Cari

Subscribe:

Ads 468x60px

Pasang Iklan Anda Disini


Sunday, February 10, 2013

USWATUN HASANAH BAGINDA RASUL PART 1

Pengarang : Abu Syiek

Bak seupoet uroe dalam group PANAH.
Abu troeh langkah jak saweu gata.
Mandum syedara rakan ngoen sahbah.
Hana meu ilah meu ulah beda.

Assalamu'alaikom warahmatullah.
Bak awai langkah gata loen sapa.
Peuna peukara yang jeut ta meudrah.
Nye tan masalah bah abu rika.

Abu neuk rika kata mauidhah.
Utusan Allah sidroe baginda.
Hate mulia hantom na salah.
Maksum hai sahbah geulakap nama.

Bak saboeh uroe di Madinah.
Teumpat cukoep pah dipusat kota.
Sidroe manusia yahudi laknatillah.
Keu Rasulullah benci lagoei na.

Keu baginda hina jipeugah.
Hana amanah ateuh rhueng donya.
Sidroe pendusta hana fatanah.
Sabe bak babah beungoeh ngoen sinja.

Teungoeh didakwa haba jipeugah.
Utusan Allah Rasul troeh teuka.
Neu deungoe haba narit bak babah.
Yahudi laknatillah diteungoeh kota.

Rasul le neuwoe ubak aisyah.
Cuba neu ilah makanan yang na.
Mudah neu baca mangat pah surah.
Ngoen bu lam kulah saboeh ie aqua.

Laju le neuba U pusat madinah.
Bak yahudi laknatillah meu upat ceula.
Sinan neu buka bu yang teu kulah.
Ka reu oeh reu'ah yahudi bicara.

Ho teuh gata bahasa tapeugah.
Le Rasulullah neu buka haba.
Nyoempat makanan ubat puleh grah.
Ie saboeh glah loen joek keu gata.

Rupajih buta yahudi laknatillah.
Umu ka leupah hana le daya.
Toek bak haba tinggai treuk sihah.
Mahan kaleupah dalam keureunda.

Neu coek le Nabi bu teukulah.
Neu peu'ap lam babah deungoen mulia.
Bu cak ngoen yang brue neu peusiblah.
Ngoen hate ikhlah lembut lagoena.

Bu kaleuh ie saboeh glah.
Yahudi laknatillah buka lom haba.
Langsoeng di cerca Nabi dipeugah.
Hana amanah manusia hina.

Hana neu tampa peulom neu balah.
Hate Rasulullah tamse mutiara.
Meunye di gata sang syedara meutuah.
Yahudi laknatillah nafah tan lena.

Meugantoe masa rika loen peuhah.
Di Rasulullah cukoep seutia.
Beuthat di ceula rata jipeugah.
Ngoen hate ikhlah lapang lam dada.

Bak saboeh uroe katroeh bak sa'ah.
Utusan Allah katroeh bak masa.
Baginda Rasul Neuwoe bak Allah.
Neu tinggai sahabah ummat keuluarga.

Kiban ceurita yahudi laknatillah.
Meusoe yang ilah makanan diba.
Sampoe bak masa wafeut Rasulullah.
Rupah yang ceudah diteusoe hana.

Meusamboeng ceurita dalam hikayah.
Ngoen janji Allah abu manteng na.
Meulod baginda dua ribei peut blah.
Abu samboeng kisah lam bingkai maya.

Kheuk kheuk kheuk...

0 comments:

Post a Comment