Cari

Subscribe:

Ads 468x60px

Pasang Iklan Anda Disini


Sunday, February 10, 2013

PAKOEN MEUSAMPE

Pengarang : Agam Sidroe

Meukru seumangat, Rahmat meu sampe,,
Ie mata dile, pike keu bangsa,,
Cuba loen rika, haba lam cae,,
Aceh ka reule, hase tanle na,,

Dilee koen bangsa, indah meu uke,,
Gampoeng deungoen gle, pike agama,,
Tuha ngoen muda, haba loen tamse,,
Ban sikrak awe, teugloeng lam donya,,

Hana soe cuca, han soe peureule,,
Saban seumike, lahe lam dada,,
Makmu seujahtra, haba meu hase,,
Keu Rabbul Qadhe, hana jilupa,,

Meugantoe masa, cukoep meusampe,,
Rincoeng meu uke, digantoe mata,,
Ala eropa, cuba peuhase,,
Budaya kafe, peucre agama,,

Ka rata wisma, meubura lonte,,
Jameun ka akhe, lahe dum nyata,,
Di aneuk dara, arah hana le,,
Telepun toke, peucaye yang kana,,

Yang habeh gura, di aneuk SD,,
Bak gamba jahe, peulale mata,,
Jak beut tanle na, iman hana le,,
Gadoeh meurabe, jiwoe sikula,,

Di ureung tuha, saboeh peureute,,
Rapat hana pre, dilua kota,,
Dianeuk dara, kajeut keu lonte,,
Mantoeng meurabe, ban saboeh donya,,

Han peu neu hireun, jameun ka akhe,,
Baro SMP, meubadan dua,,
Tingakat SMA, hanpeu peugah le,,
Tapreh keuh hase, bace jiraba,,

Bidang agama, ka mangat pike,,
Mada meuhase, nyan buet Ulama,,
Meunye bak harta, dawa hana pre,,
Ditem meupake, adoe deungoen A,,

Meusalah haba, mata di cungke,,
Ka dipeu bude, ditiek lam paya,,
Peukara dosa, tan di seumike,,
Bak sang hi lahe, keukai lam donya,,

Beu that ta ikat, nyawoeng ngoen rante,,
Ta seupoeh kande, ilmee lam guha,,
Maoet troeh teuka, keubai hana le,,
Dum ilme sihe, ikoet seureuta,,

Nanggroe bahagia, hana meuhase,,
Meuntroe ngoen toke, jeu oeh Ulama,,
Tabalek cara, saban seumike,,
Tapeugleh hate, taubat nasuha,,

Do'a tapinta, bak Rabbul Qadhe,,
Rincoeng meu uke, ta asah sigra,,
Bidang Agama, bekle peujaye,,
Nanggroe beu ade, ban Sultan Iskandar Muda,,

Etno meumada, haba lam cae,,
Keu ubat hate, peu puleh luka,,
Dali ka nyata, buketi lahe
Aceh kareule, tanle Agama,,

Kata lam rika, ie mata dilee,,
Meu'ah loen uke, bak mandum gata,,
Aneuk baroesa, keunoe ban lahe,,
Cuba meu cae, meu sikrak dua,,

Kuta Radja : 9 Des 2012M / 25 Muharram 1434H

0 comments:

Post a Comment