APBA Thon 2013

Pengarang : Tgk Diyueb Bruek

Assalammualaikom, Warahmatullah
Saleum sipatah, bandum Syedara
Keu APBA, hajat lon kisah
Oh kalhueh disah, le DPRA

Pogram Pro Rakyat, Dua ribe lhe blah
Miseu lon peugah, Rumoeh Duafa
Di bantu rakyat, ngoen dana hibbah
Dan lom lon peugah, dana JKA

Nyan Aspirasi, pih meunan ulah
Pogram jipapah, Rakyat jeulata
Meumacam cara, meubagoe ulah
Rakyat jipeugah, peunuek seujahtra

Fakir miskin, Yatim hana yah
Dana diolah, jibantu janda
Bantu petani, supaya mudah
Ngoen Dana hibbah, lam APBA

Bacut lon wasiet, hajat lon peugah
Beugoet neupapah, deungan neujaga
Seubab le tikoh, Pajoeh boh mirah
Jipreh preh jisah, nyan APBA

Tikoh Meudasi, yang ulon peugah
Haba kinayah, lon boh umpama
Tikoh ka caroeng, han keunoeng Geutah
Han keunoeng peutah , Racoen ngoen tuba

Tikoh meu iku , Mudah tapinah
Tikoh meujamaah, jinoe dua pha
Meumacam bagoe, droe jipeuleumah
Meumacam ulah, droe jipeurupa

Dalam Gle Maheng ,Ureung meulampoh
Ateuh Gunong Goh, ureung meurusa
Ulon gatoe ah, jinoe lon coek oh
Buhu lon peuroh, ngat santuet banja

Peumimpin Aceh, Jinoe beusunggoh
Jak paroh tikoh, dalam istana
Suwa neupeuhu, neutoet ngoen suloh
Cara let tikoh, joek bak KPK

Bek bri jabatan, keu bangsa tikoh
Neumat peujampoh, sipak u lua
Istana ngat gleh, bek seumak ngoen broeh
Bekle jipajoh, nyan APBA

Hak Aneuk yatim, bekle jisampoh
Bekle jipajoh, hak inong janda
Hai Pak peumimpin, neu mat peujampoh
Bagah neu paroh , tikoh bek lee na

Meumada ohnoe, haba lon ratoeh
Masalah tikoeh, Lam APBA
Meusoe meuteume, Peujabat tikoh
Neudrop neubungkoh, pasoe penjara

( Tgk Diyueb Bruek/Sulaiman.A.Gani)