Pengarang : Tgk Diyueb Bruek/Sulaiman A. Gani
Assalamu’alaikom, kisah loen puphoen
Loen lakee ampoen, nibak rabbana
Beureukat doa, guree di u loen
Beujeut loen susoen, beusampureuna
Pahala puasa, hajat loen susoen
Deungoe hai kawoem, u loen calitra
Buleuen puasa, rahmat ilahon
Pahala neupeutrorn, meuganda ganda
Lalilatulqadar, tuhan neupeutroen
Dosa neu ampoen, oleh hadharat
Uroe puasa, peurintah ilahon
Qur’an neupeutroen, buleun mulia
Meusoe yang meuheut, syuruga lapan
Pubuet amalan, masa lam donya
Neudeungoe loen kheun, na saboeh bayan
Kisah loen peutrang, hadist mustafa
Fireuman tuhan, hadist kurusi
Hikayah nabi, pangulee alam
Tiep tiep amalan, sama seukal
Yang dikerjai , le aneuk adam
Bandum amalan, tuhan peugah kri
Geubangsa bagi, ureueng kerjakan
Amal puasa, yang kecuali
Keudroe seundiri, Tuhan bangsakan
Disinoe loen boeh, soal teukeudi
Pakoen di Rabbi, neupeugah meunan
Seudang ibadat, sama seukali
Peurintah Rabbi, dum sekalian
Akan balasan, yang akan neubri
Bandum bak Rabbi, sit keuputusan
Bahan ngoen jaweub, jinoe u loen bri
Puasa ini, saboeh amalan
Saboeh ibadat, yang tersembunyi
Han diketahui, le hawas insan
Le manusia, han diketahui
Malingkan Rabbi, nyan Po amalan
Meunan cit pahala, puasa ini
Balasan neubri, rasia han ban
Uroe kiamat, Nabi peugah kri
Saboeh peurente , umat iseulam
Bagi mereka, sayeup tuhan bri
Ban cicem nuri, kajeut teurebang
Jeut phoe u manyang, kian kemari
Sampoe peuregi, syuruga lapan
Oh lheuh keliling, Syuruga tinggi
Yohnyan berhenti, bak saboh taman
Nyakni bak keubon, indah han sakri
Peunoh ngoen isi, buah – buahan
Hana padum trep, sinan berhenti
Yohnyan teuka le, peunjaga taman
Peunjaga syurga, yohnyan geusudi
Wahe ya akhi, soe keuh gata nyan
Pue malaikat, atau insani
Ganje han sakri, hireun lon pandang
Jaweub mareka, kamoe ummati
Pangule Nabi, nyang akhe zaman
Maleik Ridwan, yohyan lom sudi
Kalheuh hai akhi, geuceing amalan
Kalheuh talalu, gata bak titi
Coba peugah kri, pakriban macam
Jaweub mareka, waya hai akhi
Hana lon tukri, geiceng amlan
Hana meutemee, kamoe ngon titi
Bek an lon turi, lon kalon pih than
Peunjaga syuruga, hireun han sakri
Subhanallahi, ucap le yohnyan
Maleik ridwan, yohnyan lom sudi
Wahe ya akhi, peukeuh amalan
Peukeuh ibadat, gata kerjai
Sampoe tuhan bri, lagee nyan Macam
Titi han meupat, hisap han meukri
Bebas han sakri ,neubri le Tuhan
Jaweub mareka, wahe ya akhi
Kamoe berbakti, deungon amalan
Deugon ibadat, yang tersembunyi
Kamoe hormati, buleuen Ramadhan
Oh watee katroek, buleuen yang suci
Kamoe samboet le, ngen hate seunang
Duengoen puasa, yang kamoe isi
Yang disertai, dengan keu ikhlasan
Dengoen seumbahyang, wahe ya akhi
Sampoe tuhan bri, meunoe ban macam
Sayeup di kamoe, langsong tuhan bri
Sampoe keumari, kamoe teureubang
Tuhan peutamoeng, syuruga tinggi
Ngon tersembunyi, hana soe pandang
Oh noe katamat, Kisah ulon bri
Coba peurhati, kawom iseulam
Haba lon peugah, kisah lon rawi
Nyan Hadist Nabi, bukoen lon karang
Bukoen cerita, Sulaiman, Gani
Nyan Hadist Nabi,janjongan alam
Tgl 14 juli 2012
Subscribe to:
Post Comments (Atom)
0 comments:
Post a Comment