‎"GADEOH BAK MATA"

Pengarang :  Agam Sidroe

Assalamu'alaikom, saleum loen hujoe,,
Saleum loen puwoe, adoe deungoen A,,
Gampoeng ngeon kuta, rata jeut sagoe,,
Keunoe tapeutoe, ta atoe kata,,

Loen cuba rika, kata loen hujoe,,
Kisah loen puwoe, lam saboeh desa,,
Tinggai deungoen ma, ayah han meuhoe,,
Bak saboh uroe, gadeoh lam rimba,,

Sayang di aneuk, naseb ka meunoe,,
Deungoen poma droe, hudep lam rimba,,
Soe kaloen hana, si uroe-uroe,,
Sabe meulangue, manoe ie mata,,

Tanyoeng le aneuk, bak saboeh uroe,,
Wahe poma droe, ayah loen hoka,,
Hana geu gisa, padum treb sampoe,,
Pakoen jeut meunoe, hana meuhaba,,

Pakoen goeb laen, seunang han bagoe,,
Malam ngeon uroe, deungoen ayahnda,,
Intat sikula, ngeon peng lam jaroe,,
Tapi diloen nyeo, soe pakoe hana,,

Pakoen di ayah, hana geu woe-woe,,
Pakoen poma droe, neu jaweub sigra,,
Peu hana cinta, sayang geutanyoe,,
Maka jeut meunoe, tinggai ngeon poma,,

Jaweub le poma, dada sang seungkoe,,
Meusoek lam sagoe, manoe ie mata,,
Hai neuk ta saba, do'a ayah droe,,
Bak jroeh asoe, tamoeng syuruga,,

Awai geu gisa, ayah ka geuwoe,,
Bak Tuhan sidroe, Allah Ta'ala,,
Sampoeh ie mata, meu bekle kamoe,,
Do'a nibak Po, hai bijeh mata,,

Lam leunkiek tapeh, sideh lam sagoe,,
Di aneuk dimoe, meusoek lam dada,,
Diroe ie mata, leumoeh ban asoe,,
Ka teu eh sidroe, ngoen hate luka,,

Sayang di poma, malam ngeon uroe,,
Ayah han meuho, awai geu gisa,,
Ngoen peng beulanja, hana soe pakoe,,
Raja lam nanggroe, tuwoe keu jasa,,

Ayah lam rimba, cerita dudoe,,
Geu peutheun nanggroe, goeb nyan syuhada,,
Dalam Agama, masa troeh sampoe,,
Nyawoeng geu publoe, seubagoe tanda,,

Meuhoka gata, Raja lam nanggroe,,
Meuhoka asoe, yang mat kuasa,,
Peu ka meumada, cara lagee nyeo,,
Neu tinggai kamoe, sinoe lam rimba,,

Meuhoka dana, hak di kamoe,,
Laen dum sampoe, kamoe ka hana,,
Pakoen yang kaya, sabe keudroe-droe,,
Gasie lam sagoe, soe hiroe hana,,

Sibijeh bangsa, Atjeh lhee sagoe,,
Sibadan asoe, dalam keureunda,,
Saboeh keuluarga, meunan ban neuproe,,
Pakoen 'oeh dudoe, ka laen cara,,

Pakoen adoe A, laen meugantoe,,
Pakoen rakan droe, laen meutuka,,
Bek taplah dua, si aneuk gandoe,,
Bekle meulangue, manoe ie mata,,

Agam_sidroe at Kuta Radja