“ TEUTOP NGOEN DUROE, ASOE JEUT TAPLAH”

Pengarang : Tgk Diyueb Bruek

Deungoen Bismillah, lon puphoen kisah
Lon pujoe Allah, ilahon khalet
Sigala pujoe, muwoe keu Allah
Yang ka neulimpah, mangat ngoen saket

Seulawuet saleum, keu Rasulullah
Yang ba risalah, sunat ngoen wajeb
Nabi Muhammad, Utusan Allah
Sabda neukeubah, peudoman hudep

Samboet saleum lon, rakan meutuah
Hajat lon peugah, dua lhe baet
Nyoe hadih maja, hajat lon kisah
Beugoet neukeubah, Narit meusaket

Peudoman Hudep, hajat lon peugah
Lam bumoe Allah, Bek juet Peunyaket
Adak Tamarit, bek leupah leupah
Peulara lidah, hate gob saket

Leubeh bak Peudueng, tajam lom lidah
Ban rimueng juah, haba bicah phet
Meuprang ngoen pake, bak gara lidah
Bak salah peugah, kajuet peunyaket

Teutop ngoen duroe, asoe jeut taplah,,
Teutop ngoen babah, leupah that saket,,
Seubab nariet, teubiet lam babah,,
Meunyoe ka leupah, han ek le talet,,

Wahe syedara, bek leupah peugah
Yang le beurakah, kayem that sulet
Dak tameututoe, bek leupah-leupah
Peulara lidah, yoeh goeh meusingklet

Nuraka Syuruga, punca bak lidah
Nyan Dosa Ghibah, fahla meurateb
Dosa ngoen fahla, sinan bak lidah
Beugoet neupapah, bek juet peunyaket

Ohnoe sikada, haba lon peugah
Keu hamba Allah, peudoman hudep
Teuseurah bak droe, tajaga lidah
Tatueng faedah, mangat ngoen saket

( Tgk Diyueb Bruek/Sulaiman.A.Gani)17/02/2013