SYAFA'AT NABI MUHAMMAD SAW

Pengarang : Al-Din Triengga

Ureung nyang taqwa puja hadharat
Tanda alamat tamong syuruga
Tapi nyoe jeuheut pubuet maksiat
Tanda isyarat tamong nuraka

Dalam al-quran meunan riwayat
Geupeutron ayat nibak saidina
Keu ureung taqwa geubri syafa'at
Sit geubri laknat nyang daro haka

Beudoh rakan lon kawom sahabat
Mita syafa'at nibak Rabbana
Supaya geubri rahmat ngon nikmat
Uroe kiamat blang padang masya

Blang padang masya keubit tutong that
Ju asoe utak meunan calitra
Di mata uroe si pade jarak
Di ateuh talak dum manusia

Meuribee laksa sinan meu sak sak
Meutindeh tapak dalam uroe kha
Lam uroe su-uem luwah meuhalak
Meuribee thon jak bak kira kira

Hana soe tulong beuthat meukarat
Tamoe ngon isak taro ie mata
Hanya amalan nyang jeut peulewat
Gata beurangkat u pinto syuruga

Meunyoe ngon laen hana peu harap
Bah cukop leu that harta di donya
Hanjeut di bantu uroe akhirat
Bah tutong jasad hanjeut dibela

Beuthat di donya gata meugah that
Lom lagi hebat meuseu bube pha
Bah raya tuboh kokoh ngon kuat
Uroe akhirat hana meuguna

Sit nafsi nafsi hadap Hadharat
Bit hana ubat soe tulong gata
Maseng maseng pike keu jasad
Hanjeut meupakat tabagi rata

Nyang sudi keu tanyoe Nabi Muhammad
Geubantu ummat di dalam seksa
Keu ureung islam geubri syafa'at
Uroe kiamat blang padang masya

Ta meuseulaweut beukayem sahabat
Meurumpok syafa'at Rasul Ambiya
Tiep tiep kutika seulaweut ligat
Allah Hadharat Neubri Pahala