Cari

Subscribe:

Ads 468x60px

Pasang Iklan Anda Disini


Sunday, February 10, 2013

HABA LOEN RATOEH

Pengarang : Agam Sidroe

Assalamu'alaikom, nibak phoen rawi,,
Akhi ngoen ukhti, saleum loen peutroeh,,
Gasa ngoen haloeh, meu'ah beu neubri,,
Bek keunoeng adili, isi loen ratoeh,,

Mulai ujoeng oek, sampoe U gaki,,
Nikmat Tuhan bri, ban saboeh teuboeh,,
Mangat deungoen khoeh, mandum meu arti,,
Hanjeut teumaki, caci ngoen kiroeh,,

Gaki meudoda, urat meunari,,
Mita raseuki, keu asoe rumoeh,,
Ingat keu tuboeh, Rahmat Tuhan bri,,
Aneuk ngoen istri, bek sampe mehmoeh,,

Ladom pileh broeh, na yang buet nguli,,
Yang bak labi-labi, hareukat tuboeh,,
Ladom ka awoeh, bak pula campli,,
Mita sitali, hantom tho reu oeh,,

Allahu Allah, Allahu Rabbi,,
Amponan Neu bri, bala bak jeu oeh,,
Bek sampe roeh, maksiet ngoen keuji,,
Bek roeh meu taki, janji hana troeh,,

Neu bri keukamoe, yang ula ili,,
Mita raseuki, beureukat tuboeh,,
Bek roeh meupajoeh, nyan peng korupsi,,
Babah meu gunci, yang jroeh ji ratoeh,,

Yang jroeh peunajoeh, ingat keu Rabbi,,
Meunyan insani, nikmat di teuboeh,,
Rahmat sare troeh, syuruga Tuhan bri,,
Buraq meuriti, ka dari jeu oeh,,

Bek sampe lumpoe, uroe wet gaki,,
Malam meunari, ngoen peng lam bungkoeh,,
Hana meu sunggoeh, pane na Neu bri,,
Jangan sekali, mimpi ho yang roeh,,

'Oh watee nyawoeng, izin Tuhan bri,,
Baroe meungabdi, taubat that sunggoeh,,
Intan lam bungkoeh, hana le arti,,
Rumoeh yang tinggi, ka goeb yang laboeh,,

Tinggai lam tanoeh, mehmoeh han sakri,,
Babah meu gunci, bukeuti sare troeh,,
Mandum ji ratoeh, jaroe ngoen gaki,,
Sinan keuh meuri, keuji atau jroeh,,

Cukoep that haloeh, leumah di titi,,
Mata pancuri, si lapan tujoeh,,
Miseu ban buloeh, meubungkoeh gaki,,
Meu pata-pati, lam nuraka tujoeh,,

Asoe di pajoeh, tuboeh tan meuri,,
Tan soe paduli, laju geu ruboeh,,
Tuleung geu koeh2, mandum pancuri,,
Ngoen peng korupsi, sare beureutoeh,,

Haba loen peutroeh, asoe lam rawi,,
Cuba ta kaji, wahe rakan beoh,,
Bek salah pajoeh, roeh meukap campli,,
Laju bak syaikhi, keunan neu piyoeh,,

Gasa ngoen haloh, rika loen uji,,
Maklum yang rawi, manteng that bei khoeh,,
Hana peuneutoeh, dalam group seuni,,
Bak balee meungaji, keunan neu peutroeh,,

Kuta Radja : 16 Des 2012M / 3 Shafar 1434H

0 comments:

Post a Comment