyang lagee nyan
Muda seudang, puteh hatee
Bak jimuprang, hana seugan
Agama Tuhan, bek jipeu reulee

Tamat oh noe, asoe karang
Keu meungulang, nibak rawee
Pat na salah, teugah rijang
Nak reumbang, seunang hatee