~ HABA PEU-INGAT ~

Pengarang : Akhbar Al-Mutawassila

Assalamu’alaikum, Ayyuhal Ikhwan
Fikulli makan, Kaifa Haluka
Mandum tanyoe, tapujoe Tuhan
Nyang peujeut ‘Alam, jen ngoen manusia

Rahmat-Sijahtra, beu Neu-curahkan
Uroe ngon malam, sipanjang masa
Nakeuh Muhammmad, Nabi nyang Khatam
Neubri Ya Tuhan, bek na toem reuda

Nyoe bacut, haba simpanan
Keunang-keunangan, dari Syaikhuna
Ulon bagi, keu wareh rakan
Mudah-mudahan, jeut meuguna

Beuta ingat, barang kajan
Ci tasimpan, jeut kutika
Hoe tajak, taba sajan
Nyoe peulajaran, ureung Tuha

Akai beujroeh, Pi-E sopan
Nyan hai taulan, that utama
Jampang tajak, dalam kawan
Peulom rakan, muda-muda

Kadang chiet roeh, troeh u peukan
Keu-perluan, nak beulanja
Ta ngui sifeut, nyang sipadan
Meu-pakaian, seudeurhana

Sabee beu jroeh, santon sopan
Ngui pikeran, bijaksana
‘Oh tamariet, deungon lisan
Perkataan, nyang mulia

Ubah Pakhoek, wahee rakan
Buhu pih nyan, gantoe juga
Ureung baca, hana bosan
Nyang keumarang, sama saja

‘Oh tameuyu, bek meudhoet-dhoet
Kureung lagoet, su nyang gasa
Watee meu-ngieng, bek meulikoet
Hana patoet, taboeh muka

Gob teumanyoeng, beuta seu-oet
Leumah leumboet, tameu swara
Takeumira, bek lam kaloet
Hana patoet, meunan cara

Tameu ayang, beu nyang patoet
Janji ka rhoet, ingka bek na
Watee beungeh, bek ceumaroet
Muka pih kroet, meu-seurapa

Kasep oh noe, Nazam lon toep
Nyang neuk su-oet, samboeng teuma
Neupeu meu’ah, pat han patoet
Nyang bek neu dhoet, hee Syedara

Cunda 26-09-2012