BEK GALAK JEUT KEU "RAJA"

Pengarang : Akhbar Al-Mutawassila


Assalamu'alaikum, wareh syedara
Tuha ngon muda, saleum ukhuwah
Banmandum pujoe, keu Allah Ta'ala
Tiep-tiep kutika, geutanyoe seurah

Keupada Nabi, Rahmat Sijahtra
Ateuh keuluarga, dan para sahbah
Seu-ireng bahoe, bela sayyidina
Sabee seutia, sampoe Qiamah

Sayang kameng, ka patah pha
Keunong geulawa, bak gaki pah
Hadist Muslim, keu asoe rika
Ulon neuk cuba, suet keu surah

Dari 'aisyah, nyang salen haba
Do'a baginda, watee nyan sa'ah
Wahee Ya Allah, meusoe Penguasa
Urusan rakyat jeulata, jipeu sosah

Neubri Ya Allah, atauh nyan "raja"
Beu jirasa, juga apoh-apah
Teuma nabi, lanjot meudo'a
Kusyu' lagoina, di Habibullah

Meusoe teuma, nyang jeut penguasa
Urosan rakyat jeulata, jipeu mudah
Neutulong nyan "raja", Ya 'azza wajalla
Lagee mudah perkara, para hamba Allah

Meunan hai rakan, Nabi meusabda
Lon atoe kata, nazam lon surah
Meusoe na pangkat, sinoe lam donya
Nyang Nabi meudo'a, kalheuh lon peugah

Kon ulon peuyoe, atawa peusuna
Atra lam rika, cuma mau'idhah
Takalon ukeu, meuhan peucaya
Janji baginda, hantoem meu-ubah

Mumada ohnoe, nazam lon pada
Pat salah kata, beuneu peumeu'ah
Chiet mantong putiek, Akhbar Al-Mutawassila
Nibak meurika, lee hana pah

Lhokseumawe, 5 Februari 2013