Pengayrang : Akhbar Al-Mutawassila
(Lon kutep dari asoe Tambeh Tujoh Blaih)
Assalamu’alaikum, Wareh sahbat
Saleum meuhat, keu syedara
Tsabet pujoe, keu Rabbul Ahad
Teuma Shalawat, keu saidina
Nyoe ca e, ulon intat
Keu sahabat, nak neubaca
Lee faedah, Lam hikayat
Punoh hikeumat, hee syedara
Abu Hurairah, Poe riwayat
Nabi Muhammad, nyang calitra
Teuka sidroe, ureung sihat
Ji tanyoeng leugat, nibak Saidina
Ji tanyong zakeuet, padum bagi
Jaweueb Nabi, neukheun lima
Bak ureung gasien, wajeb geubri
Nam bak ghani, ureueng nyang kaya
Kareuna gobnyan, na kemudahan
Maka jeut nam, ngon zakeuet Harta
Limong peukara, wajeb tunaikan
Suroh Tuhan, ateuh hambaNya
Keu ureung gasien, nyang limong bagi
Baci neu rawi, Ya Mustafa
Mangat lon boeh, Eya Nabi
Janjongan kami, khatam ambiya
Sabda Nabi, ‘alaihis salam
Phoen hai tuan, zakeuet mata
Zakeut lidah, lheuh nibak nyan
Keulhee taulan, zakeuet teulinga
Zakeuet jaroe, zakeuet gaki
Han jeuet han tabri, dum seureuta
Ya Rasulullah, ya Habibi
Kiban lonbri zakeuet mata
Zakeuet mata, bek talihat
Ubak ‘aurat, dum manusia
Bek takalon, entreuk meukarat
Meuka lazzat, cukop bahya
Beutatem moe, takot keu-tuhan
Nyankeu lheeban, zakeuet mata
Beulee ta ee, nyan Al-Qur an
Uroe malam, nyan haroh na
Zakeuet geuliyueng, tadeungo bang
Laen sibarang, suroh Rabbana
Bekta deungoe, nyang geularang
Peurintah Tuhan, ta peunyata
Zakeuet lidah, Eya sahbat
Tutoe jahat, bek takata
Bek ceumarot, rata teumpat
Bek meu-upat, tamah dausa
Beulee takheun, Astaghfirullah
Seubot Allah, beulee meudo’a
Laen nibak nyan, beut Quru’an
Zakeuet lisan, nyangka nyata
Zakeuet jaroe, gob bek tamat
Malenkan mudharat, he syeedara
Harta hareum, deungon syuhbat
Bekta mat-mat, seureuta riba
Zakeuet gaki, bekta teubiet
Jak bak maksiet, darohaka
Beulee tajak, u meuseujid
Deungoe khatib, peugah haba
Bek tajak, u rumoh si-dlalem
Ureueng kseureng, meu-ilanya
Bek chiet tajak, bak ureung khem-khem
Ureung kayem, peugot lagha
Bak rumoh nyang, benci Tuhan
Miseue nyan, rumoh beurahla
Jambo tahoe, jambo geundrang
Judi bak rangkang, bek ta-teuka
Beulee tajak, bak teumpat meutuah
Nayang na geudrah, masalah agama
Nyang mei tajak, u Baitullah
Keu kamilah, Islam gata
Soetem Tunai, nyang limong nyan
Ateueh gobnyan, wajeb Syuruga
Syuruga keujih, ulon paban
Meunan keuh ban, sabda saidina
Subscribe to:
Post Comments (Atom)
0 comments:
Post a Comment