PENGARANG : AKHBAR AL-MUTAWASSILA
Alhamdulillah, lon pujoe Tuhan
Khaliqul Alam, Maha kuasa
Nyang bri raseuki, keupada Insan
Uroe ngon malam, jeut-jeut kutika
Seulaweut saleum, teuma ‘ohlheun nyan
Neubri Ya Tuhan, meubek keuh reuda
Ateuh sahabat, juga ikotan
Juga Ya rabban, ateuh kekuarga
Assalamu’alaikum, saleum lon layang
Jamak sapaan, tuha ngon muda
Nibak uroe nyoe, lon cuba karang
Hikayat Nabi Adam, beseurta aneuknda
Bak si uroe, di Nabi Adam
Wasiet geupulang, 5 perkahra
Bak aneuk cucoe, geuyu sampaikan
Lon atoe urutan, dalam rika
Peureutama phon, bani Adam
Meubek teunang, deungon donya
Contoe ulon, geukheun Adam
Meurasa teunang, dalam syurga
Ta-eu jinoe, wap lagee nyan
Ulon tuan, ka dilua
Nyang kedua, wahee ikhwan
Lanjot Adam, bak aneuknda
Bek tapubuet, perbuatan
Peuseutot kemauan, peurumoh gata
Ulon awai, pih lagee nyan
Sambong Adam, laju teuma
Wap lon pubuet, lon ikotkan
Larang Tuhan, ulon langga
Boh khuldi, bak masa nyan
Lon ‘ap rijang, dudoe keucewa
Meunyang ke-3, tiep perbuatan
Meuta lakukan, hai aneuknda
Keu akibat, pertimbangkan
Nak seu-imbang, ngon reuncana
Meunyoe awai, ulon meunan
Han lon makan, khuldi nama
Han lon pateh, kata azwajan (peureumoh)
Hana hukoman, lagee nyoe cara
Teuma keu-4, ulon peutrang
Meuhatee tan seunang, bak saboh perkahra
Tapeuji’oh droe, bek guransang
Hatee paleng dalam, pasti jirasa
Yoeh awai, geukheun Adam
Ulon tuan, weh-weuh lagoina
Hana mantap, ‘oh lon makan
Dudoe datang, sesai teuka
Nyang keu-5, ban mandum urosan
Musyawarah beurijang, tiep-tiep perkara
Meunyoe ulon, awai meunan
Ngon malaikat Tuhan, lon bicara
Han akan keunong, lagee nyoe ban
Teutap bertempatkan, dalam syuruga
Ka man limong, ulon sampaikan
Tulong neu pham, wahee syedara
Ulon pada, ‘oh noe karangan
Keu peuringatan, tanyoe seumua
Pat na salah, atawa kesilapan
Peumeu’ah rijang, Akhbar Al-Mutawassila
Lhokseumawe, 25 Januari 2013
Subscribe to:
Post Comments (Atom)
0 comments:
Post a Comment