“HANSEP SIKUREUNG, KUREUNG SITANGKE”

Pengarang : Tgk Diyueb Bruek

Meuprang Baroe jeh, Jimeusu Bude
Jinoe hana le, ka atueh meja
Meuprang politik, urueng dum mate
Utak dum cayee, pike beulanja

Bak dali adat, Aceh rab reule
Hansoe le pike, rakyat jeulata
Meupajan keuh troek, peumimpin ade
Rakyat ji pike, jibri seujahtra

Meubek keu pruet droe, saja ji pike
Rakyat dum mate, hana soe kira
Peuputoeh Hukom, ngoen laras beude
Aceh ka reule, meumeunan cara

Hansep sikureung , kureung sitangke.
Sabee lam dilee , tijoeh ie mata.
Rakyat di Atjeh , dalam prang sabe.
Ba that tan sue le, beureutoh seunjata.

Rata jeut gampoeng, sampoe sagoe glee.
Mantong na mate , dalam deurita.
Mantong meuhukom , kiban kheun kafe.
Mantong coek hase, makanan riba.

Nyoeng pimpin nanggroe, dhalem beukoen lee.
Mantong kut hase, Atra negara.
Rakyat melarat , hana d pikee.
Ek ditem cungke , dum khas neugara.

Ureung mat hukom , keujam beukoen lee.
Hukuman mate , salah jieh hana.
Rame that ta eu , jinoe dum mate.
Bak larah budee , geusidang hana.

Di Indonesia, sayang beukoen lee.
Rame yang mate , rayak jeulata.
Hoe ka pemimpin , nyoeng peugah ade.
Pakoen jeut mate , hoe ka suara.

Sayang that lampoeh, kaye kamate.
Timoh dum saree, di naleung rimba.
Sayang that nanggroe , tan lee soe pike.
Darah dum dilee , hana soe kira

Biat ngoen sumpah, masa dalam gle
Jinoe hana le, Bandum ka lupa
Sumpah ka tinggai, sideh dalam gle
Hana soe pike, kifarat hana

Kifarat sumpah, ngoen Rabbon kade
Meu sidroe tan le, juet tapeucaya
Seudang ngoen Tuhan, jitakoet tanle
Yangna jipike, meukawen dua

Peureule keu eumpang, wate boh pade
Peureule keu beude, wate prang Raya
Peureule keu Rakyat, masa dalam gle
Jinoe hana le, soe ingat jasa

Meusoe intat brueh, masa dalam gle
Meusoe bloe beude, pat dicoek dana
Meusoe yang bantu, bloe anuek beude
Tacuba pike, pue na meujasa

Meupakon jinoe, wate meu hase
Hana soe pike, Rakyat jeulata
Darah Syuhada, di manoe saree
Hanle soe pike, keu inoeng janda

Tragedi Beutoeng, padum na mate
Teu ingat tanle, simpang KKA
Keu rumoeh geudoeng, pih tan teupike
Ka teutoeb hate, kana beulanja

Tamah tsunami, Padum droe mate
Tacuba pike, padum droe janda
Padum droe yatim, Ayah hana le
Jinoe ci pike, pakriban cara

Rakyat tabantu, taci seumike
Aceh bek reule, pakriban cara
Ta jaga Dame, bekle meupake
Bekle su bude, lage yangka ka

Tabagi hasil, bandum beu ade
Laot deungoen gle, gampoeng ngoen kota
Tapeugoet nanggroe, mangat bek reule
Kropsi ta use, di Aceh bek na

( Tgk.Diyueb Bruek , 09/03/2013)