Pengarang : Tgk Diyueb Bruek
Alhamdulillah, Pujoe Ilahon
Allah Kadiron, sidroe yang Esa
Yang bri Raseuki, Rahmat Neupeutroen
Keu Bandum kawoem, atueh rhueng Donya
Lhuehnyan seulawuet, keu Muhammadon
Rasul yang Agoeng, khatam Ambiya
Keluarga ngoen Sahbat, seureuta kawom
Yang saboeh payoeng, bela Agama
Jinoe dari lon, Assalamua’laikom
Saleum lon peutroen, bandum Anggota
Dalam grup cae, muprang lam Panton
Kuta ngoen gampoeng, Tuha ngoen Muda
Hajat lon peugah, Meuhaba Tiong
Jigrop grop lamboeng, di dalam cintra
Keu Manusia, jikhuen le Tiong
Saban lage lon, hana meubeda
Ulon Binatang, Bangsa biek Tiong
Bek saban lon, hai Manusia
Gata meuhaba, saban lage lon
Ulon biek Tiong, Binatang Rimba
Peugah tan pubuet, sama lage lon
Hanjuet hai kawoem, Nariet duseuta
Meupeugah mantoeng, Caroeng That ulon
Walaupun Tiong, kon Manusia
Nyan Manusia, beubeda ngoen lon
Pubuet hai kawoem, ban janji gata
Peugah lage buet, pubuet lage khoen
Bek lage Tiong, sit peugah saja
Gunoeng Gurute, Singke Gampong Lhoeng
Tutue Meububoeng, Nanggroe Peudada
Meumada Ohnoe, Haba lon Suson
Meuhaba Tiong, Binatang Rimba
( Tgk Diyueb Bruek/Sulaiman.A.Gani)Tgl.06/02/2013
Subscribe to:
Post Comments (Atom)
0 comments:
Post a Comment