Beuna Ingat

Pengarang : Agam Sidroe

Assalamu'alaikum, ban mandum sahbat,,
Saleum loen intat, lam donya maya,,
Saleum lam rika, kata meu surat,,
Makna tersirat, peungalaman yang ka,,

Memang lam hudep, bak dali adat,,
Tanyoe han teupat, seunipat mulia,,
Kadang na ceudra, bak meumat alat,,
Roeh sipat sapat, han teupat banja,,

Kadang roeh meubloeh, pageu meukawat,,
Ladom meusapat, sajan ie tuba,,
Yang tan le rasa, sampoe peu intat,,
Keudeh lam jeurat, ajai troeh teuka,,

Ladom na hate, yang ka brat batat,,
Lidah sang nyum klat, hana le rasa,,
Bak ikoet masa, gaya goeb sipat,,
Sampoe meukeumat, suwah ta hila,,

Hana bahagia, ra ueh goeb sipat,,
Tanyoe grob kawat, goeb khem meu ha ha,,
Cara ta mita, peunteng na ingat,,
Uroe akhirat, koen rekayasa,,

Gaki ta langkah, hate beu ingat,,
Ban mandum nikmat, Po yang kuasa,,
Raseuki ta mita, sujud bek teulat,,
Useuha beu teupat, sabe tiep masa,,

Babah ta intat, yang na manfa'at,,
Jaroe ta ikat, bek roeh lam dosa,,
Bek sampe ceula, gadoeh pat meumat,,
Timu ngoen barat, arah tanle na,,

Balek meutuah, gisa U barat,,
Sujud Hadzarat, zikir lam dada,,
Taubat nasuha, gata seulamat,,
Donya akhirat, leupah bak mara,,